1. Die yen Jesu roro kpahen vwẹ ason rọ koba o ki ghwu?

VWẸ ason rọ koba Jesu ki ghwu, ọ riẹnre nẹ ọ cha yanjẹ idibo rọyen vwo kẹrẹkpẹ, o ji roro kpahen obo re cha phia kẹ ayen vwẹ obaro na. Ọ da vuẹ ayen: “Ovwan rha dia e rẹ akpọ na-a.” (Jọn 15:19) Ọke vwọ yanran na, ọ da nẹrhovwo rhe Ọsẹ rọyen fikirẹ ayen, rọ vwọ ta: “Ayen dia e rẹ akpọ na-a.” (Jọn 17:15, 16) Die yen Jesu mudiaphiyọ?

2. Die yen “akpọ” rẹ Jesu ta ota kpahen na mudiaphiyọ?

² Vwẹ etinẹ na, “akpọ” na mudiaphiyọ ihwo re riẹn Ọghẹnẹ-ẹ, rẹ Eshu suẹn. (Jọn 14:30; Ẹfesọs 2:2; Jems 4:4; 1 Jọn 5:19) Mavọ yen e se vwo jẹ “e rẹ akpọ” na ẹdia? Vwẹ uyovwinrota nana, avwanre cha fuẹrẹn idjerhe sansan re se vwo ruo: Avwanre ka ẹbẹre rẹ Uvie rẹ Ọghẹnẹ, ọtiọyena avwanre vwobọ vwẹ oseghe rẹ usuo-on. Avwanre sen ẹwẹn rẹ akpọ na. Avwanre sẹn osẹnvwe rẹ abavo, je vwẹ ẹro abavo vwo ni igho. Avwanre je ghwa ekuakua ofovwin rẹ Ọghẹnẹ phiyọ oma.—Ni Eta rẹ Odjefiotọ 16.

3. Ẹro vọ yen Jesu vwo ni oseghe rẹ usuon?

³ Jesu vwọ hẹ akpọ na, ọ mrẹvughe nẹ ihwo vwo  ebẹnbẹn buebun, akpeyeren lọhọ kẹ aye-en. O vwo ọdavwẹ rayen, ọ je guọnọ chọn ayen uko. Ọ vwẹ oma ru osun rẹ ẹkuotọ? Ẹjo. Ọ riẹnre nẹ Uvie yẹrẹ usuon rẹ Ọghẹnẹ yen ihwo ghene guọnọ. Jesu yen cha dia Ovie rẹ Uvie yena, Uvie na kọyen obo ro ji ghwoghwo kpahen. (Daniẹl 7:13, 14; Luk 4:43; 17:20, 21) Jesu vwobọ vwẹ oseghe rẹ usuon kakaka-a. Ọke rẹ Jesu vwọ hẹ obaro rẹ Osun rẹ Rom re se Pọntiọs Pailet, ọ da ta: “Uvie mẹ dia ọ rẹ akpọ nana-a.” (Jọn 18:36) Idibo rọyen ji vwobọ vwẹ oseghe rẹ usuo-on. Ọbe re se On the Road to Civilization tare nẹ Inenikristi rẹsosuọ “che se mu ekpeti-i.” Ọtiọyen ọ je pha kẹ Inenikristi nonẹna. Avwanre ka ẹbẹre rẹ Uvie rẹ Ọghẹnẹ kare kare, ọtiọyena avwanre rha ka ẹbẹre rẹ usuon rẹ akpọ nana-a—Matiu 24:14.

4. Mavọ yen Inenikristi rẹ uyota vwo biẹcha Uvie rẹ Ọghẹnẹ?

⁴ Ihwo re ji uwevwin kpo ẹkuotọ ọfa ri mudia kẹ ẹkuotọ rayen vwobọ vwẹ oseghe rẹ usuon rẹ ẹkuotọ re ji ayen ra na-a. Ọtiọyen ọ hepha kẹ ihwo ra jẹreyọ na, ri che nene Jesu sun vwẹ odjuvwu. Pọl de si vwo rhe Inenikristi ra jẹreyọ: “Avwanre kẹ ihwo ri Kristi ji uwevwi.” (2 Kọrẹnt 5:20) Ihwo ra jẹreyọ na mudia kẹ usuon rẹ Ọghẹnẹ. Ayen vwobọ vwẹ oseghe rẹ usuon rẹ akpọ nana-a. (Filipae 3:20) Ukperẹ ọtiọyen, ayen vwẹ ukẹcha kẹ iduduru rẹ ihwo rere ayen vwọ riẹn kpahen usuon rẹ Ọghẹnẹ. “Igodẹ efa” na vwo iphiẹrophiyọ rẹ ayen vwọ dia akpọ kpokpọ na bẹdẹ bẹdẹ, ayen biẹcha ihwo ra jẹreyọ na. Ayen ji vwobọ vwẹ oseghe rẹ usuo-on. (Jọn 10:16; Matiu 25:31-40) Vwọrẹ uyota, o vwo Onenikristi rẹ uyota vuọvo ro  che vwobọ vwẹ usuon rẹ akpọ nana-a.—Se Aizaya 2:2-4.

5. Die yen orọnvwọn ọvo rọ sorọ Inenikristi vwo jẹ ofovwin ephio?

⁵ Inenikristi rẹ uyota ni ihwo rẹ ayen nene ga kerẹ orua rayen, ayen ji yerẹn kuẹgbe otoro ẹkuotọ yẹrẹ asan rẹ ayen nurhe-e. (1 Kọrẹnt 1:10) Avwanre de kpo ofovwin, kọyen avwanre che nene orua rẹ avwanre họnre, ihwo rẹ avwanre nene ga kuẹgbe, ri Jesu tare nẹ e vwo ẹguọnọ kpahen. (Jọn 13:34, 35; 1 Jọn 3:10-12) Vwọ vrẹ ọyena, Jesu vuẹ idibo rọyen nẹ ayen tobọ vwo ẹguọnọ rẹ ivwighrẹn rayen.—Matiu 5:44; 26:52.

6. Ẹro vọ yen idibo rẹ Jihova vwo ni usuon?

⁶ Avwanre davwẹngba vwọ dia omamọ rẹ emotọ  dede nẹ avwanre vwobọ vwẹ oseghe rẹ usuon vẹ ofovwi-in. Kerẹ udje, avwanre muọghọ kẹ usuon womarẹ a vwọ yọnrọn irhi rẹ ẹkuotọ na, je hwosa uyovwin. Avwanre “vwẹ emu rẹ Ọghẹnẹ” vwọ kẹ Ọghẹnẹ. (Mak 12:17; Rom 13:1-7; 1 Kọrẹnt 6:19, 20) “Emu rẹ Ọghẹnẹ” churobọ si re vwo vwo ẹguọnọ rọyen, nyupho rọyen je vwẹ ẹga vwọ kẹ. Avwanre muegbe re vwo ghwu ukperẹ a vwọ churhi rẹ Jihova.—Luk 4:8; 10:27; se Iruo Rẹ Iyinkọn Na 5:29; Rom 14:8.

7, 8. Die yen “[“ẹwẹn,” NW] rẹ akpọ na,” kẹ mavọ yen o djobọte ihwo wan?

⁷ E vwo jẹ ẹbẹre ọvo rẹ akpọ rẹ Eshu nana ẹka mudiaphiyọ nẹ a vwẹ uphẹn kẹ “[“ẹwẹn,” NW] rẹ akpọ na” nẹ o sun avwanre-e. Ẹwẹn yena yen iroro vẹ uruemu ri nẹ obọ rẹ Eshu cha, o suẹn ihwo re rhọnvwe ga Jihova-a. Ẹkẹvuọvo Inenikristi sen uruemu nana. Kirobo rẹ Pọl tare, “ọ dia [“ẹwẹn,” NW] rẹ akpọ na avwanre vwori-i, ẹkẹvuọvo [“ẹwẹn,” NW] na ro nẹ obọ rẹ Ọghẹnẹ rhe na.”—1 Kọrẹnt 2:12; Ẹfesọs 2:2, 3; ni Eta rẹ Odjefiotọ 17.

⁸ Ẹwẹn rẹ akpọ na nẹrhẹ ihwo vwo urhuru, kparoma, je vwọsua. Ọ nẹrhẹ ayen roro nẹ ofori ayen vwo nyupho rẹ Ọghẹnẹ-ẹ. Eshu guọnọre nẹ ihwo ru obo ri je ayen emu vuọvo che nẹ obuko rọyen rhe-e. Ọ guọnọre nẹ ihworakpọ vwo imuẹro nẹ “urhuru si vwe rẹ ugboma, ojevwe rẹ ẹro” eyen ma ghanre vwẹ akpeyeren. (1 Jọn 2:16; 1 Timoti 6:​9, 10) Idẹbono  davwẹngba rọyen eje rọ vwọ riẹriẹ ihwo ma rho kẹ idibo rẹ Jihova, rere avwanre vwo vwo oka rẹ iroro rọyen.—Jọn 8:44; Iruo Rẹ Iyinkọn Na 13:10; 1 Jọn 3:8.

9. Mavọ yen ẹwẹn rẹ akpọ na se vwo djobọte avwanre?

⁹ Ẹwẹn akpọ na je riariẹ avwanre phiyọ kerẹ odju ra wẹn reyọ na. A rha davwẹngba vwọ siọ-ọn, o che djobọte avwanre. (Se Isẹ 4:23.) Ẹsosuọ, ọ sa họhọ obo ri yovwirin, kerẹ udje a sa vwẹ uphẹn kẹ iroro vẹ uruemu rẹ ihwo re ga Jihova-a nẹ e ro avwanre oma. (Isẹ 13:20; 1 Kọrẹnt 15:33) Yẹrẹ avwanre se vwobọ vwẹ erọnvwọn kerẹ ughe rẹ ihwo re banphiyọ, ẹvwọsua rẹ ihwo ri she nẹ ukoko na, yẹrẹ erharhe rẹ ehẹha.—Ni Eta rẹ Odjefiotọ 18.

10. Mavọ yen a sa vwọ sen ẹwẹn rẹ akpọ na?

¹⁰ Mavọ kọyen avwanre se vwo nomaso rere ẹwẹn rẹ akpọ na vwo jẹ avwanre esuon? E jẹ e sikẹrẹ Jihova, a je vwẹ uphẹn kẹ aghwanre rọyen nẹ o sun avwanre. Ofori nẹ a je yare ukẹcha rẹ ẹwẹn ọfuanfon rọyen ọkieje, e mi muomaphiyọ ẹga rọyen. Jihova yen me vwo ẹgba kparobọ vwẹ akpọ vẹ odjuvwu. Avwanre vwo imuẹro nẹ ọ cha chọn avwanre uko vwọ sen ẹwẹn rẹ akpọ na.—1 Jọn 4:4.

11. Mavọ yen ẹwẹn rẹ akpọ nana vwo djobọte osẹnvwe rẹ ihwo?

¹¹ E se djephia nẹ avwanre hẹ ẹbẹre ọvo rẹ akpọ na-a womarẹ irhuon vẹ osẹnvwe rẹ avwanre. Nonẹna, ihwo buebun sẹn osẹnvwe rere e vwo ni ayen so, e vwọ kpare urhurusivwe rẹ ọfanrhiẹn, o vwo djephia  nẹ ayen guọnọ gbevwọso, yẹrẹ ayen vwo igho mamọ. Ihwo evo sẹn osẹnvwe gbegbe, zabu zabu. E jẹ avwanre vwo uphẹn kẹ iruemu nana nẹ i djobọte osẹnvwe rẹ avwanre-e.

12, 13. Odjekẹ rẹ Baibol vọ yen cha chọn avwanre uko vwo brorhiẹn rẹ obo re che kuphiyọ?

¹² Avwanre idibo rẹ Jihova, ọtiọyena ọkieje yen avwanre vwọ sẹn osẹnvwe rọ fonro, ro faro, ro ji shephiyọ vwọ kẹ asan na. Avwanre da sẹn “osẹvwe rẹ oma evwokpotọ vẹ iroro,” ọnana che djephia  nẹ avwanre ihwo “ri segbuyota.”—1 Timoti 2:9, 10; Jude 21.

¹³ Osẹnvwe rẹ avwanre se djobọte ẹro rẹ ihwo vwo ni Jihova vẹ ihwo rọyen. Avwanre guọnọ ru emu “ejobi vwọ kẹ urinrin rẹ Ọghẹnẹ.” (1 Kọrẹnt 10:31) Omaevwokpotọ churobọ si re vwo muọghọ kẹ ẹro rẹ ihwo efa vwo ni emu. Ọtiọyena, a da sane irhuon vẹ osẹnvwẹ rẹ avwanre, ofori nẹ a karophiyọ nẹ orhiẹn-ebro avwanre se djobọte ihwo efa.—1 Kọrẹnt 4:9; 2 Kọrẹnt 6:3, 4; 7:1.

14. Die yen ofori nẹ e roro kpahen siẹrẹ a da sane obo re che kuphiyọ vwẹ iruo rẹ ẹga na?

¹⁴ Mavọ yen ofori nẹ osẹnvwe rẹ avwanre dia siẹrẹ e de kpo uyono yẹrẹ vwẹ iruo aghwoghwo na? Avwanre sẹn osẹnvwe rẹ ihwo che vwo ni avwanre so? Osẹnvwe rẹ avwanre nẹrhẹ oma vo ihwo efa? Avwanre no nẹ oborẹ avwanre sẹn wan te ohwo vuọvo-o? (Filipae 4:5; 1 Pita 5:6) Vwọrẹ uyota, avwanre guọnọ sẹn osẹnvwe ro vwo erhuvwu, ẹkẹvuọvo re vwo vwo iruemu rẹ Onenikristi yen ma ghanre. Enana yen Jihova nẹ vwẹ oma rẹ avwanre. E nẹrhẹ e vughe oka rẹ ohwo rẹ avwanre ghene hepha rọ “dia ohwo rọ djahere vwẹ obo udu . . . rọ ghare gangan vwẹ obaro rẹ Ọghẹnẹ.”—1 Pita 3:3, 4.

15. Diesorọ Jihova rha vuẹ avwanre phiogun obo re che kuphiyọ-ọ?

¹⁵ Jihova si irhi kẹ avwanre kpahen obo re che kuphiyọ-ọ. Ukperẹ ọtiọyen, ọ kẹ avwanre odjekẹ vwẹ Baibol na, re sa vwẹ ukẹcha kẹ avwanre vwo bru omamọ orhiẹn. (Hibru 5:14) Ọ guọnọre nẹ e mu orhiẹn rẹ avwanre eje kpahen ẹguọnọ re vwo  kpahọn vẹ ihwo efa. (Se Mak 12:30, 31.) Vwẹ akpọneje, ihwo rẹ Jihova sẹn osẹnvwe sansan vwo nene ojẹ rayen vẹ obo ra sẹn wan vwẹ ekogho rayen. Osẹnvwe sansan nana ghini yovwin dẹn.

16. Mavọ yen ẹro rẹ akpọ na vwo ni igho vwọ fẹnẹ oborẹ Jesu yonori? Enọ vọ yen a sa nọ oma avwanre?

¹⁶ Eshu guọnọrẹ nẹ ihwo roro nẹ igho vẹ ekuakua rẹ akpeyeren yen kẹ ohwo omavwerhovwẹn, ẹkẹvuọvo ihwo rẹ Jihova riẹnre nẹ ọyena ofian. Avwanre vwo imuẹro kpahen ota rẹ Jesu: “Ọ dia efe  buebu rẹ ohwo vwori ọye urhuarhọ rọye epha-a.” (Luk 12:15) Igho cha sa kẹ avwanre obọdẹn rẹ omavwerhovwẹ-ẹn. Ọ cha sa kẹ avwanre omamọ igbeyan, uvi rẹ ufuoma, yẹrẹ arhọ rẹ bẹdẹ-ẹ. Vwọrẹ uyota avwanre guọnọ ekuakua rẹ akpeyeren evo, avwanre je guọnọ riavwerhen rẹ akpeyeren. Ẹkẹvuọvo, Jesu yono avwanre nẹ oma cha vwerhen avwanre siẹrẹ e de vwo omamọ oyerinkugbe vẹ Ọghẹnẹ, e de ji phi ẹga rọyen phiyọ ẹdia rẹsosuọ vwẹ akpeyeren. (Matiu 5:3; 6:22) Nọ oma wẹn: ‘Ẹro rẹ akpọ na vwo ni igho ọyen mi ji vwo no? Igho yen obo mi me roro yẹrẹ ta ota kpahan?’—Luk 6:45; 21:34-36; 2 Jọn 6.

17. Mavọ yen akpeyeren wẹn se vwo yovwinphiyọ wọ da sen erọ rẹ akpọ na vwo ni igho?

¹⁷ Avwanre da tẹnrovi ẹga rẹ Jihova, je sen ẹro rẹ akpọ na vwo ni igho, avwanre rhe che mu akpọ yeri-in. (Matiu 11:29, 30) Avwanre ki che vwo ẹwẹn rẹ otekẹvwẹ kugbe ubiudu rẹ dọe. (Matiu 6:31, 32; Rom 15:13) Avwanre rha cha ro ẹnwan rẹ okamuka kpahen ekuakua rẹ akpeyere-en. (Se 1 Timoti 6:9, 10.) Ke che vwo omavwerhovwẹn ro rhe ọkokẹ. (Iruo Rẹ Iyinkọn Na 20:35) Ọke yena, ke che vwo ọke ra cha ghwọrọ vẹ ihwo re vwo ẹguọnọ kpahen. Ka cha tobọ je riẹn vwerhẹn.—Aghwoghwo 5:12.

18. Die yen Eshu davwẹngba ro vwo ru?

¹⁸ Eshu davwẹngba rọ vwọ guọghọ oyerinkugbe rẹ avwanre vẹ Jihova, ọtiọyena ofori nẹ e ru kemu kemu vwọ sẹro rọyen. A cha họnre vwọso “otuofovwi rẹ [“ẹwẹn,” NW] umwemwu.” (Ẹfesọs 6:12) Idẹbono  vẹ emekashe rọyen guọnọre nẹ oma vwerhen avwanre-e, ayen je guọnọ nẹ e vwo arhọ rẹ bẹdẹ-ẹ. (1 Pita 5:8) Ivwighrẹn nana họnra vwọso avwanre, jẹ womarẹ ukẹcha rẹ Jihova, e che phikparobọ!

19. Mavọ yen Ẹfesọs 6:14-18 djisẹ rẹ “ekuakua rẹ ofovwi” rẹ Onenikristi cha ghwẹ phiyọ?

¹⁹ Vwẹ ọke awanre, isodje ku erọnvwọn phiyọ re sẹro rayen vwẹ ofovwin. Vwẹ idjerhe vuọvo na, Jihova kẹ avwanre “ekuakua rẹ ofovwi” ra cha ghwẹ phiyọ. (Ẹfesọs 6:13) E cha sẹro rẹ avwanre. E si kpahen ekuakua rẹ ofovwin nana vwẹ Ẹfesọs 6:14-18: “Mudia koi, vwẹ uyota na chobiẹ ehun, vwẹ ọghan rẹ ọvwata mu arhare, vwẹ iyẹnrẹ esiri rẹ ufuoma na ru isabata kuhọ awọ wẹn; ọ rọ ka enu gba reyọ ekpọfia rẹ esegbuyota na, kọye wa vwọ kpọ ibiri rẹ erhanre rẹ idẹbono kufia. Gba vwẹ ubierhu rẹ esivwo na tughẹ, kugbe ọlọkọ rẹ [“ẹwẹn,” NW] na, kọye hẹ ota rẹ Ọghẹnẹ na. Nẹ ẹrhovwo kọke kọke vwẹ evun rẹ [“ẹwẹn,” NW], vwẹ ẹrhovwo ẹnẹ ejobi kugbe oyare.”

20. Die yen e che ru tavwen “ekuakua rẹ ofovwi” na ke chọn avwanre uko?

²⁰ Ọvo usun rẹ ekuakua nana da chọrọ isodje ọvo ẹro, asan ọvo de rhiephiyọ vwẹ oma rọyen, etiyin kọyen ivwighrẹn na cha tẹnrovi. A da guọnọ nẹ “ekuakua rẹ ofovwi” nana sẹro rẹ avwanre, ọvuọvo rha cha chọrọ avwanre ẹro-o. Ofori nẹ a ghwa ayen eje ọkieje, je vwẹrote ayen. E che phi ofovwin nana rhi te ọke ra cha vwọ ghwọrọ akpọ nana, ji si Eshu vẹ emekashe rọyen no. (Ẹvwọphia 12:17; 20:1-3) Ọtiọyena, avwanre vẹ iroro ọchọchọ yẹrẹ ovwiẹrẹ ọvo de muabọ, e jẹ oma rhọ avwanre-e!—1 Kọrẹnt 9:27.

21. Mavọ yen se vwo phikparobọ?

²¹ Avwanre vwo ẹgba te Idẹbono-o. Ẹkẹvuọvo womarẹ ukẹcha rẹ Jihova, avwanre gan nọ! A sa vwọ fuevun, ofori nẹ a nẹrhovwo rhe Jihova, yono Ota rọyen, ji kuomakugbe iniọvo na. (Hibru 10:24, 25) Erọnvwọn nana cha vwẹ ukẹcha kẹ avwanre vwọ fuevun kẹ Ọghẹnẹ ọkieje, je chochọn rẹ esegbuyota rẹ avwanre.

22, 23. (a) Mavọ yen e se vwo muegbe ọkieje vwọ chochọn rẹ esegbuyota rẹ avwanre? (b) Die yen e che yono vwẹ uyovwinrota rọ vwọ kpahen ọnana?

²² Ofori nẹ e muegbe vwọ chochọn rẹ esegbuyota rẹ avwanre ọkieje. (Jọn 15:19) Vwẹ ẹdia evo, orhiẹn-ebro rẹ Iseri rẹ Jihova fẹnẹ ọ rẹ ihwo efa dibi dibi. Nọ oma wẹn: ‘Me tobọ riẹn oboresorọ orhiẹn rẹ avwanre vwọ fẹnẹ? Mi ghini vwo imuẹro nẹ oborẹ Baibol na vẹ odibo rọ fuevun na tare gbare? Oma vwerhen ovwẹ nẹ mẹvwẹ Oseri rẹ Jihova? (Une Rẹ Ejiro 34:2; Matiu 10:32, 33) Mi se dje obo mi segbuyota vwọ kẹ ihwo efa?’—Matiu 24:45; Jọn 17:17; se 1 Pita 3:15.

²³ Vwẹ ẹdia buebun, ọ pha lọlọhọ ra vwọ riẹn obo re ru e se vwo jẹ ẹbẹre ọvo rẹ akpọ na ẹka. Ẹkẹvuọvo vwẹ ọke efa, ọ ghwa lọhọ-ọ. Eshu guọnọ riẹriẹ avwanre vwẹ idjerhe sansan. Idjerhe ọvo yen erọnvwọn ra vwọ diotọ. Mavọ yen a sa vwọ reyọ erọnvwọn ra vwọ diotọ vwo ruiruo vwẹ idjerhe rẹ aghwanre? Uyovwinrota rọ vwọ kpahen ọnana che dje kpahọn.