1. Die yen ofori nẹ avwanre ru oma vwọ vwerhen Ọghẹnẹ?

AVWANRE da guọnọ vwo omamọ rẹ oyerinkugbe vẹ Ọghẹnẹ, ko fori nẹ avwanre siobọ nẹ ẹga refian. Avwanre me vwomaba ẹga ruyota na. Iduduru rihwo buebun ruẹ ọtiọyen asaọkiephana.

2. Tivọ yẹn a da sa mrẹ Iseri ri Jihova? Die yen ayen ruẹ?

² Baibol na tare nẹ ihwo re ga ẹga ruyota na yehẹ “urogho rẹ ihwo buebun” ri nẹ “kẹgborho kẹgborho rhe, rẹ orua ejobi kugbe ihwo kugbe ephẹrẹ rhe.” (Ẹvwọphia 7:⁠9) Iseri ri Jihova chọn ihwo uko vwo yono vwọ kpahen idjerhe ri Jihova kugbe obo rọ guọnọ mie avwanre, vwẹ ibrotọ ri te omarẹ 239.

3. Ono yẹn Iseri ri Jihova ga, kẹ oka rẹ ẹga vọ yẹn ayen kẹnoma kẹ?

³ Iseri ri Jihova mrẹ vughe nẹ Jihova ọvo yen ohwo ro fori nẹ a vwẹ ẹga kẹ. Ayen nuẹ uyovwin kpotọ kẹ ema yẹrẹ ihoho-o. (1 Jọn 5:​21) Ayen gbe phiyẹ orivwin hrọke-e. Ayen je vwobọ vwẹ erẹ efa ri titi “uyono rẹ efian rẹ idẹbono” vẹ ẹga refia-an. (1 Timoti 4:⁠1) Ẹkẹvuọvo ayen reyẹ uve rẹ Ọghẹnẹ ro shekpahen evrẹnushi kugbe paradaisi vwọ nẹrhẹ otu rẹ ihwo rayen ghwuru.​—Jọn 5:28, 29; Iruo 24:15.

4. Ẹro vọ yẹn idibo rẹ Ọghẹnẹ vwo nẹ majiki?

⁴ Iseri ri Jihova vwobọ vwẹ majiki, epha-ẹbọ yẹrẹ orha-an, keridie ayen riẹnre nẹ erọnvwọn nana nẹ obọ rẹ Idẹbono rhe. Jihọva yen ayen vwẹroso, ọ diẹ ẹgba rẹ majiki-i.​—Isẹ 18:10.

5. Idjerhe vọ yẹn Iseri ri Jihova vwo jẹ “e rẹ akpọ” na ẹ dia?

⁵ Jesu tare nẹ idibo rọyen “dia e rẹ akpọ na-a.” (Jọn 17:16) Ọke rẹ Jesu vwọ hẹ otorakpọ na, ọ rhọnvwe vwobọ vwẹ oseghe rusuo-on. (Jọn 6:​15) Ọtiọyena, Iseri ri Jihova ji vwobọ vwẹ oseghe rusuo-on, ayen titi ẹkuotọ rayen vrẹ ẹkuotọ efa-a, ayen je vwọ tua ẹdia ride rẹ akpọ na-a. Ẹkẹvuọvo, ayen hwosa ruyovwin, ayen je mwọghọ kẹ irhi rẹ ẹkuotọ rẹ ayen dia.​—Jọn 15:19; Rom 13:1, 7.

6. Irhi vọ ri shekpahen orọnvwe vẹ orọnvwe ẹfan yen idibo rẹ Ọghẹnẹ nene?

⁶ Keridie nẹ Iseri ri Jihova mwọghọ kẹ ihwo ri suẹn, kẹ ayen ruẹ orọnvwe rayen vwo nene urhi rẹ ẹkuotọ na. (Titọs 3:⁠1) Ayen ji mwọghọ kẹ irhi rẹ Ọghẹnẹ, ọtiọyena ayen rọvwọn vrẹ aye ọvo-o. (1 Timoti 3:⁠2) Vwọba, rọvwọ dianẹ ayen yeren akpọ nene irhi ri Baibol na, ayen rhe mwẹ orọnvwe fa-an.

7. Idjerhe vọ yẹn Iseri ri Jihova vwo dje ẹguọnọ phia vwọ kẹ ohwohwo?

⁷ Iseri ri Jihova vwo ẹguọnọ kpahen ohwohwo. Ẹguọnọ nana vẹ ọ rẹ ayen vwo kpahen Ọghẹnẹ, kọyen nẹrhẹ ayen vwo omamọ oyerinkugbe kerẹ ihwo rẹ orua ọvuọvo dedevwo nẹ ayen nẹ ejajẹ vẹ ẹkuotọ sansan rhe. Ọke rẹ emu da phia kẹ ihwo yẹrẹ vwẹ ọke ra da guọnọ ukẹcha, Iseri ri Jihova chọn ohwohwo uko kpakpata. Ayen dje ẹguọnọ phia womarẹ obo rẹ ayen yeren akpọ wan.​—⁠Jọn 13:35.

8. Iruemu ebrabra vọ yen ihwo rẹ Ọghẹnẹ kẹnoma kẹ?

⁸ Idibo ri Jihova davwẹngba mamọ ayen sa vwọ dia ihwo ruyota. Ayen kẹnoma kẹ uji-echo, ofian-eguon, ọfanrhiẹn, idiẹda vroma, kugbe eki rẹ ọghware. Eshare ji hwe eya raye-en. Evo ke vwobọ vwẹ iruemu nana tavwen ayen ke rhe diẹ Iseri ri Jihova, ẹkẹvuọvo Jihova da chọn ayen uko vwo wene. E de ru ayen “fon” vwẹ obaro rẹ Ọghẹnẹ.​—1 Kọrẹnt 6:9-11.

9. Die yen ọbe ọvo ta kpahen ishọshi re mraro rehẹ Africa?

⁹ Ẹga buebun roro nẹ ayen vwo uyota na. Ayen ta nẹ igbevwunu rẹ ayen ruẹ dje ọnana phia. Kerẹ udje, vwọ kpahen ishọshi re mraro rehẹ Africa, ọbe ọvo da ta: “[Ishọshi rẹ ọke nana] reyẹ iruo mie ihwo re ruẹ majiki kugbe e re bọepha. . . . Ayen ta nẹ ayen mraro ji ruẹ igbevwunu. Emraro rehẹ uvwre rayen mrẹ emramrẹ je fan evwerhẹn. Ayen reyẹ ame, evwri, iwurhie, ikandoro vẹ igbuduma vwo sivwin ega rihwo.”

10, 11. Diesorọ igbevwunu rẹ ihwo ruẹ nonẹna che se djephia nẹ Ọghẹnẹ rhiabọreyọ ẹga raye-en?

¹⁰ Ihwo re kpẹ ẹga nana tare nẹ igbevwunu rẹ ayen ruẹ djerephia nẹ Ọghẹnẹ rhiabọreyẹ ẹga rayen. Ẹkẹvuọvo, ọ diẹ eyena yen e vwo vughe ẹga rẹ Jihova rhiabọreyọ-ọ. Eshu vwẹ ẹgba vwọ kẹ ihwoevo re ga ẹga refian rẹ ayen vwo ru ‘iruo rẹ igbevwunu.’ (2 Tẹsalonaika 2:⁠9) Baibol na tarọ nẹ iruo rẹ igbevwunu kerẹ aroẹmrẹ, ra vwọ jẹ ephẹrẹ sansan kugbe erianriẹn roghẹresan ri nẹ obọ rẹ Ọghẹnẹ rhe “cha wanvrẹn.​—1 Kọrẹnt 13:8.

¹¹ Jesu si avwanre orhọ nẹ: “Ọ dia ihwo ejobi ri se vwe Ọrovwohwo, Ọrovwohwo eyen se te uvie rẹ odjuvwu-u; jokpa rẹ ihwo ri ru ẹguọnọ rẹ Ọsẹ mẹ rọ hẹ obo odjuvwu. Ihwo buebun yen cha ta kẹ vwẹ vwẹ ẹdẹ yena nẹ, Ọrovwohwo, Orovwohwo, mi yono ihwo vwẹ odẹ wẹ-ẹn, me vwẹ odẹ wẹn djẹ idẹbono phia-a, me vwẹ odẹ wẹn ru iruo rẹ igbunu-u. Ki mi nyo kẹ ayen nẹ, mi vughe ovwa-an, we bi te oboyin, ovwan iruimwemwu na.”​—Matiu 7:21-23.

12. Amono yen cha ro Uvie rẹ Ọghẹnẹ?

¹² Amono yen cha ro Uvie rẹ Ọghẹnẹ? Ihwo ri ruẹ ọhọre ri Jihova yen cha ruọ.

13. Ọrhọ yehẹ iruo rẹ Ọghẹnẹ vuẹ ihwo rọyen nẹ ayen ru nonẹna, kẹ ihwo vọ yin ruiruo nana?

¹³ Die yehẹ ọhọre rẹ Ọghẹnẹ vwọ kẹ ihwo rọyen? Jesu tare nẹ: “Ka cha ta ota rẹ iyẹnrẹn esiri [rẹ uvie] na wan akpọ na ejobi, rere ọ vwọ dia iseri kẹ ẹgborho na ejobi: tavwen rẹ oba na ki rhi te.” (Matiu 24:14) Iseri ri Jihova ruiruo nana vẹ oruru.

14. Die yen Uvie rẹ Ọghẹnẹ, kẹ ihwo vọ yin che sun vwẹ Uvie na?

¹⁴ Vwẹ “akpọ na ejobi,” Iseri ri Jihova ghwoghwo Uvie rẹ Ọghẹnẹ rọ diẹ usuon rẹ ọvwata rọhẹ obodjuvwu ro che sun akpọ na eje. Ayen yono nẹ Jihova vwẹ Jesu Kristi vwo mwu Ovie rẹ Uvie yena, kugbe ihwo 144,000 ra sane nẹ akpọ na rhe ri che nene sun.​—Daniẹl 7:14, 18; Ẹvwọphia 14:1, 4.

15. Die yen Uvie na che si no?

¹⁵ Iseri ri Jihova vwẹ Baibol na vwo yono ihwo nẹ Ọghẹnẹ cha vwẹ Uvie rọyen vwọ ghwọrọ akpọ rẹ Idebono nana. Ẹga rẹ efian vẹ iyono rẹ Idẹbono eje cha wanvrẹ! (Ẹvwọphia 18:⁠8) Usuon rẹ akpọ na re vwọso Ọghẹnẹ ji che no riẹriẹriẹ!​—Daniẹl 2:44.

16. Ihwo vọ yen cha dia otọ rẹ usuon ri Jesu Kristi, kẹ tivọ yen ayen cha dia?

¹⁶ Vwọba, Iseri ri Jihova ji ghwoghwo nẹ Jesu Kristi che ku ebruphiyọ kuẹ ihwo ri ruẹ obo rẹ Ọghẹnẹ guọnọre. Kẹ ayen cha dia otọ rusuon rọyen vwẹ otọrakpọ na. Baibol na veri nẹ: “O sivwin ọ rẹ akpọ bẹn vwẹ ọke ro de kperi se, ovwiogbere kugbe ohwo ro vwo ọchuko-o. Ọ re ehrọre rẹ ọvwiẹrẹ vẹ ọ rẹ akpọ bẹn, o mi sivwin arhọ rẹ ọ rẹ akpọ bẹn.”​—Une Rẹ Ejiro 72:12, 13.

17. Ihwo vọ yin ghwoghwo Uvie rẹ Ọghẹnẹ?

¹⁷ Vwọ vrẹ Iseri ri Jihova, o vwo ẹga ọfa ro ghwoghwo iyẹnrẹn esiri rẹ Uvie rẹ Ọghẹnẹ-ẹ. Ayen ọvo yen ihwo ri ghwoghwo Uvie na vwẹ akpọ na eje.