Diesorọ Eshu vẹ emekashe rọyen vwọ phiẹn ihwo? Ayen ruẹ ọtiọyen, kidie ayen je guọnọ nẹ avwanre vwọso Ọghẹnẹ. Ayen guọnọre nẹ avwanre ga ayen. Eshu vẹ emekashe rọyen guọnọre nẹ avwanre vwo imuẹro kpahen efian rayen, ji ru oborẹ Jihova vwo utuoma kpahen. Buebun rẹ erọnvwọn nana churobọ si ihwo ri ghwuru.

Ughwu rẹ ohwo re vwo ẹguọnọ kpahen miavwan ohwo oma mamọ, ọtiọyena ọ chọre siẹrẹ e de vwere uvweri-i. Ọke rẹ ugbeyan ri Jesu re se Lazarọs vwo ghwu, “Jesu da viẹ.”—Jọn 11:35.

Ẹkuruemu buebun herọ ri churobọ si ughwu, obo re ruẹ vwẹ orere ọvo fẹnẹ ọfa. Buebun rayen vwọso irhi ri Baibol na-a. O vwo evo rẹ ihwo ruẹ kidie ayen rorori nẹ ihwo ri ghwuru yerẹn vwẹ asan ọfa, ayen je mrẹ avwanre. Oshọ rẹ ihwo ri ghwuru yen nẹrhẹ ihwo gbe-hrọke, vwere uvweri ogrongron, ji ruẹ orivwin esho rọ pha reghereghe. Ẹkẹvuọvo, rọvwọ dianẹ ihwo ri ghwuru “riẹn emu ọvuọvo-o,” ihwo ri ruẹ emu ọtiọyena titi efian rẹ Eshu.—Aghwoghwo 9:5.

 Ihwo evo ruẹ orẹ kẹ ihwo ri ghwuru, kidie ayen vwo imuẹro nẹ ihwo ri ghwuru guọnọ ukẹcha rayen, nẹ e sa wan ayen oma siẹrẹ e rhe ruo kẹ aye-en. Vwẹ irere evo, siẹrẹ ohwo de ghwu, ihwo ruẹ orẹ yẹrẹ ze izobo, ẹdẹ 40 yẹrẹ ẹgbukpe ọvo da wan nu. Ayen rorori nẹ ọnana cha nẹrhẹ ohwo ro ghwuru na se ‘kpo’ orho erivwin egbẹrhẹnẹdẹ. Vwẹ irere efa, ihwo phi emu vẹ udi phiyọ ushi rẹ ihwo rayen ri ghwuru.

Erọnvwọn nana chọre, kidie ayen titi efian rẹ Eshu kpahen ihwo ri ghwuru. Jihova guọnọre nẹ avwanre vwobọ vwẹ ẹkuruemu ri churobọ si iyono rẹ emekashe rẹ Idẹbono? Ẹjo, kakaka!—2 Kọrẹnt 6:14-18.

Idibo rẹ Ọghẹnẹ rẹ uyota vwobọ vwẹ iruemu ri churobọ si efian rẹ Eshu-u. Ukperẹ ọtiọyen, ayen vwẹ ukẹcha vẹ onẹrhẹvwe vwọkẹ ihwo ri yerẹn. Ayen riẹnre nẹ Jihova ọvo yen sa chọn ohwo ro ghwuru uko.—Job 14:14, 15.

Ihwo evo nene emekashe rẹ Idẹbono tota yẹrẹ ayen brẹ eboepha ra. Ọnana uruemu rẹ orhan. Inehweri, majiki, ravwọ mraro kugbe re vwo nene irivwin tota, enana eje iruemu rẹ orhan.

Baibol na vwọso iruemu nana, rọ vwọ ta: “We ja mrẹ ohwo vwẹ uherevie rẹ ovwan . . . rọ mraro-o, eyẹ ọboepha eyẹ ohwo rọ mrorẹ eyẹ ọbo rọ ghwa ihwo ria, eyẹ ohwo ro ruẹ inehweri, eyẹ ohwo ro nene irivwin ta ota eyẹ ọrieda, eyẹ ohwo ro hrẹn. Kidie ohwo ro ru imu nana yo gbe ẹgua rẹ Ọrovwohwo, fikirẹ uruemu rẹ ẹgua ọyen Ọrovwohwo rẹ Ọghẹnẹ wẹn vwọ djẹ ayen nẹ obaro rẹ ovwan.”—Urhi Rivẹ 18:10-12.

Diesorọ Jihova vwo si avwanre orhọn kpahen iruemu nana?

 Fikirẹ erhuvwu rẹ avwanre, ọyen sorọ Jihova vwo si avwanre orhọn nẹ a kẹnoma kẹ iruemu rẹ orhan eje. O vwo ẹguọnọ rẹ ihwo rọyen, ọ riẹnre nẹ ihwo ri nene emekashe rẹ Idẹbono ruẹ kuẹgbe cha rioja.

Ohwo ọvo tiọyen yehẹ Nilda, ọboepha vwẹ Brazil. Emekashe rẹ Idẹbono kpokpiro mamọ te ẹdia rẹ ofu akpọ rọyen de dje. Ọ da ta: “Emekashe rẹ Idẹbono na . . . sun uvwe, ayen ji ru uvwe phiyọ ọviẹn rayen. Ọkiọvo me rha riẹn obo mi ruẹ-ẹ, orhuẹ ko rhi fru uvwe. Emekashe rẹ Idẹbono na kpokpo uvwe te ẹdia rẹ oma da rhe ghwọrọ ovwẹ. Ke me reyọ ihuvwu egangan, da udi, ji phopho isigati. Me rioja nana vwẹ ikpe buebun.”

Womarẹ ukẹcha ri Jihova vẹ Iseri rọyen, Nilda da vrabọ rẹ emekashe rẹ Idẹbono na, asaọkiephana o yeren omamọ akpọ re. Nilda da ta: “Me guọnọre nẹ ohwo ọvuọvo nene emekashe rẹ Idẹbono na ru kugbe kakaka-a.”