Ason ọvo, Ovie Nẹbukadreza da vwerhẹn evwerhẹn ọvo. Evwerhẹn na kpokpo ẹwẹn rọyen mamọ, ọ rha sa vwerhẹ-ẹn. O de se ihwo ri ruẹ imajiki na, ọ da vuẹ ayen: ‘Vuẹ vwẹ otọ rẹ evwerhẹn mẹ na.’ Ayen da vuẹ: ‘Vuẹ avwanre evwerhẹn na, Ovie.’ Ẹkẹvuọvo, Nẹbukadreza da vuẹ ayen: ‘Ẹjo! Vuẹ vwẹ evwerhẹn na, ovwan rha sa vuẹ vwẹ-e, mi che hwe ovwan.’ Ayen da rhoma ta kẹ Ovie na: ‘Vuẹ avwanre evwerhẹn na, kẹ avwanre sa fan otọ rọyen kẹ wẹ.’ Ọ da ta: ‘Ovwan guọnọ phiẹn vwẹ. Vuẹ vwẹ obo re me vwerhẹn evwerhẹn mrẹ na!’ Ayen da vuẹ ovie na: ‘O vwo ohworakpọ vuọvo ro che se ruo-o. Avwanre che se ru obo wọ ta na-a.’

Ivun de miovwo Nẹbukadreza mamọ ọ da tanẹ e hwe egbaghwanre na ejobi. Ọtiọyen ji te Daniẹl, Shadrack, Meshak, kugbe Abẹdnigo. Daniẹl da vuẹ ovie na nẹ ọ kẹ ọyen ọmọke. Ọ vẹ igbeyan rọyen da nẹrhovwo kẹ Jihova nẹ ọ chọn ayen uko. Die yen Jihova ruru?

Vwevunrẹ emramrẹ, Jihova de dje evwerhẹn rẹ Nẹbukadreza na kẹ Daniẹl ọ da je fan otọ rọyen kẹ. Ọke vwo rhie, Daniẹl de bru odibo rẹ ovie na ra, ọ da ta: ‘Ovwan hwe egbaghwanre vuọvo-o. Me cha fan otọ rẹ evwerhẹn rẹ ovie na.’ Ọ da reyọ Daniẹl bru ovie na ra. Daniẹl da ta kẹ ovie na: ‘Ọghẹnẹ dje obo re cha phia vwẹ obaro na kẹ wẹ. Ọna yen evwerhẹn wẹn: Wọ mrẹ oma rode ọvo ro vwo uyovwin rẹ oro, udu vẹ abọ rọyen da dia idọnọ ọfuanfon, evun vẹ ekpoghowọ rọyen da dia ẹrovwo, igbawọ rọyen ke rha hẹ utehru, awọ rọyen da dia utehru vẹ ọphiẹn. Oragha ọvo de bru nẹ ugbenu na, o de she teyen awọ rẹ oma na. Oma na da guọghọ vworovworo, odju de djuo kufia. Oragha na darhe dia ugbenu rode ro rhurhuotọrakpọ na ejobi.’

 Daniẹl da ta: ‘Ọnana yen otọ rẹ evwerhẹn wẹn: Uvie wẹn yen uyovwin rẹ oro na. Idọnọ ọfuanfon na yen uvie rọ cha vwọ kpahen ọwẹn. Ọ rọ vwọ kpahọn cha dia kerẹ ẹrovwo, o che sun akpọneje. Uvie rọ vwọ kpahen ọyena cha gan kerẹ utehru. Ukuotọ rọyen, o che vwo uvie ọvo ra cha ghare kpo ẹkẹn ivẹ, ẹbẹre ọvo cha gan kerẹ utehru ẹbẹre ọvo me rha dia yẹghẹ kerẹ ọphiẹn. Oragha rọ rhe dia ugbenu rode na yen Uvie rẹ Ọghẹnẹ. Ọ cha guọghọ ivie na eje, ọ me dia bẹdẹ bẹdẹ.’

Nẹbukadreza de she bọvwọn opharo rhuotọ vwẹ obaro rẹ Daniẹl. Ọ da ta: ‘Ọghẹnẹ wẹn yen vuẹ wẹn evwerhẹn nana. O vwo Ọghẹnẹ ọfa rọ họherọ-ọ.’ Ukperẹ o vwo hwe Daniẹl, Nẹbukadreza da reyọ vwo mu onotu rẹ egbaghwanre na kugbe osun rẹ ubrakpọ ọvo vwẹ Babilọn. Wọ mrẹ oborẹ Jihova kpahenphiyọ ẹrhovwo rẹ Daniẹl?