Jihova Ọghẹnẹ yen ma avwanre. Ọyen ma erọnvwọn eje, te e ra mrẹ vẹ i re jẹmrẹ. Ọ ma emekashe buebun tavwen ọ ke ma erọnvwọn rẹ avwanre rhiẹromrẹ. Wọ riẹn ihwo re se emekashe? Ayen ihwo rẹ Jihova mare kerẹ oma rọyen. Avwanre cha sa mrẹ aye-en, kirobo rẹ avwanre cha sa mrẹ Ọghẹnẹ na-a. Amakashe rẹsosuọ rẹ Jihova mare, da rhe dia ọchuko vwọ kẹ. Amakashe yena vwẹ ukẹcha kẹ Jihova vwọ ma isio, akpọ na vẹ erọnvwọn ejobi. Akpọ na vọnre vẹ erhuvwu, ọyehẹ uwevwin rẹ avwanre.

Jihova da rhe rhuẹrẹ otọrakpọ na rere ihworakpọ vẹ eranvwe sa vwọ dia. Ọ ma ọnre na rere o vwo lo mu otọrakpọ na. Ọ ma igbenu, abadi vẹ urhie.

Die ọfa yen o ruru? Jihova da ta: ‘Me cha ma odi vẹ ekankọn kugbe irhe.’ Emamọ sansan, ẹbe rẹ aghwa vẹ idodo da rhe djẹ nẹ otọ rhe. Jihova da je ma eranvwe sansan; e re rhan, e re rhẹrhẹ, vẹ i ri kpono. Ọ ma eranvwe itete kerẹ afiotọ, vẹ iride kerẹ eni. Eranvwe vọ yen me je we?

Jihova da ta kẹ amakashe rẹsosuọ na: “Gbe jẹn avwanre ma ohwo.” Ihwo na cha fẹnẹ eranvwe na. Ayen se ru erọnvwọn kpokpọ. Ayen sa ta ota, ayen sa hwẹ, je nẹrhovwo. Ayen cha vwẹrote akpọ na vẹ eranvwe na. Wọ riẹn ohwo rẹsosuọ  Ọghẹnẹ ka ma? A cha mrẹ vwẹ uyovwinrota rọ vwọ kpahen ọnana.