Jesu ghwe vwo bromaphiyame nu, ọ da ton iruo aghwoghwo na phiyọ, rọ vwọ ta: ‘Uvie rẹ Ọghẹnẹ na sikẹri re.’ Idibo na de nene kpo Galili vẹ Judia. Jesu vwo rhivwin kpo orere rọyen vwẹ Nazarẹt, o de kpo uwevwin ẹga na, o de rhie ọbe rẹ Aizaya, o de se: ‘Jihova ku ẹwẹn ọfuanfon rọyen ku vwe rere mi se vwo ghwoghwo iyẹnrẹn esiri na.’ Die yen eta nana mudiaphiyọ? O mudiaphiyọ nẹ dede nẹ ihwo guọnọ mrẹ iruo igbunu rẹ Jesu, oboresorọ e vwo ku ẹwẹn ọfuanfon na kuo ọyen o vwo ghwoghwo iyẹnrẹn esiri na. Ọ da ta kẹ ihwo re kerhọ kẹ: ‘Nonẹna, aroẹmrẹ nana rugba re.’

Jesu de rhe kpo Urhie rẹ Galili, etiyin ọ da mrẹ idibo rọyen ẹne re dia ihwiyerin. O de se ayen: ‘Ovwan nene uvwe, mi che ru ovwan phiyọ ihwiyerin rẹ ihwo.’ Edẹ rayen yen Pita, Andru, Jems, kugbe Jọn. Ugege yena, ayen da yanjẹ iruo rẹ iyerin ehwe rayen vwo, ayen de nene. Ayen da yan nene Galili eje, jẹ ayen ghwoghwo Uvie rẹ Jihova. Ayen ghwoghwo ota na vwẹ uwevwin ẹga, eki, kugbe irhuvwu. Ihwo buebun da yan nene ayen kpo kasan kasan ayen rare. Usi rẹ Jesu da ro asan eje, ji tobọ te Siria.

Ọke vwọ yanran na, Jesu da vwẹ ẹgba kẹ idibo rọyen evo ayen se vwo sivwin ihwo je djẹ ẹwẹn rẹ Idẹbono nẹ ihwo oma. Efa nenire ọke ro vwo ghwoghwo nẹ orere kpo orere, nẹ ọko kpo ọko. Eya evo re fuevun kerẹ Meri rẹ ohwo ri Magdala, Joana, Suzana, kugbe ihwo efa je vwẹrote Jesu vẹ idibo rọyen.

Jesu vwo yono idibo rọyen nu, o de ji ayen kpo iruo aghwoghwo na. Rẹ ayen vwọ yan nene Galili na, ihwo efa buebun da rhe dia idibo rẹ Jesu, e de ji bru ayen phiyame. Rọ vwọ dianẹ ihwo buebun guọnọ dia idibo na, Jesu da vwẹ ayen vwo dje udju ro te evuọn re. Ọ da ta: ‘Nẹrhovwo rere Jihova ji ewiowian buebun ro udju na.’ Ọ da rhoma sane idibo 70, o de ji  ayen yanran ivivẹ nẹ ayen re ghwoghwo vwẹ Judia eje. Ayen yono kohwo kohwo kpahen Uvie na. Idibo na vwo rhivwin rhe, ayen de gbikun rẹ obo re phiare kẹ Jesu vẹ omavwerhovwẹn. Idẹbono sa dobọ rẹ iruo aghwoghwo na ji-i.

Jesu guọnọre nẹ idibo rọyen ruiruo aghwoghwo na kpobarophiyọ siẹrẹ o de rhivwin kpo odjuvwu nu. Kọyensorọ ọ vwọ vuẹ ayen: ‘Ovwan ghwoghwo iyẹnrẹn esiri na ro akpọeje. Yono ihwo Ota rẹ Ọghẹnẹ, wo ji bru ayen phiyame.’