1, 2. Diesorọ o vwo fo nẹ a jomaotọ sane erọnvwọn ra vwọ diotọ?

VWẸ ẹwẹn roro nẹ wọ guọnọ re omamọ ọvo, wo de noso nẹ asan ọvo gbonri vwẹ omamọ na. Die wo che ru? Wọ cha riọ ghene? Wo che do kufia? Gbanẹ wo che bru asan ro gbonri na no, wọ me re asan ro yovwirin na?

² Vwẹ idjerhe vuọvo na, erọnvwọn ra vwọ diotọ họhọ omamọ yena. A sa riavwerhen rẹ evo, ẹkẹvuọvo, buebun rayen gbonri kidie e vọnre vẹ ọfanrhiẹn,  ozighi, yẹrẹ uruemu rẹ orhan. Ọtiọyena, wọ da sane erọnvwọn ra vwọ diotọ, wọ tanẹ: “O te ohwo vuọvo-o, me sa sane ọ ro je vwe”? Gbanẹ wọ tanẹ: “Ejobi brare”? Gbanẹ wọ jomaotọ sane erọnvwọn ra vwọ diotọ rere wọ sa vwọ kẹnoma kẹ e re brare wọ me je riavwerhen rẹ i ri yovwirin?

3. Die yen ofori nẹ e roro kpahen siẹrẹ a da sane erọnvwọn ra vwọ diotọ?

³ Avwanre se vwo vwobọ vwẹ ehẹha vẹ erọnvwọn ra vwọ diotọ ọke evo, o ji fo nẹ a nabọ sane ayen. Ofori nẹ a nọ oma avwanre oborẹ erọnvwọn nana se vwo djobọte ẹga rẹ avwanre vwọ kẹ Jihova.

4. Uchebro rẹ Baibol vọ yen sa chọn avwanre uko vwọ sane erọnvwọn ra vwọ diotọ?

⁴ Ọke avwanre vwọ vwomakpahotọ kẹ Jihova, e de ve kẹ nẹ a cha ga vwẹ akpeyeren avwanre eje. (Se Aghwoghwo 5:4.) Avwanre veri nẹ e che ru emu “ejobi vwọ kẹ urinrin rẹ Ọghẹnẹ.” (1 Kọrẹnt 10:31) Ọnana mudiaphiyọ nẹ avwanre vwomakpahotọ kẹ Ọghẹnẹ tobọ vwẹ ọke rẹ omaerovwon yẹrẹ a da diotọ, ọ ghwa dia vwevunrẹ uyono yẹrẹ aghwoghwo ọvo-o.

5. Oka rẹ ẹga vọ yen ofori nẹ a vwọ kẹ Jihova?

⁵ Kemu kemu rẹ avwanre ruẹ vwẹ akpeyeren churobọ si ẹga rẹ Jihova. Pọl dje ọnana fiotọ rọ vwọ ta: “Vwẹ oma rẹ ovwan ze izobo ọkpokpọ, rọ fọnro ro fo ẹreyọ kẹ Ọghẹnẹ.” (Rom 12:1) Jesu da ta: “Wọ me vwẹ udu wẹn ejobi guọnọ Ọrovwohwo Ọghẹnẹ vwẹ ẹnwẹn wẹn ejobi, kugbe iroro wẹn ejobi ji kugbe  ogangan wẹn ejobi.” (Mak 12:30) Avwanre guọnọ vwẹ obo ri me yovwin ri rhe avwanre vwọ kẹ Jihova. Vwẹ ọke rẹ awanre, ihwo rẹ Izrẹl de che ze izobo, eranvwe ro vwo oka-a yen Jihova guọnọ mie ayen. Eranvwe na de vwo oka, Jihova kọ siọn. (Livitikọs 22:18-20) Jihova je sa sen ẹga rẹ avwanre. Vwẹ idjerhe vọ?

6, 7. Mavọ yen erọnvwọn ra vwọ diotọ se vwo djobọte ẹga rẹ avwanre?

⁶ Jihova da vuẹ avwanre: “Ovwan ke fon, kidie me fonro.” (1 Pita 1:14-16; 2 Pita 3:11) Jihova che rhiabọreyọ ẹga rẹ avwanre siẹrẹ ọ da fon. (Urhi Rivẹ 15:21) Ẹga rẹ avwanre cha dia gbegbe siẹrẹ e de ru obo ri tu Jihova oma kerẹ erọnvwọn ri churobọ si ọfanrhiẹn, ozighi, yẹrẹ uruemu rẹ orhan. (Rom 6:12-14; 8:13) Ivun ji che miovwo Jihova siẹrẹ a da vwẹ erọnvwọn nana vwọ diotọ. Ọnana sa nẹrhẹ ẹga rẹ avwanre dia gbegbe vwẹ obaro rẹ Jihova, o mi ji miovwo oyerinkugbe rẹ avwanre vẹ ọ rọyen.

⁷ Ọtiọyena, mavọ yen avwanre sa vwọ vwẹ aghwanre vwọ sane erọnvwọn ra vwọ diotọ? Odjekẹ rẹ Baibol vọ yen cha vwẹ ukẹcha kẹ avwanre vwo vughe i ri yovwirin vẹ e re brare?

8, 9. Oka rẹ erọnvwọn ra vwọ diotọ vọ yen ofori nẹ a kẹnoma kẹ? Kẹ diesorọ?

⁸ Erọnvwọn ra vwọ diotọ sansan yen herọ. Evo shephiyọ vwọ kẹ Inenikristi, ẹkẹvuọvo buebun rayen shephiyọ-ọ. Ẹsosuọ, e jẹ e vughe erọnvwọn ra vwọ diotọ ro fori nẹ a kẹnoma kẹ.

 ⁹ Buebun rẹ ifimu, wẹbsaiti, ughe efa re nẹ vwẹ itẹlivishọni, ividio gemu, kugbe ine vọnre vẹ ọfanrhiẹn, ozighi, yẹrẹ uruemu rẹ orhan. A vwẹ erọnvwọn ebrabra vwọphia a me hwẹ phiyọ ayen kerẹsiẹ a da mrẹ nẹ e brare-e. Ẹkẹvuọvo, ofori nẹ Inenikristi sen erọnvwọn ra vwọ diotọ re vwọso irhi rẹ Jihova. (Iruo Rẹ Iyinkọn Na 15:28, 29; 1 Kọrẹnt 6:9, 10) E de ru ọtiọyen, jẹ avwanre dje kẹ Jihova nẹ e vwo utuoma rẹ obo re brare.—Une Rẹ Ejiro 34:14; Rom 12:9.

10. Die yen se norhe siẹrẹ e de vwobọ vwẹ erọnvwọn ra vwọ diotọ re brare?

¹⁰ Ẹkẹvuọvo, ihwo evo roro nẹ erọnvwọn ra vwọ diotọ ri churobọ si ozighi, ọfanrhiẹn, yẹrẹ uruemu rẹ orhan brare-e. Ayen sa ta: ‘Die yen chọre? Mi che se ru erọnvwọn yena-a.’ E de roro ọtiọyen, jẹ avwanre phiẹn oma rẹ avwanre. Baibol na da ta: “Udu rẹ ohwo ọ vọnre vẹ ophiẹvwe gangan o miovwiri gangan.” (Jerimaya 17:9) Avwanre da reyọ erọnvwọn rẹ Jihova vwo utuoma kpahen vwọ diotọ, mavọ yen avwanre sa vwọ tanẹ e vwo utuoma kpahen erọnvwọn nana? E de rhiabọreyọ ayen ọkieje, ke che no nẹ e ghwa bra-a. Ọke vwọ yanran na, ẹwẹn obrorhiẹn rẹ avwanre kọ cha vwiẹrẹ, o rhe che si avwanre orhọ kpahen umiovwo-o.—Une Rẹ Ejiro 119:70; 1 Timoti 4:1, 2.

11. Mavọ yen Galesha 6:7 sa vwọ chọn avwanre uko vwọ sane erọnvwọn ra vwọ diotọ?

¹¹ Baibol na da ta: “Okankọn kẹ okankọn re ohwo kọnre, ọye o ji che vun.” (Galesha 6:7) Vwọrẹ uyota, a da vwẹ erọnvwọn re brare vwọ diotọ, e che ru ayen ẹdẹ ọvo. Kerẹ udje, ihwo evo vwẹ erọnvwọn ri titi  ọfanrhiẹn vwọ diotọ te ẹdia rẹ ayen de rhi gbe ọfanrhiẹn. Ẹkẹvuọvo, Jihova chọn avwanre uko rere a sa vwọ sane erọnvwọn ra vwọ diotọ.

12. Die yen cha chọn avwanre uko vwo bru omamọ rẹ orhiẹn kpahen erọnvwọn ra vwọ diotọ?

¹² Vwẹ ẹdia evo, ọ pha lọlọhọ ra vwọ riẹn erọnvwọn ra vwọ diotọ rẹ Jihova vwo utuoma kpahen, avwanre je riẹn nẹ ofori nẹ a kẹnoma kẹ ayen. Ẹkẹvuọvo, ọ ghwa dia lọlọhọ vwẹ ẹdia efa-a. Jihova ghwe ji urhi kpahen ughe re che ni, obo ra cha kerhọ kẹ yẹrẹ obo re che se-e. Ukperẹ ọtiọyen, ọ guọnọre nẹ a vwẹ ẹwẹn obrorhiẹn ra vwẹ Baibol vwo yono vwo ruiruo. (Se Galesha 6:5.) Jihova vwẹ odjekẹ kẹ avwanre rọ nẹrhẹ a riẹn ẹro ro vwo nẹ emu. Odjekẹ rọyen na yen chọn avwanre uko vwo yono ẹwẹn obrorhiẹn rẹ avwanre. Ọ nẹrhẹ a riẹn “obo rẹ ọhọre rẹ Ọrovwohwo epha” e se vwo brorhiẹn rọ cha nẹrhẹ oma vwerhọn.—Ẹfesọs 5:17.

13. Diesorọ orhiẹn-ebro rẹ Inenikristi kpahen erọnvwọn ra vwọ diotọ vwọ fẹnẹ ohwohwo? Ẹkẹvuọvo, die yen ma ghanre kẹ Inenikristi eje?

¹³ Ọke buebun, oborẹ Onenikristi ọvo vwọ diotọ sa fẹnẹ ọ rẹ Onenikristi ọfa. Diesorọ? Kidie obo ri je avwanre fẹnẹ ohwohwo. Vwọba, oborẹ ohwo ọvo rhiabọreyọ sa fẹnẹ ọ rẹ ohwo ọfa. Dedena, ofori nẹ uchebro rẹ Baibol na sun Inenikristi eje ayen se vwo bru omamọ rẹ orhiẹn. (Filipae 1:9) Enana cha chọn avwanre uko vwọ sane erọnvwọn ra vwọ diotọ rẹ Jihova rhiabọreyọ.—Une Rẹ Ejiro 119:11, 129; 1 Pita 2:16.

14. (a) Die yen ofori nẹ e niso kpahen oborẹ avwanre ghwọrọ ọke wan? (b) Uchebro vọ yen Pọl vwọ kẹ Inenikristi?

 ¹⁴ Orọnvwọn ọfa rẹ avwanre che roro kpahen yen uchọke ra ghwọrọ phiyọ erọnvwọn ra vwọ diotọ. Ọnana se dje oborẹ erọnvwọn nana ghanre te kẹ avwanre. Kerẹ Inenikristi, ẹga rẹ Jihova yen ma ghanre vwọ kẹ avwanre. (Se Matiu 6:33.) Jẹ e rhe nomaso-o, erọnvwọn ra vwọ diotọ sa reyọ ọke buebun mie avwanre. Pọl da vwẹ uchebro kẹ Inenikristi: “Wa nabọ nite obo rẹ ovwan yan, we muẹ yan djidji-i ẹkẹvuọvo kerẹ evwaghwanre, we kuẹ ọke fia-a.” (Ẹfesọs 5:15, 16) Ọtiọyena, ofori nẹ a jomaotọ  kpahen uchọke ra ghwọrọ phiyọ erọnvwọn ra vwọ diotọ, rere e phi ẹga rẹ Jihova phiyọ ẹdia rẹsosuọ vwẹ akpeyeren rẹ avwanre.—Filipae 1:10.

15. Mavọ yen avwanre sa vwọ sẹro rẹ oma avwanre vwo nẹ erọnvwọn ri se miovwo oyerinkugbe rẹ avwanre vẹ Jihova?

¹⁵ Vwọrẹ uyota, ofori nẹ a sen erọnvwọn ra vwọ diotọ ri tu Jihova oma. Ẹkẹvuọvo, kẹ erọnvwọn ra vwọ diotọ rẹ avwanre vwo ẹwẹn ivivẹ kpahen vwo? O ji fo nẹ a jomaotọ? Di roro. Wọ da yan vwẹ enu rẹ ugbenu, wo che sikẹrẹ ọkọkọ rọyen mamọ? Ẹjo. Wo de ni arhọ wẹn ghanghanre, wo che bi sheri vwọ kẹ imuoshọ. Ọtiọyen erọnvwọn ra vwọ diotọ je hepha. Baibol na da ta: “Si awọ wẹn nẹ emu omiomiovwi.” (Isẹ 4:25-27) Ọtiọyena, ọ dia erọnvwọn ra vwọ diotọ rẹ avwanre riẹnre nẹ e brare ọvo yen a cha kẹnoma kẹ-ẹ, ẹkẹvuọvo a je cha kẹnoma kẹ e rẹ avwanre vwo ẹwẹn roro nẹ e sa bra kẹ avwanre ji miovwo oyerinkugbe rẹ avwanre vẹ Jihova.

16. (a) Erhọ yen iruemu evo rẹ Jihova vwo utuoma kpahen? (b) Mavọ yen e se vwo djephia nẹ avwanre vwo utuoma kpahen obo ri tu Jihova oma?

¹⁶ Ọbuine na de si: “Ọrovwohwo guọnọ ihwo ri tuoma rẹ umwemwu.” (Une Rẹ Ejiro 97:10) Baibol na vwẹ ukẹcha kẹ avwanre vwọ riẹn iroro rẹ Jihova. Nọ oma wẹn: ‘Mavọ yen obo mi yono na sa vwọ chọn vwẹ uko vwo ni ẹrọnvwọn kirobo rẹ Jihova ni ayen?’ Kerẹ udje, avwanre yonori nẹ o vwo utuoma kpahen “ẹrẹnvwe rọ vwọrọn efian, vẹ abọ ri sun ọbara ekueku, udu ro roro iroro umwemwu, awọ re djẹ ugbonẹ rẹ umwemwu eruo.” (Isẹ 6:16-19) Avwanre  ji yono nẹ a kẹnoma kẹ “igberadja, ọfanrhiẹ rẹ ehware, . . . edjọ ẹgọ, orhan, . . . ophuemuo, . . . omaẹriọ, ozighẹ, idi ẹda, udu ọgangan, kugbe uruemu efa etieye na.” (Galesha 5:19-21) Wọ mrẹ oborẹ ẹkpo rẹ Baibol nana sa vwọ chọn wẹ uko vwọ sane erọnvwọn ra vwọ diotọ? Ofori nẹ a yọnrọn irhi rẹ Jihova ọkieje, vwevunrẹ ehoho yẹrẹ azagba. (2 Kọrẹnt 3:18) Vwọrẹ uyota, orhiẹn rẹ avwanre bruru vwẹ ehoho ọyen me dje oka rẹ ohwo rẹ avwanre ghene hepha.—Une Rẹ Ejiro 11:4; 16:8.

17. Tavwen a ke sane erọnvwọn ra vwọ diotọ, enọ vọ yen ofori nẹ a nọ oma avwanre?

¹⁷ Ọtiọyena, wọ da sane erọnvwọn ra vwọ diotọ, gba nọ oma wẹn: ‘Mavọ yen ojẹ mẹ se vwo djobọte oyerinkugbe mẹ vẹ Jihova? Mavọ yen o se vwo djobọte ẹwẹn obrorhiẹn mẹ?’ E jẹ a fuẹrẹn uchebro efa re sa chọn avwanre uko siẹrẹ a da sane erọnvwọn ra vwọ diotọ.

18, 19. (a) Uchebro vọ yen Pọl vwọ kẹ Inenikristi? (b) Odjekẹ vọ yen sa chọn avwanre uko vwọ sane erọnvwọn ra vwọ diotọ?

¹⁸ Ofori nẹ a nabọ sane erọnvwọn ra vwọ diotọ, kidie oborẹ avwanre sanere yen cha dia ẹwẹn rẹ avwanre. Pọl de si: “Emu ejobi rọ dia uyota, emu ejobi ro vwo ọghọ, emu ejobi rọ dia ọsoso, emu ro yovwiri, emu ejobi ro vwo ẹguọnọ, emu ejobi ro vwo erhuvwu, ọ da dianẹ o vwo uyoyovwi, ọ da dianẹ o vwo obo ro fo ejiro, gbe roro imu nana.” (Filipae 4:8) Siẹrẹ avwanre de roro kpahen erọnvwọn nana ọkieje, avwanre ke sa ta: “Gbe jẹ eta rẹ unu mẹ kugbe umẹ rẹ udu mẹ, i fo ẹreyọ vwẹ obaro wẹn, E Ọrovwohwo.”—Une Rẹ Ejiro 19:14.

 ¹⁹ Nọ oma wẹn: ‘Die mi phiẹ phiyọ ẹwẹn mẹ? Mi de ni ifimu yẹrẹ ughe ọvo nu, ẹwẹn mẹ nabọ totọ vẹ omavwerhovwẹn? Me mrẹ ufuoma vwẹ ubiudu mẹ, mi ji vwo omamọ rẹ ẹwẹn obrorhiẹn? (Ẹfesọs 5:5; 1 Timoti 1:5, 19) Me sa je nẹrhovwo kẹ Jihova odedede? Gbanẹ mi muomaphiyọ? Ọ nẹrhẹ mi roro kpahen ozighi yẹrẹ ọfanrhiẹn? (Matiu 12:33; Mak 7:20-23) Erọnvwọn ra vwọ diotọ na nẹrhẹ mi “hirhe oma phihọ ohwo rẹ akpọ nana”?’ (Rom 12:2) Obọdẹn rẹ ẹkpahọnphiyọ rẹ avwanre vwọ kẹ enọ nana sa vwẹ ukẹcha kẹ avwanre vwọ riẹn obo ro fori nẹ e ru e se vwo ru oyerinkugbe rẹ avwanre vẹ Jihova gan. E jẹ a nẹrhovwo kerẹ ọbuine na: “Rhẹriẹ ẹro mẹ rere o vwo jẹ ogbegbemrẹ e no.” *—Une Rẹ Ejiro 119:37.

20, 21. Diesorọ o vwo fo nẹ e roro kpahen ẹwẹn obrorhiẹn rẹ ihwo efa siẹrẹ a da sane erọnvwọn ra vwọ diotọ?

²⁰ Ẹkpo ọghanghanre ọfa re che phiyọ ẹwẹn kẹ ọna: “Emu na ejobi wan urhi, ẹkẹvuọvo emu na sa vwẹ ẹruọ kẹ ohwo-o. E jẹn ohwo ọvuọvo guọnọ erhuvwu rẹ oma rọye-e, ẹkẹvuọvo erhuvwu rẹ ọrivẹ rọye.” (1 Kọrẹnt 10:23, 24) Ọ dia e de ghwe vwo egbomọphẹ re vwo ru orọnvwọn ke ghwe ruo-o. Ofori nẹ a nabọ roro kpahen oborẹ orhiẹn na che djobọte iniọvo na wan.

²¹ Ẹwẹn obrorhiẹn rẹ ihwo eje dia ọvo-o. Kerẹ udje, ẹwẹn obrorhiẹn wẹn sa rhọnvwe nẹ wo ni ughe  ọvo vwẹ itẹlivishọni. Ẹkẹvuọvo, wọ sa mrẹvughe nẹ ughe yena kpokpo ẹwẹn obrorhiẹn rẹ iniọvo efa. Die wo che ru? Dede nẹ wo vwo egbomọphẹ wo vwo no, wo se brorhiẹn nẹ wo che no-o. Diesorọ? Kidie wo de ru ọtiọyen jẹ wo “ru umwemwu kpahe omoni wẹn,” wọ je tobọ “ru umwemwu kpahe Kristi.” (1 Kọrẹnt 8:12) Ofori nẹ a kẹnoma kẹ kemu kemu rọ cha dia ikprowọ kẹ iniọvo avwanre.—Rom 14:1; 15:1; 1 Kọrẹnt 10:32.

22. Mavọ yen e se vwo vwo iroro abavo kpahen ojẹ rẹ Inenikristi efa?

²² Ọ da rha dianẹ ẹwẹn obrorhiẹn rẹ ohwo ọvo rhọnvwephiyọ nẹ o vwobọ vwẹ orọnvwọn ra vwọ diotọ ọvo rẹ ẹwẹn obrorhiẹn wẹn vwọso vwo? Fikirẹ ẹguọnọ wo vwo kpahen oniọvo wẹn, wọ cha gba vwọ rhọnvwephiyọ obo wọ guọnọre-e. Ohwo rọ djẹ imoto riẹnre nẹ ihwo efa je nabọ riẹn djẹ, dede nẹ evo sa djẹ wanvrẹ, ọ je sa djẹ vrẹ efa. Vwẹ idjerhe vuọvo na, wẹ vẹ oniọvo ọfa se ji nene odjekẹ rẹ Baibol na, dede nẹ ojẹ rẹ ovwan kpahen erọnvwọn ra vwọ diotọ sa fẹnẹ ohwohwo.—Aghwoghwo 7:16; Filipae 4:5.

23. Die yen cha chọn avwanre uko vwọ nabọ sane erọnvwọn ra vwọ diotọ?

²³ Ọtiọyena, die yen cha chọn avwanre uko vwọ nabọ sane erọnvwọn ra vwọ diotọ? Avwanre che bru omamọ orhiẹn siẹrẹ e de vwo ẹguọnọ rẹ iniọvo rẹ avwanre je reyọ ẹwẹn obrorhiẹn rẹ avwanre re yonori womarẹ Baibol na vwo ruiruo. Ọke yena, oma kọ cha vwerhen avwanre nẹ e “ru [emu] ejobi vwọ kẹ urinrin rẹ Ọghẹnẹ.”