1. Orhiẹn vọ yen ihwo che bru rọ shekpahen ẹga?

JESU tare nẹ: “Ohwo rọ vẹ ọvwẹ hẹ obọ-ọ yọ vwọ so vwẹ.” (Matiu 12:30) Ohwo rọhẹ ẹbẹre ri Jihova-a, jẹ ọ hẹ ẹbẹre rẹ Idẹbono. Ihwo buebun roro nẹ Ọghẹnẹ rhọnvwe phiyẹ ẹga rayen, jẹ Baibol na tare nẹ Eshu ‘phiẹn akpọ na ejobi.’ (Ẹvwọphia 12:⁠9) Ayen vwo imwẹro nẹ ayen ga Ọghẹnẹ, ẹkẹvuọvo Eshu yen ayen ga! Kohwo kohwo yin che brorhiẹn rẹ ohwo rọ cha ga, sẹ Jihova rọ diẹ “Ọghẹnẹ rẹ uyota” na, yẹrẹ Idẹbono rọ diẹ “ọsẹ rẹ ofian.”​—Une Rẹ Ejiro 31:5; Jọn 8:44.

2. Ọrhọ yen idjerhe ọvo rẹ Eshu vwo kpokpo ihwo re guọnọ ga Jihova?

² Ọyena emu aghwanre re vwo brorhiẹn ravwọ ga Jihova, kidie ọ cha nẹrhẹ oma vwerhọn. Ẹkẹvuọvo ohwo da ga Ọghẹnẹ, oma vwerhen Eshu-u, ko kpokpo. Idjerhe ọvo ro vwo ruẹ ọnana, ọyen rọ vwọ sua omukpahen womarẹ igbeyan, ihwo rẹ orua kugbe ihwoefa. Jesu si avwanre orhọ nẹ: ‘Uwevwin rẹ ohwo ọyen ivwighrẹn rọyen hepha.’​—Matthew 10:36.

3. Siẹrẹ ihwo rẹ orua vẹ igbeyan wẹn da vwọso ẹga rẹ wọ vwọ kẹ Ọghẹnẹ, die wo che ru?

³ Siẹrẹ omukpahen ọtiọyen de te we oma, die wo che ru? Ihwo buebun riẹnre nẹ ẹga rayen chọre, dedena, ayen rhọvwan no-o. Ayen roro nẹ ayen de ru ọtiọyen, kọyen ayen siẹn orua rayen. Iroro yena gbare? Wọ da riẹn nẹ ihwo orua wẹn evo reyẹ ihuvwun egangan, wo rhe si  ayen orhọ kpahen imwoshọ rọ herọ? Wọ cha sa vwomaba ayen vwọ reyọ-ọ, ọ diẹ ọtiọyen?

4. Die yin Joshua vuẹ ihwo rẹ Izrẹl kpahen ẹga rayen?

⁴ Joshua vwẹ uchebro kẹ ihwo rẹ Izrẹl nẹ ayen siobọ nẹ irueru vẹ ẹga rẹ esẹ rayen re chọre. Ọ da ta: “Asakiephana wa gba djẹ oshọ rẹ Ọrovwohwo, wa vwẹ evun esiri kugbe uyota vwọ ga; siobọ nẹ edjọ rẹ esẹ rẹ ovwan gọre vwẹ obo ovrẹn rẹ Urhie na, kugbe Ijipt, re wa ga Ọrovwohwo na.” (Joshua 24:14) Joshua fuevun ga Ọghẹnẹ, Jihova de bruba kẹ. Avwanre da je fuevun ga Jihova, o ji che ku ebruphiyọ kuẹ avwanre​—2 Samuẹl 22:26.

5. Diesorọ avwanre vwọ guọghọ ekwakwa re vwo ruẹ majiki?

⁵ Re vwo vrẹn nẹ ẹga refian ji churobọ si ra vwọ guọghọ erọnvwọn re vwo ruẹ majiki rẹ avwanre vwori kerẹ inehweri, ekpọfia, ibiesa, igbene kugbe ekwakwa efa. Ọnana obo ro fori nẹ e ru, keridie o djephia nẹ avwanre vwẹroso Jihova.

6. Die yẹn Inene-ri-Kristi rẹ ọke awanre ruẹ ẹbe rẹ majiki rayen?

⁶ Roro kpahen obo rẹ Inene-ri-Kristi rẹ ọke awanre ruru ọkẹ rẹ ayen vwo brorhiẹn rẹ ayen vwọ ga ẹga ruyota. Baibol na da ta: “Buebun ri ruẹ egbẹlẹkẹ da ghwẹ ẹbe rayen koko a da torhẹ ayen vwẹ irharo rẹ ihwo ejobi.”​—Iruo 19:19.

7. Die yen e se ru siẹrẹ emekashe rẹ Idẹbono de kpokpo avwanre?

⁷ Emekashe rẹ Idẹbono se kpokpo ihwo ri vwobọ vwẹ orhan, epha-ẹbọ yẹrẹ majiki tavwen ayen ke rhe riẹn Jihova. Siẹrẹ wo de hirharo ku ẹdia ọtiọyen, kperi se odẹ ri Jihova vwọrẹ ẹrhovwo. Ọ cha chọnwuko.​—Isẹ 18:10; Jems 4:7.

8. Ẹro vọ yẹn Inene-ri-Kristi vwo nẹ erọnvwọn ri churobọ si ẹga refian kerẹ edjọ, ema yẹrẹ ifoto?

⁸ Ihwo re guọnọ ga Jihova ke kẹnoma kẹ erọnvwọn ri churobọ si ẹga refian kerẹ edjọ, ema yẹrẹ ifoto. ‘Kidie esegbuyota yẹn Inene-ri-Kristi ruyota vwọ yan, ọ dia orẹmrẹ-ẹ.’ (2 Kọrẹnt 5:⁠7) Ayen mwọghọ kẹ urhi rẹ Ọghẹnẹ rọ tare nẹ a vwẹ ẹga kẹ ema-a.​—Eyanno 20:4, 5.

9. Uchebro vọ yẹn Baibol na vwọ kẹ avwanre kpahen obo re se vwo vwo aghwanre?

⁹ Baibol na tare nẹ: “Ohwo rọ yan nene ẹvwaghwanre ko vwo aghwanre.” (Isẹ 13:20) Avwanre da guọnọ dia evwaghwanre, kẹ avwanre kuomakugbe Iseri ri Jihova. Eyehẹ ihwo re yan vwẹ idjerhe ro suẹn ohwo kpẹ arhọ ri bẹdẹ na.​—Matiu 7:14.

10. Idjerhe vọ yẹn Iseri ri Jihova sa vwọ chọnwuko vwọ ga Ọghẹnẹ?

¹⁰ Iseri ri Jihova vwo ọdavwẹ rẹ ihwo. Ayen chọn ihwo uko vwo vwo ẹruọ rẹ uyota ri Baibol na rọ sa nẹrhẹ ohwo vwo arhọ ri bẹdẹ. Ayen se nene uwe yono Baibol na ọphẹ. Ayen cha kpahenphiyọ enọ wẹn, ji dje obo rẹ wọ sa vwọ reyẹ erianriẹn ri Baibol na vwo ruiruo vwẹ akpeyeren wẹn.​—John 17:3.

11. Mavọ yẹn emẹvwa rẹ Inene-ri-Kristi sa vwọ chọnwuko?

¹¹ Wo che yono kpahen obo ri Jihova guọnọre vwẹ uyono rẹ ayen ruẹ vwẹ Oguan Ruvie rayen. Urhurhusivwe wo vwo kpahen ẹga ruyota kọ cha gan phiyọ. Ayen ji che yono uwe kpahen obo rẹ wọ sa vwọ chọn ihwoefa uko vwọ riẹn Baibol na.​—Hibru 10:24, 25.

12. Mavọ yen ẹrhovwo sa vwọ chọnwuko vwọ ga Ọghẹnẹ?

¹² Wo vwo yono kpahen ọhọre ri Jihova ye, ọdavwaro wẹn kpahen irhi rọyen ko che kodo phiyọ. Urhurhusivwe wo vwo ru obo rọ guọnọre je kẹnoma kẹ obo ro vwo utuoma kpahen, kọ je cha gan phiyọ.  Karophiyọ nẹ wọ sa nẹrhovwo rhe Jihova nẹ ọ chọnwuko vwo ru obo ri yovwirin je kẹnoma kẹ obo re brare.​—⁠1 Kọrẹnt 6:​9, 10; Filipae 4:⁠6.

13. Mavọ wo se vwo ru ubiudu ri Jihova ghọghọ?

¹³ Oyerinkugbe wẹn vẹ Ọghẹnẹ vwọ gan phiyọ ye, ko che mwu we vwọ vwomakpahotọ vwọ kẹ, ji bromaphiyame kerẹ Oseri ri Jihova. Oma kọ cha vwerhen Jihova keridie wọ rhe dia ọvo usun rẹ ihwo rọyen re. (Isẹ 27:11) Ku wọ cha dia ọvo usun rẹ ihwo rẹ omavwerhan, rẹ Ọghẹnẹ tota kpahen nẹ: “Ke me dia evun rẹ ayen ke me yan vwẹ ohri rẹ ayen, ke me dia Ọghẹnẹ rayen, ayen ke dia ihwo mẹ.”​—⁠2 Kọrẹnt 6:​16.