1-3. (a) Mavọ yen oma ru ihwo buebun kpahen iruo rayen? (b) Enọ vọ yen a cha kpahenphiyọ vwẹ uyovwinrota nana?

VWẸ akpọneje, ihwo buebun wian gangan rere ayen sa vwọ vwẹrote oma rayen vẹ orua rayen. Buebun vwo ẹguọnọ rẹ iruo raye-en, oshọ re vwo kpo iruo tobọ mu ihwo evo. Ọ da dia ọtiọyen o ru we, die wo se ru wọ sa vwọ mrẹ omavwerhovwẹn vwẹ iruo wẹn? Mavọ yen iruo wẹn sa vwọ kẹ wẹ omavwerhovwẹn?

² Jihova da vuẹ avwanre: “Kohwo kohwo vwọ re vwọ da rere oma vwerhọ vwọ wian owian rọye ejobi.” (Aghwoghwo 3:13) Jihova ma urhurusivwe re vwo ruiruo phiyọ avwanre oma. Ọ guọnọre nẹ avwanre vwo omavwerhovwẹn vwẹ iruo rẹ avwanre.—Se Aghwoghwo 2:24; 5:18.

³ Ọtiọyena, die yen sa chọn avwanre uko vwọ riavwerhen rẹ iruo avwanre? Oka rẹ iruo vọ yen Onenikristi cha kẹnoma kẹ? Mavọ yen e se vwo phi iruo avwanre vẹ ẹga rẹ Jihova phiyọ ẹdia ro fo ayen? Ọrhọ yen iruo rọ ma ghanre kparobọ re che ru?

4, 5. Ẹro vọ yen Jihova vwo ni iruo?

⁴ Jihova vwo ẹguọnọ rẹ iruo rọyen. Jẹnẹsis 1:1 da ta: “Nẹ otọ rhe Ọghẹnẹ vwọ ma odjuvwu  vẹ akpọ.” Ọghẹnẹ vwọ ma erọnvwọn eje rehẹ otọrakpọ na nu, ọ da tanẹ “oyovwiri gangan.” (Jẹnẹsis 1:31) Oma nabọ vwerhen Ọmemama na kpahen erọnvwọn eje rọ mare.—1 Timoti 1:11.

⁵ Jihova je dobọ rẹ owian ji-i. Jesu da ta: “Ọsẹ mẹ ji ru iruo te ọke na.” (Jọn 5:17) Dede nẹ avwanre riẹn erọnvwọn rẹ igbunu eje rẹ Jihova ruẹ-ẹ, jẹ avwanre riẹn evo. Ọ sanẹ ihwo ri che nene Jesu sun vwẹ obo odjuvwu. (2 Kọrẹnt 5:17) Jihova nabọ vwẹrote ihworakpọ, ọ je kpọ ayen viẹ. Womarẹ iruo rẹ aghwoghwo na re ruẹ vwẹ akpọneje, iduduru rẹ ihwo rhe riẹn Jihova re, vẹ iphiẹrophiyọ rẹ ayen cha vwọ dia bẹdẹ vwẹ iparadaisi.—Jọn 6:44; Rom 6:23.

6, 7. Oka rẹ ọwiowian vọ yen Jesu hepha?

⁶ Jesu ji vwo ẹguọnọ rẹ iruo kerẹ Ọsẹ rọyen. Ọ ke rhe otọrakpọ na, Jesu ọyen “onotu rẹ ọwena,” ro nene Ọghẹnẹ ma erọnvwọn eje rehẹ odjuvwu vẹ otọrakpọ na. (Isẹ 8:22-31; Kọlose 1:15-17) Jesu vwọ hẹ otọrakpọ na, ọ je wiowian gangan. Ọke rọ vwọ hẹ eghene, o de yono iruo rẹ ọkanrirhe; ọ sa dianẹ o ru egbara je kanre iwevwin. A da re riẹn Jesu phiyọ “ọ wẹna,” kidie ọ nabọ tẹn ona rẹ iruo rọyen.—Mak 6:3.

⁷ Dedena, iruo rọ ma ghanre kẹ Jesu ọyen ro vwo ghwoghwo ji yono ihwo kpahen Jihova. Rọ vwọ dianẹ ẹgbukpe erha gbe ubro ọvo yen o che vwo ru  iruo aghwoghwo na, ọ da nabọ wian gangan vwo nẹ urhiọke re te ason. (Luk 21:37, 38; Jọn 3:2) Jesu yan iroko buebun vwẹ idjerhe rọ vọnre vẹ ekpẹn, ro vwo ghwoghwo iyẹnrẹn esiri na vwọ kẹ kohwo kohwo.—Luk 8:1.

8, 9. Diesorọ Jesu vwọ riavwerhen rẹ iruo rọyen?

⁸ Iruo rẹ Ọghẹnẹ pha kerẹ emuọre vwọ kẹ Jesu. Iruo nana vwẹ ẹgba vwọ kẹ. Ọke evo, emu tobọ chọrọ Jesu ẹro fikirẹ owian ọgangan ro ruẹ. (Jọn 4:31-38) Ọ reyọ kuphẹn kuphẹn vwọ vwẹ ukẹcha kẹ ihwo efa vwọ riẹn kpahen Ọsẹ rọyen. Kọyensorọ ọ sa vwọ ta kẹ Jihova: “Me vwẹ urinrin kẹ owẹ vwẹ akpọ na, ri mi vwo ru iruo ru wọ vwọ kẹ vwẹ ru gba.”—Jọn 17:4.

⁹ O phẹnre dẹn nẹ Jihova vẹ Jesu ayen egbowian, ayen je mrẹ aghọghọ vẹ evunvọnvwẹ vwẹ iruo rayen. E jẹ avwanre “vwẹ ẹro kere Ọghẹne,” a me je “vwẹ ẹro kere [Jesu].” (Ẹfesọs 5:1; 1 Pita 2:21) Kọyensorọ avwanre vwọ wian gangan vwẹ kiruo kiruo rẹ avwanre ruẹ.

10, 11. Die yen chọn avwanre uko vwọ vwẹ ẹro abavo vwo ni iruo?

¹⁰ Kerẹ idibo rẹ Jihova, avwanre wian gangan vwọ vwẹrote oma avwanre vẹ orua avwanre. Ọ sa bẹn ọkiọvo re vwo vwo omavwerhovwẹn vwẹ iruo avwanre. Ọtiọyena, die yen e se ru kpahọn?

¹¹ Vwo ẹro abavo. Ọ sa dianẹ e che se wene asan re de ruiruo vẹ uche iruo rẹ avwanre ruẹ-ẹ, ẹkẹvuọvo e se wene uruemu avwanre. A da riẹn oborẹ Jihova guọnọ mie avwanre, ke se ruo. Kerẹ udje:  Jihova guọnọre nẹ ọgbuyovwin nabọ vwẹrote orua rọyen te asan rẹ ẹgba rọyen muru. Vwọrẹ uyota, Baibol na tare nẹ ohwo rọ rhọnvwe vwẹrote orua rọye-en “bra nọ ohwo ro ji segbuyota-a.” (1 Timoti 5:8) Wọ da dia ọgbuyovwin, davwẹngba wọ vwẹrote orua wẹn. Owenẹ wo vwo ẹguọnọ rẹ iruo wẹn yẹrẹ wo vwo ẹguọnọ rọye-en, riẹn nẹ wọ da sa vwẹrote orua wẹn, ọ cha nẹrhẹ oma vwerhen Jihova.

12. Erere vọ yen herọ siẹrẹ a da dia ọgbowian vẹ ohwo rẹ uyota?

¹² Dia ọgbowian, je dia ohwo rẹ uyota. Ọnana sa nẹrhẹ wọ riavwerhen rẹ iruo wẹn. (Isẹ 12:24; 22:29) Ọ cha nẹrhẹ ohwo wo ruiruo kẹ vwẹroso owẹ. Ihwo re ruiruo kẹ vwẹ ẹro ọghanghanre vwo nẹ ihwo rẹ uyota kidie ayen cho igho, ekuakua vẹ ọke-e. (Ẹfesọs 4:28) Ma rho, Jihova riẹnre nẹ wẹwẹ ọgbowian vẹ ohwo rẹ uyota. Wo se vwo ẹwẹn obrorhiẹn rọ pha “phẹphẹ” kidie wọ riẹnre nẹ wo ruẹ obo ri je Ọghẹnẹ.—Hibru 13:18; Kọlose 3:22-24.

13. Erere ọfa vọ yen se norhe siẹrẹ a da dia ihwo rẹ uyota vwobẹ iruo?

¹³ Mrẹvughe nẹ uruemu wẹn vwobẹ iruo sa ghwa ujiri vwo rhe Jihova. Ọnana orọnvwọn ọfa ro mu avwanre vwo ruiruo vẹ omavwerhovwẹn. (Taitọs 2:9, 10) Uruemu esiri wẹn sa tobọ nẹrhẹ ohwo rẹ wẹ vẹ ọyen gbe ruiruo rhiabọreyọ uyono rẹ Baibol.—Se Isẹ 27:11; 1 Pita 2:12.

14-16. Die yen ofori nẹ wo roro kpahen siẹrẹ wọ da guọnọ iruo?

¹⁴ Baibol na ghwe djunute oka rẹ iruo ro fori nẹ Onenikristi che ru yẹrẹ ọ ro che ru-u. Ẹkẹvuọvo,  uchebro rọyen sa chọn avwanre uko vwo bru omamọ rẹ orhiẹn kpahen iruo. (Isẹ 2:6) Uchebro rẹ Baibol na sa chọn avwanre uko vwọ kpahenphiyọ enọ nana.

¹⁵ Iruo nana cha nẹrhẹ mi ru obo re chọre vwẹ ẹro rẹ Jihova? Avwanre yono kpahen erọnvwọn evo rẹ Jihova vwo utuoma kpahen, kerẹ uji-echo vẹ efian-ẹvwọrọn. (Eyanno 20:4; Iruo Rẹ Iyinkọn Na 15:29; Ẹfesọs 4:28; Ẹvwọphia 21:8) Ọtiọyena,  ofori nẹ avwanre kẹnoma kẹ kiruo kiruo rọ sa nẹrhẹ avwanre ru obo re vwọso irhi rẹ Jihova.—Se 1 Jọn 5:3.

¹⁶ Iruo nana titẹ irueru re chọre vwẹ ẹro rẹ Jihova? Kerẹ udje, ohwo da kẹ avwanre iruo re vwo dede erhorha vwẹ họspita ra da kpanre evun vwo? O vwo emu vuọvo rọ chọre vwẹ iruo re vwo dede erhorha-a. Ẹkẹvuọvo, wọ riẹn ẹro rẹ Jihova vwo ni evun ẹkpanrọ. Dede nẹ ọ dia owẹ yen cha chọn ohwo na uko vwọ kpanre evun na-a, wo rhe che roro nẹ wo vwobọ vwẹ umwemwu na vwẹ ẹro rẹ Jihova?—Eyanno 21:22-24.

17. Die yen sa chọn avwanre uko vwo brorhiẹn rọ cha vwerhen Jihova oma?

¹⁷ A da reyọ uchebro rẹ Baibol na vwo ruiruo, ka cha dia oka rẹ ihwo rẹ djisẹ rọyen vwẹ Hibru 5:14, ihwo “ri vwo ọhọ ri se vwo vughe emu esiri vẹ ọbrabra.” Nọ oma wẹn: ‘Me da reyọ iruo nana, ọ sa so ekprowọ kẹ ihwo efa? Iruo nana che mu vwe kpo ẹkuotọ ọfa vwo jẹ ọrivẹ mẹ yẹrẹ emọ mẹ vwo? Mavọ yen ọ che djobọte ayen wan?’

18. Diesorọ ọ sa vwọ dia bẹnbẹn ra vwọ tẹnrovi ẹga rẹ Jihova?

¹⁸ Vwẹ “ẹdẹ ebrabra” nana, ọ sa dia bẹnbẹn re vwo phi ẹga rẹ Jihova phiyọ ẹdia rẹsosuọ. (2 Timoti 3:1) Ọ lọhọre ra vwọ mrẹ iruo-o. Jẹ ofori nẹ a vwẹrote orua avwanre, ẹkẹvuọvo avwanre riẹnre nẹ ẹga rẹ avwanre yen cha dia emu rẹsosuọ. E jẹ ekuakua rẹ akpeyeren dia obo re ma ghanre vwẹ akpeyeren avwanre-e. (1 Timoti 6:9, 10) Ọtiọyena, mavọ yen e  se vwo “vughe obo ri yovwiri” yẹrẹ obo re ma ghanre, a me je vwẹrote orua avwanre?—Filipae 1:10.

19. Mavọ yen ẹroẹvwọsuọ rẹ Jihova sa vwọ chọn avwanre uko vwọ vwẹ ẹro abavo vwo ni iruo avwanre?

¹⁹ Vwẹroso Jihova kare kare. (Se Isẹ 3:5, 6.) Avwanre riẹnre nẹ Ọghẹnẹ riẹn obo ra ghene guọnọ dẹn, ọ je nabọ vwẹrote avwanre. (Une Rẹ Ejiro 37:25; 1 Pita 5:7) Baibol na da ta: “Si oma wẹn nẹ urhuru si vwe rẹ igho, jẹn obo ri wo vwori da wẹ ẹro; kidie [Ọghẹnẹ] tarọ nure nẹ, Me sa phiẹn wẹ-ẹ eyẹ me sa sen wẹ-ẹ.” (Hibru 13:5) Jihova guọnọre nẹ avwanre ro ẹnwan ọkieje kpahen obo ra sa vwọ vwẹrote orua avwanre-e. Ọkieje yen o vwo dje kẹ avwanre nẹ o se ru edavwẹ rẹ avwanre. (Matiu 6:25-32) O toro oborẹ iruo avwanre hepha-a, avwanre yono Ota rẹ Ọghẹnẹ kọke kọke, ruiruo aghwoghwo na, ji kpo uyono ọkieje.—Matiu 24:14; Hibru 10:24, 25.

20. Mavọ yen e se vwo yeren akpọ ri kekpe?

²⁰ Tẹnrovi orọnvwọn vuọvo. (Se Matiu 6:22, 23.) Ọnana mudiaphiyọ nẹ wo yeren akpọ ri kekpe rere wọ sa vwọ tẹnrovi ẹga rẹ Jihova. Avwanre riẹnre nẹ ọ cha dia emu rẹ ẹkpa e de phi igho vẹ ekuakua rẹ akpeyeren phiyọ ẹdia rẹsosuọ vwọ vrẹ oyerinkugbe rẹ avwanre vẹ Jihova. Ọtiọyena, die yen sa chọn avwanre uko vwo phi obo re ma ghanre phiyọ ẹdia rẹsosuọ? E jẹ a kẹnoma kẹ esa. Ọ da dianẹ wọ riosa rẹ ohwo, vwo omamọ ọrhuẹrẹphiyotọ wọ vwọ hwa. E rhe nomaso-o, ekuakua rẹ akpeyeren sa reyọ ọke vẹ ẹgba rẹ avwanre, a rha cha mrẹ ọke vwọ nẹrhovwo, ru uyono, yẹrẹ kpo aghwoghwo-o. Ukperẹ a vwọ  reyọ ekuakua rẹ akpeyeren vwo gidi oma avwanre, e jẹ e vwo ẹwẹn rẹ otekẹvwẹ siẹrẹ e “de vwo emuọre ra da rha mrẹ emwa vwo rhuo.” (1 Timoti 6:8) Vwẹ kẹdia kẹdia eje, ofori nẹ a fuẹrẹn oma avwanre ni kọke kọke a sa vwọ mrẹ ẹdia re de se ru yovwinphiyọ vwẹ ẹga rẹ Jihova.

21. Diesorọ o vwo fo nẹ a riẹn obo re che phi phiyọ ẹdia rẹsosuọ vwẹ akpeyeren avwanre?

²¹ Phi erọnvwọn re ma ghanre phiyọ ẹdia rẹsosuọ. E jẹ a vwẹ ọke, ẹgba, kugbe ekuakua rẹ avwanre  vwori vwo ruiruo vwẹ idjerhe aghwanre. E rhe nomaso-o, erọnvwọn ri fiemu-u sa reyọ ọke rẹ avwanre; kerẹ ẹbe eyono yẹrẹ igho. Jesu da ta: “Gba ka guọnọ uvie rẹ Ọghẹnẹ tavwe.” (Matiu 6:33) Avwanre sa riẹn obo re phi phiyọ ẹdia rẹsosuọ vwẹ ubiudu avwanre womarẹ orhiẹn-ebro vẹ uruemu rẹ avwanre, obo re ruẹ vẹ obo ra vwọ tua.

22, 23. (a) Iruo vọ yen ma ghanre kparobọ kẹ Inenikristi? (b) Die yen cha nẹrhẹ avwanre riavwerhen rẹ iruo rẹ avwanre?

²² Iruo rọ ma ghanre rẹ avwanre vwori ọyen ra vwọ ga Jihova ji ghwoghwo iyẹnrẹn esiri na. (Matiu 24:14; 28:19, 20) Kerẹ Jesu, avwanre guọnọ vwẹ ẹgba rẹ avwanre eje vwo ruiruo na. Iniọvo evo kua kpo asan ra da ma guọnọ ukẹcha. Efa yono ejajẹ kpokpọ rere ayen se vwo ghwoghwo ota kẹ ihwo re jẹ ejajẹ ọfa. Riẹnmie ihwo ri ru ọtiọyen jovwo re, wọ je nọ ayen kpahọn. Ayen cha vuẹ wẹ nẹ oma nabọ vwerhen ayen enẹna.—Se Isẹ 10:22.

²³ Nonẹna, buebun rẹ avwanre ghwọrọ ọke ogrongron phiyọ iruo ọvo yẹrẹ vwẹ iruo sansan rere a sa vwọ vwẹrote orua rẹ avwanre. Jihova mrẹ ọnana, o che bruba ẹgbaẹdavwọn rẹ avwanre vwọ vwẹrote orua rẹ avwanre. Ọtiọyena, e jẹ avwanre vwẹrokere Jihova vẹ Jesu vwọ dia egbowian, o toro iruo rẹ avwanre ruẹ-ẹ. E gbe jẹ avwanre karophiyọ nẹ iruo rọ ma ghanre kparobọ ọyen ra vwọ ga Jihova ji ghwoghwo iyẹnrẹn esiri rẹ Uvie rẹ Ọghẹnẹ. Ọnana cha ghwa uvi rẹ omavwerhovwẹn rhe avwanre.