Vwo obo wọ tẹnrovi. Roro kpahen obo wọ guọnọ nẹ ota wẹn na ru vwẹ oma rẹ ihwo wọ ta ota kẹ na; ovuẹ wọ guọnọ vwọ kẹ ayen, wọ guọnọ nẹ ayen vwo imuẹro kpahen ẹkpo ọvo, gbanẹ wọ guọnọre nẹ o mu ayen vwo ruiruo? Gba ta ota wẹn nene ọtiọyen. Vwo imuẹro nẹ ẹkpo na eje cha vwẹ ukẹcha kẹ wẹ vwo ru ọdavwẹ wẹn na.

Kanrunumu uyovwinrota wẹn na. Rionbọ kpo uyovwinrota wẹn vwevunrẹ ota na eje womarẹ ẹvwanriẹn rẹ ibieta eghanghanre rehẹ uyovwinrota na yẹrẹ ibieta re họherọ.

Jẹ ẹkpo na teyenphia je dia lọlọhọ. Sanẹ ẹkpo eghanghanre ri churobọ si uyovwinrota wẹn, ru wo ji se djefiotọ vwẹ ọke ra vwọ kẹ wẹ na. Wo jẹ ẹkpo na dia buebu-un, djunute ayen ọvuọvo, dunuji emerha wọ da guọnọ kpo ẹkpo ọfa, wo mi ji churo si ọ rọ vwọ kpahọn.