Tavwen a ke mrẹ orẹ rẹ Ọwanvrẹn rẹ 32 C.E., iyinkọn na de nẹ iruo aghwoghwo na rhe. Oma rhọ ayen mamọ, ọtiọyena Jesu vẹ ayen da ro okọ kpo Bẹtsaida rere ayen rovwoma. Okọ na vwọ joma te orere na, Jesu da rhe mrẹvughe nẹ ihwo uriorin buebun nene ayen. Dede nẹ Jesu vẹ idibo rọyen guọnọ ronvwoma, o rhiabọdede ihwo na. O de sivwin ihwo re muọga, o de ji yono ayen. Nẹ urhiọke re te ovwọnvwọn yen Jesu vwo yono ayen kpahen Uvie rẹ Ọghẹnẹ. Ovwọnvwọn vwo te, iyinkọn na de bro rhe, ayen da ta kẹ: ‘Owẹnvwe hwe ihwo na re. Jẹ ayen kpo rere ayen ra guọnọ emu re.’

Jesu da ta: ‘O rhe fo nẹ ayen kpo-o. Ovwan vwẹ emu kẹ ayen.’ Iyinkọn na da ta: ‘Wọ guọnọre nẹ avwanre ra dẹ emu kẹ ayen?’ Filip da ta: ‘Avwanre da tobọ vwo igho buebun dede, avwanre cha sa dẹ emu rọ cha vọn ihwo buebun nana evu-un.’

Jesu da nọ ayen: ‘Emu vọ yen herọ?’ Andru da ta: ‘Ibrẹdi iyorin vẹ emerin ivẹ. Ọ cha nama te kakaka-a.’ Jesu da ta: ‘Vwẹ ibrẹdi vẹ erin na kẹ vwẹ.’ Ọ da vuẹ ihwo na nẹ ayen chidia odi na ẹkoẹko, evo ihwo 50 efa ke rha hẹ ihwo 100. Jesu da reyọ ibrẹdi vẹ erin na, o de ni odjuvwu, ọ da nẹrhovwo. Ọ da vwẹ emu na kẹ iyinkọn rọyen, ayen da gharọ kẹ ihwo na. Eshare 5,000 vẹ eya kugbe emọ na eje da re, evun da nabọ vọn ayen. Iyinkọn na  de koko obo ri chekọ, ọ da vọn ekpẹrẹ 12! Ọnana igbevwunu rode, ọ dia ọtiọyen?

Oma vwerhen ihwo na mamọ, kẹ ayen guọnọ vwẹ Jesu vwo mu ovie. Ẹkẹvuọvo, Jesu riẹnre nẹ ọke rẹ Jihova cha vwọ reyọ vwo mu ovie ji te-e. Ọtiọyena, ọ da vuẹ ihwo na nẹ ayen kpo, ọ daje vuẹ iyinkọn rọyen nẹ ayen kpo ẹbẹre ochekọ rẹ Urhie rẹ Galili. Ayen da ro okọ, Jesu ọvo de kpo enu rẹ ugbenu na. Diesorọ? Kidie ọ guọnọ nẹrhovwo kẹ Ọsẹ rọyen. Otoro oborẹ owian rọyen bun te-e, Jesu je rhuẹrẹ ọke phiyọ vwọ kẹ ẹrhovwo ẹnẹ.