UYONO 13
Iyẹnrẹn Esiri Vọ Yen Herọ Kpahen Ẹga?
1. Ẹga na ejobi yin yovwirin?
A mrẹ ihwo ri vwo ẹwẹn esiri vwevunrẹ ẹga ejobi. Ọyen emu rẹ omavwerhovwẹn ravwọ riẹn nẹ Ọghẹnẹ mrẹ ihwo nana eje. O ji vwo ọdavwẹ rayen. Ẹkẹvuọvo, ihwo reyọ odẹ rẹ ẹga vwo ruẹ orukuruku buebun. (2 Kọrẹnt 4:3, 4; 11:13-15) Iyẹnrẹn djerephia nẹ ẹga evo vwobọ vwẹ oghwọrọ rẹ ihwo vẹ ekuakua, ohwekufia, ofovwin kugbe emọ re gbẹgua. Ọnana da idibo rẹ Ọghẹnẹ ruyota mamọ!—Se Matiu 24:3-5, 11, 12.
Ihwo rẹ ẹga ruyota ru obo re nẹrhẹ oma vwerhen Ọghẹnẹ, ẹkẹvuọvo e rẹ ẹga refian ru oborẹ ivun vwo miovwon. Iyono refian ri shekpahen Ọghẹnẹ kugbe ihwo ri ghwure, vẹ iyono efa rẹ ẹga refian yono na, nẹ Baibol rhe-e. Jẹ, Jihova guọnọre nẹ ihwo nabọ riẹn ọyen vwọrẹ uyota.—Se Izikiẹl 18:4; 1 Timoti 2:3-5.
2. Iyẹnrẹn esiri vọ yen herọ kpahen ẹga?
Vwọrẹ uyota, ẹga ri me ruẹ nẹ ayen ga Ọghẹnẹ jẹ akpọ rẹ Eshu na yẹn ayen vwo ẹguọnọ kpahen, cha sa phiẹn Ọghẹnẹ-ẹ. (Jems 4:4) Baibol na se Ẹga refian eje “Babilọn rode na.” Babilọn odẹ rẹ orere rawanre rẹ ẹga refian da tonphiyọ, ọke rẹ Oghwe ri Noa vwọ wanu. Fikiridie nẹ ẹga refian phiẹn ihwo ji shenyẹ ayen Ọghẹnẹ kọ cha vwẹ oghwọrọ ri kpregede vwọ kẹ.—Se Ẹvwọphia 17:1, 2, 5, 16, 17; 18:8.
Iyẹnrẹn esiri efa je herọ. Jihova vwo oniso rẹ ihwo ri vwo ẹwẹn esiri re hẹ ẹga refian sansan vwẹ akpọ na asaọkiephana. O siẹ ihwo ọtiọyena koko womarẹ uyota revwo yono ayen.—Se Maika 4:2, 5.
3. Die ofori nẹ ihwo ri vwo ẹwẹn esiri ru?
Ẹga ruyota kuẹ ihwo kuẹgbe
Jihova vwo ọdavwẹ rẹ ihwo ri vwo ẹguọnọ ruyota vẹ obo ri yovwirin. O si ayen erhọ nẹ ayen vrẹn nẹ ẹga refian. Ihwo ri vwo ẹguọnọ rẹ Ọghẹnẹ choma rẹ ayen vwo ru ewene rofori oma vwọ vwerhọn.—Se Ẹvwọphia 18:4.
Oma vwerhẹn ihwo ri vwo ẹwẹn esiri vwẹ ẹgbukpe ujorin ẹsosuọ, ayen vwo nyo iyẹnrẹn esiri rẹ iyinkọn na ghwoghwori. Kẹ ayen rhi yono oka rẹ akpeyeren ọkpokpọ rọ vọnre vẹ omavwerhovwẹn kugbe iphiẹrophiyọ mie Jihova. Ayen omamọ rẹ udje kẹ avwanre, keridie ayen kerhọ rẹ iyẹnrẹn esiri na, ayen de phi Jihova phiyẹ ẹdia ẹsosuọ vwẹ akpeyeren rayen.—Se 1 Tẹsalonaika 1:8, 9; 2:13.
Jihova durhie ihwo nẹ ayen vrẹn nẹ ẹga refian rhe, rhe ro ukoko rọyen. Wọ da kpahen phiyẹ use ri Jihova na, ku wọ dia ugbeyan rọyen. Wọ je cha dia ọvo usun rẹ ihwo rọyen, ri dje ẹguọnọ kẹ ohwohwo. Ku wo ji vwo arhọ ri bẹdẹ.—Se Mak 10:29, 30; 2 Kọrẹnt 6:17, 18.
4. Idjerhe vọ yẹn Ọghẹnẹ cha vwọ vwẹ aghọghọ kẹ ihworakpọ eje?
Orhiẹn-ebro rẹ oghwọrọ rọ cha kẹ ẹga refian, ọyẹn iyẹnrẹn esiri. Ọ cha ghwa omafuvwe brẹ ihworakpọ eje rhe. Ẹga refian rha cha sa phiẹn ihwo yẹrẹ so ohẹriẹ phiyọ uvwre rayen ọfa-a. Ihwo re cha dia akpọ na ọke yena che kuomakugbe ga Ọghẹnẹ ruyota vuọvo na.—Se Ẹvwọphia 18:20, 21; 21:3, 4.
