“Iyono e rori nọ ovwan a dia.” (Hib. 5:12) Di roro! Jihova rọ dia Oyono rọ ma rho kparobọ vwẹ akpọ vẹ odjuvwu yen durhie avwanre nẹ e yono ihwo efa kpahọn! Re vwo yono ihwo kpahen Jihova, ọyen okpuphẹn rode kugbe oghwa rode; te ọ dia evunrẹ orua, ukoko na, yẹrẹ vwẹ iruo aghwoghwo na. Mavọ yen e se vwo ruo?

Ẹkpahọnphiyọ na hẹ evunrẹ eta rẹ Pọl si rhe Timoti: “Wo mie se ọbe ọfuanfon na, kugbe eghwoghwo rẹ ota na, kugbe uyono.” Pọl da vwọba: “Wo de ru ọtiọye ku wo sivwi oma wẹn kugbe ayen otu ri nyo we.” (1 Tim. 4:​13, 16) Ovwan vwo ovuẹ ro sivwin arhọ rẹ ovwan che ghwoghwo. Ọtiọyena, kẹ ofori nẹ e ru isese vẹ eyono rẹ avwanre yovwinphiyọ. Ibroshọ nana cha chọn ovwan uko vwọ ru ọtiọyen. Jẹ e djekpahen erọnvwọn evo rehẹ evun rọyen:

Jihova yen “Oyono” rọ ma rho kparobọ. (Aiz. 30:20) Dede nẹ ibroshọ nana cha chọn ovwan uko vwo ru isese vẹ eyono rẹ ovwan yovwinphiyọ, karophiyọ nẹ Jihova yen Esiri rẹ ovuẹ rẹ avwanre, ọyen ji si ihwo reyọ. (Jọn 6:44) Ọtiọyena, gba yare ukẹcha rẹ ẹwẹn ọfuanfon na. Vwẹ Ota rẹ Ọghẹnẹ vwo ruiruo kọke kọke. Ukperẹ ihwo vwọ mrẹ wẹn vughe, jẹ ayen mrẹ Jihova vughe vwevunrẹ ota wẹn. Davwẹngba wọ vwọ kọn phiyọ ubiudu rẹ ihwo wọ ta ota kẹ nẹ ayen vwo ẹguọnọ okokodo kpahen Jihova.

E durhie uwe nẹ wọ vwẹ ovuẹ rọ ma ghanre kparobọ vwo yono ihwo. Avwanre vwo imuẹro nẹ wọ cha vwẹroso “ogangan rẹ Ọghẹnẹ,” wo se vwo phikparobọ.​—⁠1 Pita 4:11.

Iniọvo ovwan,

Ẹko Rọvwẹrote Iruo rẹ Iseri rẹ Jihova