Jihova sane Jerimaya nẹ ọ dia ọmraro vwọ kẹ ihwo rẹ Juda. Ọ vuẹ Jerimaya nẹ o ghwoghwo kẹ ihwo na nẹ ayen siobọnu imwemwu rayen. Jerimaya da ta: ‘Jihova, mẹvwẹ omotete. Me riẹn obo me cha ta kẹ ihwo nana-a.’ Jihova da vuẹ: ‘Wo jẹ oshọ mu we-e. Me cha vuẹ wẹ obo wọ ta. Me cha chọn wẹ uko.’

Jihova da vuẹ Jerimaya nẹ o koko ekpako na rere ọ guọghọ ochẹ ọvo vwẹ obaro rayen, ọ me ta: ‘A cha guọghọ Jerusalẹm kerẹ ochẹ nana.’ Jerimaya vwo ru oborẹ Jihova tare na, ivun de miovwo ekpako na mamọ. Orherẹn ọvo re se Pashọ da ghwiẹ Jerimaya, ọ da vwẹ irhe vwọ kanre abọ vẹ awọ rọyen. Jerimaya rhe se kpogho oma-a, nẹ ason yena re te urhiọke. Pashọ de siobọno vwẹ urhiọke. Jerimaya da ta: ‘Oja na gan nọ. Mi rhe che ghwoghwo ota ọfa-a.’ Ẹkẹvuọvo, ọ ghene dobọji? Ẹjo. Ọ vwọ rhoma roro, ọ da ta: ‘Ovuẹ rẹ Jihova na pha kerẹ erhanre vwẹ obevun mẹ. Me cha sa dobọ rẹ aghwoghwo na ji-i.’ Jerimaya kọ rhoma ton aghwoghwo rẹ orhọ-esio na phiyọ.

Ikpe evo vwọ wan nu, a da rhe vwẹ ovie kpokpọ vwo mu vwẹ Juda. Irherẹn vẹ emraro rẹ orere na ki vwo utuoma kpahen ovuẹ rẹ Jerimaya ghwoghwo na. Ayen da vuẹ isun na: ‘Ọshare nana fo ughwu.’ Jerimaya da ta: ‘Ovwan de hwe vwe, jẹ ovwan hwe vwe ekueku. Ota rẹ Jihova yen mi ghwoghwo, ọ diẹ ota mẹ-ẹ.’ Isun na vwo nyo eta nana, ayen da ta: ‘Ọshare nana ru emu vuọvo ro fo ughwu-u.’

Jerimaya je dobọ rẹ aghwoghwo na ji-i, ivun de  miovwo isun na gangan. Ayen da vuẹ ovie na nẹ o hwe Jerimaya. Ovie na da vuẹ ayen nẹ ayen ru Jerimaya obo ri je ayen. Ayen de do Jerimaya phiyọ orhare ọvo rọ pha kokodo rọ je vọn vẹ ibehre rere o vwo ghwu. Ememerha na, Jerimaya ko ro evunrẹ ibehre na yanran.

Ọshare ọvo re se Ebẹdmẹlẹk rọ wian vwẹ ọguan rẹ ovie na da ta kẹ ovie na: ‘E do Jerimaya phiyọ orhare! A da yan jovwo, o che ghwu vwẹ etiyin.’ Ovie na da vuẹ Ebẹdmẹlẹk nẹ ọ reyọ eshare evo nene oma rere ayen re mu Jerimaya nẹ orhare na. Orọnvwọn vuọvo sa nẹrhẹ Jerimaya dobọ rẹ iruo aghwoghwo na ji-i, o rhe fo nẹ a vwẹrokere?