Vwẹ orere ọvo rọhẹ obọrhen rẹ ọnre rẹ Izrẹl, ihwo na vwo imuẹro nẹ isio se dje idjerhe kẹ ayen. Ason ọvo, eshare evo ri nẹ ubrakpọ yena rhe da mrẹ isio ọvo ro lo mamọ, rọ yan vwẹ obenu, ayen de nene. “Isio” na de sun ayen kpo Jerusalẹm. Eshare na ke nọ ihwo nẹ, ‘Tivọ yen ọmọ rọ cha dia ovie rẹ Ju na hepha? Avwanre yanrhe rhe ga.’

Ọke rẹ Herọd, ovie rẹ Jerusalẹm vwo nyo kpahen ovie kpokpọ nana, oshọ de muo. Ọ da nọ irherẹn na: ‘Tivọ yen a tare nẹ e de che vwiẹ ovie kpokpọ nana?’ Ayen da vuẹ: ‘Emraro na tare nẹ e che vwiẹ vwẹ Bẹtlẹhẹm.’ Ọtiọyena, Herọd de se eshare ri nẹ obọrhen rẹ ọnre rhe na, ọ da ta kẹ ayen: ‘Ovwan kpo Bẹtlẹhẹm ra guọnọ ọmọ na. Ovwan rhivwin rhe, rhe vuẹ vwẹ asan rọ hepha. Me je guọnọ ra ga.’ Ẹkẹvuọvo, ọyena ofian.

“Isio” na da rhoma yan nẹ etiyin. Eshare na de nene kpo Bẹtlẹhẹm. “Isio” na da domaji vwẹ enu rẹ uwevwin ọvo, eshare na da ro uwevwin na. Ayen da mrẹ Jesu vẹ oni rọyen, Meri. Ayen da vwẹ uyovwin kpotọ kẹ, ayen da kẹ ọmọ na iro, adjija kugbe ugboduma. Jihova yen ghini ji eshare nana nẹ ayen ra guọnọ Jesu? Ẹjo.

Ason yena, Jihova da vuẹ Josẹf vwẹ evwerhẹn: ‘Herọd guọnọ hwe Jesu. Reyọ aye wẹn vẹ ọmọ na rere ovwan djẹ kpo Ijipt. Ovwan dia oboyin bẹsiẹ me ke vuẹ wẹ ọke ovwan che vwo rhivwin rhe.’ Kpakpata, Josẹf vẹ orua rọyen da djẹ kpo Ijipt.

Jihova vuẹ eshare ri nẹ obọrhen rẹ ọnre rhe na nẹ ayen rhivwẹn bru Herọd ra-a. Herọd vwọ mrẹvughe nẹ eshare na rhe rhivwin rhe-e, ivun de miovwo gangan. Ọ rha sa mrẹ Jesu hwe na-a, ọ da tanẹ e hwe emọboba rehẹ Jerusalẹm na eje re dia emeshare. Ẹkẹvuọvo, emu vuọvo ru Jesu-u kidie ọ hẹ Ijipt.

 Ọke vwọ yanran na, Herọd de ghwu. Jihova da vuẹ Josẹf: ‘Ọke rẹ ovwan vwo rhivwin kpo tere.’ Josẹf, Meri, vẹ Jesu de rhivwin kpo Izrẹl, ayen da ra dia orere rẹ Nazarẹt.