Ẹsta, ọyen ohwo rẹ Ju rọ dia Susa rọhẹ orere rẹ Pẹsha. Ikpe buebun re wanre, Nẹbukadreza de mu orua rọyen nẹ Jerusalẹm kpo eviẹn. Modekai rọ dia ọmọ-oniọvo ọsẹ rọyen yen vwẹrote ghwanre; Modekai jẹ odibo rẹ Ovie rẹ Pẹsha re se Ahasuerus.

Ovie Ahasuerus guọnọ rọvwọn aye kpokpọ. Idibo rọyen da reyọ eya ri me vwo erhuvwu vwẹ otọ na rhe, ji te Ẹsta. Usun rẹ eya na eje, ovie na da jẹ Ẹsta. Modekai da vuẹ Ẹsta nẹ ọ vuẹ ihwo nẹ ọyen ohwo rẹ Ju-u.

Ọshare ọvo rọ kparoma mamọ re se Haman yen onotu rẹ isun na. Ọ guọnọre nẹ ihwo eje vwẹ uyovwin kpotọ kẹ. Modekai rhọnvwe ru ọtiọye-en, ivun de miovwo Haman mamọ, kọ guọnọ obo ro vwo hwe Modekai. Haman vwọ riẹn nẹ Modekai ohwo rẹ Ju, ọ da jiroro ro vwo hwe ihwo rẹ Ju ejobi rehẹ otọ na. Ọ da vuẹ ovie na: ‘Ihwo rẹ Ju na erharhe ihwo; ofori nẹ wọ ghwọrọ ayen.’ Ovie na da ta: ‘Ru obo wọ guọnọ ru eje,’ ọ da je vwẹ ogangan vwọ kẹ. Haman da vwẹ urhi mu nẹ e hwe ihwo rẹ Ju na vwẹ ẹdẹ 13 rẹ emeranvwe rẹ Ada. Jihova mrẹ erọnvwọn na eje re phia na.

Ẹsta riẹn kpahen urhi na-a. Ọtiọyena, Modekai da vwẹ ovuẹ vwo rhe, ọ da ta kẹ: ‘Ra ta ota kẹ ovie na.’ Ẹsta da ta: ‘Kohwo kohwo ro bru ovie na ra jẹ ọ diẹ o sere-e, e hwe ohwo tiọyena. Ovie na ji se vwe vwẹ ẹdẹ 30 re na-a! Ẹkẹvuọvo me cha ra ghene. Ọ da riẹn ọkpọ rọyen kẹ vwẹ, ke me rhọ. O rhe ru ọtiọye-en, ji mi ghwuru.’

Ẹsta de kpo ọguan rẹ ovie na. Ovie na vwọ mrẹ, ọ da riẹn ọkpọ rọyen vwọ kẹ. Ẹsta de brora, ovie na da nọ: ‘Die yen wọ guọnọ nẹ mi ru kẹ wẹ, Ẹsta?’ Ọ da ta: ‘Me guọnọre nẹ wẹ vẹ Haman rhe  riemu vwẹ uwevwin mẹ.’ Ọke rẹ ayen vwọ riemu na, Ẹsta da rhoma durhie ayen vwọ kẹ emuọre ọfa. Ayen vwọ riemu vwẹ ẹdẹ rivẹ na, ovie na da rhoma nọ: ‘Die yen wọ guọnọre nẹ mi ru kẹ wẹ?’ Ọ da ta: ‘Ohwo ọvo guọnọ hwe vwe vẹ ihwo mẹ ejobi. Biko sivwin avwanre.’ Ovie na da nọ: ‘Ono yen guọnọ ruẹ oka rẹ orọnvwọn tiọyena?’ Ẹsta da ta: ‘Ozighẹ ọshare nana, Haman.’ Ivun de miovwo ovie na mamọ, ọ da tanẹ e hwe Haman.

Ẹkẹvuọvo ohwo vuọvo cha sa rhẹriẹ urhi rẹ Haman vwo mu na-a, ovie na dede tobọ vwo ẹgba yena-a. Ọtiọyena, ovie na da vwẹ Modekai vwo mu onotu rẹ isun na, ọ da kẹ ẹgba nẹ o ji urhi kpokpọ. Modekai de ji urhi nẹ ihwo rẹ Ju na sa chochọ rẹ oma rayen. Vwẹ ẹdẹ 13 rẹ emeranvwe rẹ Ada na, ihwo rẹ Ju na de phi ivwighrẹn rayen kparobọ. Nẹ ọke yena yanran, kẹ ayen ruẹ ẹkarophiyọ rẹ ophikparobọ yena kukpe kukpe.