Osun rẹ Rom re se Siza Ọgọstọs de ji urhi nẹ ihwo rẹ Ju ejobi kpo orere rayen re si odẹ phiyotọ. Josẹf vẹ Meri de kpo Bẹtlẹhẹm, ro dia asan rẹ Josẹf nurhe. Ọke rẹ Meri che vwo vwiẹ joma tere.

Ayen vwo te Bẹtlẹhẹm, asan ọvuọvo rẹ ayen mrẹre yen asan ra da vwẹrote eranvwe. Etiyin kọyen Meri de vwiẹ Jesu. Meri da vwẹ amwa vwọ pharọ, o de muo sherhẹn asan ra ghwẹ emu rẹ eranvwe phiyọ.

Isuigegede evo rehẹ otafe, vwẹrote igegede rayen vwẹ ason vwẹ asan rọ kẹrẹ Bẹtlẹhẹm. Siẹvuọvo na, amakashe de mudia vwẹ obaro rayen vẹ elo rẹ urinrin rẹ Jihova vwẹ oma rayen. Oshọ de mu isuigegede na, ẹkẹvuọvo amakashe na da ta: ‘Ovwan djoshọ-ọ. Mi vwo iyẹnrẹn rẹ omavwerhovwẹn. E vwiẹ  Mesaya na vwẹ Bẹtlẹhẹm nonẹna.’ Ugege yena emekashe buebun da vwomaphia vwẹ obenu, ayen da ta: ‘Vwẹ urinrin kẹ Ọghẹnẹ rọhẹ odjuvwu, ufuoma vwọ kẹ akpọ na.’ Emekashe na da ranvwiẹ. Kẹ die yen isuigegede na ruru?

Isuigegede na ta kẹ ohwohwo ne, ‘E jẹ e kpo Bẹtlẹhẹm kpakpata.’ Ayen da yanran, ayen da mrẹ Josẹf vẹ Meri kugbe ọmọboba na vwẹ asan ra da vwẹrote eranvwe.

Ihwo vwo nyo oborẹ amakashe na vuẹ isuigegede na, o de gbe ayen unu. Meri nabọ roro kokodo kpahen eta rẹ amakashe na, e chọrọẹro kakaka-a. Isuigegede na de rhivwin bru igegede rayen, jẹ ayen kpẹvwẹ Jihova fikirẹ oborẹ ayen mrẹre ji nyo na.