Jọn rọ dia ọmọ rẹ Zakaraya vẹ Ẹlizabẹt, da rhe dia ọmraro ọke rọ vwọ ghwanre. Jihova reyọ Jọn vwo yono ihwo nẹ Mesaya na cha. Ẹkẹvuọvo, aton yen o de yono ihwo ukperẹ uwevwin ẹga na yẹrẹ vwevunrẹ orere. Ihwo rẹ Jesuralẹm vẹ Judia ejobi ki bro ra rere o yono ayen. O yono ayen nẹ ayen ki se ru obo re vwerhen Ọghẹnẹ ivun, ofori nẹ ayen siobọnu umwemwu. Ayen vwọ kerhọ kẹ Jọn nu, buebun rayen de kurhẹriẹ, Jọn de bru ayen phiyame vwẹ Urhie rẹ Jọdan.

Akpọ rẹ kekpe yen Jọn yerin. Ewun ra vwẹ ẹto rẹ ikamẹl ru yen o kuẹphiyọ, ebaka kugbe enyọn re ji chere-e ọyen emu rọyen. Ihwo guọnọ riẹn oka rẹ ohwo rẹ Jọn hepha. Ihwo ri Farisi kugbe Sadiusi ri phuoma mamọ da je rhe mrẹ Jọn. Ọ da vuẹ ayen: ‘Ovwan kurhẹriẹ. Ovwan roro nẹ ovwan ihwo rẹ oghẹresan kidie ovwan tanẹ ovwan emọ rẹ Ebraham. Ẹkẹvuọvo, ọ dia ọnana mudiaphiyọ nẹ ovwan emọ rẹ Ọghẹnẹ-ẹ.’

Ihwo rẹ Ju buebun ke nọ Jọn: ‘Die yen avwanre ru oma sa vwọ vwerhen Ọghẹnẹ?’ Jọn da vuẹ ayen: ‘Wo de vwo iwun ivẹ gba vwẹ ọvo kẹ ohwo ro vwori-i.’ Wọ riẹn oboresorọ ọ vwọ ta ọtiọyen? Ọ guọnọre nẹ idibo rọyen riẹn nẹ, e ki se ru obo re vwerhen Ọghẹnẹ oma, kẹ e vwo ẹguọnọ rẹ ihwo tavwen.

Jọn da vuẹ imiarhọghọ na: ‘Ovwan dia ihwo uyota, ovwan ghwa ohwo vuọvo ria-a.’ Ọ da vuẹ isodje na: ‘Ovwan shenyẹ ihwo-o, ovwan ji gun efia-an.’

 Irherẹn kugbe ihwo ri Livae ji bru Jọn rhe, ayen da nọ: ‘Wẹwẹ ono? Ihwo ejobi guọnọ riẹn.’ Jọn da ta: ‘Mẹvwẹ yen urhuru ro kperẹ vwevunrẹ aghwa, ro suẹn ihwo brẹ Jihova ra kirobo rẹ Aizaya mraro rọyen.’

Ihwo vwo ẹguọnọ rẹ oborẹ Jọn yono ayen. Buebun ki roro sẹ Jọn yen Mesaya na. Ẹkẹvuọvo ọ da vuẹ ayen: ‘Ohwo rọ rho nọ vwẹ cha. Mi tobọ fo ohwo rọ rhan isabato rọye-en. Mi bru ihwo phiyame, ẹkẹvuọvo o che ku ẹwẹn ọfuanfon ku ihwo.’