Ọghẹnẹ durhie koka koka rẹ ihwo nẹ ayen nẹrhovwo vwo rhe ọyen ọke na eje. (Une Rẹ Ejiro 65:2) Jẹ, ọ diẹ ẹrhovwo eje yẹn Ọghẹnẹ kerhọ kẹ-ẹ. Kerẹ udje, o nyẹrhovwo rẹ ọshare rọ djoma kuẹ aye rọye-en. (1 Pita 3:7) Ihwo rẹ Izrẹl re rhọnvwe siobọ nẹ umwemwu raye-en, Ọghẹnẹ rhọnvwe kerhọ rẹ ẹrhovwo raye-en. Ọnana djephia nẹ, ravwọ nẹrhovwo rhe Ọghẹnẹ ọyen uphẹn rode. Ẹkẹvuọvo, Ọghẹnẹ kerhọ rẹ ẹrhovwo rẹ iruimwemwu ri siobọ nẹ imwemwu rayen.​—Se Aizaya 1:15; 55:7.

Ni ividio na Ọghẹnẹ Kerhọ kẹ Ẹrhovwo Eje?

Ẹrhovwo, ọyen ẹbẹre ọvo rẹ ẹga rẹ avwanre vwọ kẹ Jihova rọ dia Ọmemama ravwanre. Ọtiọyena, ọyen ọvo yin fo ohwo rẹ avwanre nẹrhovwo rhe. (Matiu 4:10; 6:9) Fikiridie nẹ avwanre ihworakpọ gbare-e na, ko fori nẹ avwanre ku ẹrhovwo ravwanre phiyọ vwẹ odẹ ri Jesu ro ghwu kẹ avwanre. (Jọn 14:6) Ẹrhovwo ro nẹ ubiudu rhe ọyen Jihova guọnọre, ọ diẹ ọrẹ e se nẹ ọbe yẹrẹ afọnrhe cha-a.​—Se Matiu 6:7; Filipae 4:6, 7.

Ọmemama ravwanre tobọ nyo ẹrhovwo ra nẹ phiyọ evun. (1 Samuẹl 1:12, 13) O durhie avwanre nẹ avwanre nẹrhovwo rhe ọyen ọke na eje. Ọ sa dia urhiọke yẹrẹ ovwọnvwọn. Ọ je sa dia ọke rẹ emuẹriọ yẹrẹ ọke rẹ avwanre da hẹ ebẹnbẹn.​—Se Une Rẹ Ejiro 55:22; Matiu 15:36.

Buebun rẹ ihwo se Ọghẹnẹ gbe uyota-a. Ayen tobọ vwẹ uve rẹ akpọ rẹ ufuoma ro veri na vwọ jehwẹ. Ọna yen nẹrhẹ  ọ bẹn rẹ ihwo vwo sikẹre Ọghẹnẹ. (2 Timoti 3:1, 4; 2 Pita 3:3, 13) Ọyen sorọ rovwo fo nẹ avwanre vẹ iniọvo ravwanre vwo ẹkuruemu ravwọ vwoma ọkieje je vwọ vwẹ uchebro kẹ ohwohwo.​—Se Hibru 10:24, 25.

Siẹrẹ avwanre da reyọ ihwo ri vwo ẹguọnọ rẹ Ọghẹnẹ vwo ru igbeyan, kẹ avwanre je dia igbeyan rẹ Ọghẹne. Vwẹ emẹvwa rẹ Iseri ri Jihova, avwanre cha mrẹ odjephia rẹ esegbuyota rẹ ihwoefa re sa bọn avwanre gan.​—Se Rom 1:11, 12.

Wo se sikẹre Jihova siẹrẹ wọ da frẹkotọ roro kpahẹn obo ru wo yono nẹ Baibol na. Roro obo wo se yono nẹ irueru, ichebro kugbe ive rọyen rhe. Revwo roro kokodo kpahan obo re yono, vẹ ẹrhovwo ẹnẹ cha chọn avwanre uko vwo vwẹ ẹruọ rẹ obo rẹ ẹguọno vẹ aghwanre rẹ Ọghẹnẹ ghanre te.​—Se Joshua 1:8; Une Rẹ Ejiro 1:1-3.

Wo se sikẹre Ọghẹnẹ ọ da dianẹ wọ vwẹrosuọ, ji vwo esegbuyota kpahọn. Kirobo rẹ a vwẹrote ekankọn rovwo yovwin, ọtiọyen esegbuyota je guọnọ erianriẹn rere ọ vwọ gan. Fikirẹ ọtiọyena, ko fori nẹ avwanre ra bọn esegbuyota ravwanre kọke kọke womarẹ ẹfuerẹn rẹ oboresorọ avwanre vwo vwo imuẹro yena.​—Se Matiu 4:4; Hibru 11:1, 6.

Jihova vwo ọdavwẹ rẹ ihwo ri vwo ẹguọnọ rọyen. O che sivwin ayen nabọ rẹ erọnvwọn ri se phi esegbuyota vẹ iphiẹrophiyọ rẹ arhọ ri bẹdẹ rayen phiyẹ ẹdia rẹ imwoshọ. (Une Rẹ Ejiro 91:1, 2, 7-10) O si avwanre erhọ kpahen oka rẹ akpeyeren ro se mie avwanre oma kpokpọ vẹ omavwerhovwẹn. Jihova yono avwanre idjerhe rẹ akpeyeren ro me yovwin.​—Se Une Rẹ Ejiro 73:27, 28; Jems 4:4, 8.