Jesu yono ihwo kpahen Uvie rẹ odjuvwu. O yono ayen nẹ ayen nẹrhovwo nẹ e ru odẹ rẹ Ọghẹnẹ fon, Uvie rọyen rhe, ọhọre rọyen ji rugba vwẹ otọrakpọ na. Wọ da dia ọmiọvwọn, djefiotọ kẹ ọmọ wẹn oborẹ ẹrhovwo nana mudiaphiyọ kẹ avwanre. Jesu vwẹ uphẹn kẹ Eshu nẹ ọ guọghọ evun-ẹfuọn rọye-en. Jesu sane iyinkọn rọyen, ayen da rhe dia ihwo rẹsosuọ re riuku rẹ Uvie na, ra je vwẹ iruo ọghanghanre vwọ kẹ. Jokaphiyọ oruru ọgangan rẹ Jesu vwo kpahen ẹga uyota. O sivwin ihwo re muọga, ọ ghẹrẹ ihwo rẹ owẹnvwe hwe, ọ je rhọnvwọn ihwo ri ghwuru kidie ọ guọnọ vwẹ ukẹcha kẹ ihwo. Womarẹ emu igbevwunu nana eje, Jesu dje oborẹ Uvie na che ru kẹ ihworakpọ eje.