UYONO 8
Diesorọ Ọghẹnẹ Vwọ Vwẹ Uphẹn kẹ Umwemwu vẹ Ojaẹriọ?
1. Mavọ yẹn umwemwu tonphiyọ wan?
Ọghẹnẹ vwẹ uphẹn kẹ ihworakpọ nẹ ayen sun vwẹ ọke grongron, rere o vwo djephia nẹ usuon rayen cha sa vwẹ erhuvwu rhe-e.
Ọke rẹ Idẹbono vwọ vwọrofian rẹsosuọ, ọyen umwemwu vwọ tonphiyọ vwẹ otọrakpọ na. Eshu, amakashe ọgbagba vẹrhe, ẹkẹvuọvo ‘ọ yan nene idjerhe rẹ uyota na-a.’ (Jọn 8:44) Ọ guọnọre nẹ ihwo vwẹ ẹga kẹ ọyen, ukperẹ ayen vwọ vwẹ ẹga kẹ Ọghẹnẹ. Eshu da vwọrofian kẹ Ivi, je riẹriẹ vwo nyupho rọyen ukpe rovwo nyupho rẹ Ọghẹnẹ. Adam da vwomaba Ivi vwọ so Ọghẹnẹ. Orhiẹn-ebro rẹ Adam kọyen ghwa ojaẹriọ vẹ ughwu rhe.—Se Jẹnẹsis 3:1-6, 19.
Eshu gbe vwọso usuon rẹ Ọghẹnẹ, ọke rọvwọ riẹriẹ Ivi vwọ chọ urhi rẹ Ọghẹnẹ. Buebun rẹ ihwo da rhe vwomaba Eshu vwọ sen Usuon rẹ Ọghẹnẹ. Kọyen sorọ Eshu rhe vwọ dia “osun rẹ akpọ nana” asaọkiephana.—Se Jọn 14:30; 1 Jọn 5:19.
2. O vwo obo re chọre vwẹ emama rẹ Ọghẹnẹ?
Iruo rẹ Ọghẹnẹ eje pha gbagba. Ọghẹnẹ ma ihworakpọ kugbe emekashe vẹ ẹgba rẹ ayen se vwo nyupho rọyen gbagba. (Urhi Rivẹ 32:4, 5) Ọghẹnẹ kẹ avwanre ugbomọphẹ rẹ avwanre vwọ jẹ ojẹ revwo ru erhuvwu yẹrẹ umiovwon. Ugbomọphẹ yena kẹ avwanre uphẹn rẹ avwanre vwo dje ẹguọnọ ravwanre kẹ Ọghẹnẹ.—Se Jems 1:13-15; 1 Jọn 5:3.
3. Diesorọ Ọghẹnẹ vwọ vwẹ uphẹn kẹ ojaẹrio rhi te ọke nana?
Jihova fọ kẹ ihwo nẹ ayen gbe vwọso usuon rọyen rhi te ọke nana. Diesorọ? Ro vwo jẹ ayen mrẹvughe nẹ ababọ rẹ usuon rọyen, ihworakpọ cha sa mrẹ erhuvwu-u. (Aghwoghwo 7:29; 8:9) Ọ vrẹ ikpe 6,000 rẹ ihworakpọ vwo suẹn oma rayen re. Die yin nẹ obuko rọyen rhe? Usuon rẹ ihworakpọ se si ofovwin, urhiẹchọ, oshenyẹ, yẹrẹ ọga no-o.—Se Jerimaya 10:23; Rom 9:17.
Usuon rẹ Ọghẹnẹ fẹnẹ ọ rẹ ihworakpọ keridie ọ hwarhiẹ erhuvwu bru ihwo re vwomakpotọ kẹ. (Aizaya 48:17, 18) Ọmọke yin chekọ, Jihova ko che si usuon rẹ ihworakpọ eje no. Ihwo re guọnọ usuon rẹ Ọghẹnẹ ọvo, yen cha dia otọrakpọ na.—Aizaya 11:9.—Se Daniẹl 2:44.
Ni ividio na Diesorọ Ọghẹnẹ Vwọ Vwẹ Uphẹn kẹ Ojaẹriọ?
4. Uphẹn vọ yẹn avwanre vwori fikirẹ ediri rẹ Ọghẹnẹ?
Eshu tare nẹ ọ dia ẹguọnọ yin mu avwanre vwọ ga Jihova-a. Wọ guọnọ dje Eshu phiyẹ ọvwọrofian? Wo se ru ọtiọyen! Ediri rẹ Ọghẹnẹ kẹ avwanre uphẹn rẹ avwanre vwo djephia sẹ usuon rọyen avwanre guọnọre yẹrẹ ọrẹ ihworakpọ. Oborẹ avwanre yeren akpọ wan ọyen che dje ọnana phia.—Se Job 1:8-12; Isẹ 27:11.
5. Mavọ avwanre se vwo djephia nẹ Ọghẹnẹ yẹn Osun ravwanre?
Orhiẹn-ebro avwanre ọyen che djephia sẹ avwanre guọnọre nẹ Ọghẹnẹ dia Osun rẹ avwanre
Avwanre de yono kpahẹn ẹga ruyota kirobo rọ hepha vwẹ Baibol na, je ga Ọghẹnẹ kirobo rẹ avwanre yonori, jẹ avwanre djephia nẹ Ọghẹnẹ yẹn Osun ravwanre. (Jọn 4:23) Avwanre sa sen usuon rẹ Eshu siẹrẹ avwanre da vwẹrokere Jesu vwo sioma nẹ oseghe rẹ usuon vẹ ofovwin.—Se Jọn 17:14.
Eshu vwẹ ẹgba rọyen riẹriẹ ihwo phiyẹ uruemu rẹ ọfanrhiẹn vẹ umiovwon sansan. Siẹrẹ avwanre rhe vwobọ vwẹ iruemu tiọyen na-a, igbeyan vẹ imoni ravwanre evo sa vwẹ avwanre jehwẹ yẹrẹ gbe vwọso avwanre. (1 Pita 4:3, 4) Ọnana sa dia egbabọse kẹ avwanre. Avwanre cha vwẹ ihwo ri vwo ẹguọnọ rẹ Ọghẹnẹ vwo mu igbeyan? Avwanre che ru nene irhi rọyen re vọnre vẹ aghwanre kugbe ẹguọnọ na? Avwanre de ru ọtiọyen, jẹ avwanre dje Eshu phiyẹ ọvwọrofian, rọ tare nẹ o vwo ohwo vuọvo rọ sa ga Ọghẹnẹ siẹrẹ ọ da mrẹ ebẹnbẹ-ẹn.—Se 1 Kọrẹnt 6:9, 10; 15:33.
Ẹguọnọ Ọghẹnẹ vwo kpahen ihworakpọ, ọyen odjephia nẹ umwemwu kugbe ojaẹriọ che vwo oba. Ihwo ri djerephia nẹ ayen vwo esegbuyota kpahen ọnana cha dia otọrakpọ na bẹdẹ.—Se Jọn 3:16.
