Ọkieje yen Jọn vwo ghwoghwo: ‘Ohwo rọ rho nọ vwẹ cha.’ Ọke rẹ Jesu vwọ hẹ omarẹ ẹgbukpe 30, o de nẹ Galili kpo Urhie rẹ Jọdan, asan rẹ Jọn de bru ihwo phiyame. Jesu guọnọre nẹ Jọn bru ọyen phiyame, ẹkẹvuọvo Jọn da ta: ‘Ọ dia omẹvwẹ yen ofori nẹ o bru we phiyame-e. Wẹwẹ yen che bru vwe phiyame.’ Jesu da vuẹ Jọn: ‘Jihova guọnọre nẹ wo bru vwe phiyame.’ Ọtiọyena, ayen da ro Urhie rẹ Jọdan, Jọn de duvwun Jesu phiyọ ame na kare kare.

Jesu vwo vrẹn nẹ ame na rhe, ọ da nẹrhovwo. Ugege yena, odjuvwu na de rhiephiyọ, ẹwẹn ọfuanfon rẹ Ọghẹnẹ de wontọ bro rhe kerẹ inekuku. Jihova da ta eta nana nẹ odjuvwu rhe: “Wọwẹ hẹ Ọmọ Mẹ ro jevwe rẹ ivun rọye vwerhe ovwẹ na.”

Jesu da rhe dia Kristi yẹrẹ Mesaya na ọke rẹ ẹwẹn ọfuanfon rẹ Jihova vwo bro rhe. Asaọkiephana, ọ cha ton iruo rẹ Jihova vwọ kẹ vwẹ otọrakpọ na phiyọ re.

E ghwe vwo brophiyame nu, Jesu da ro aton ọ da dia oboyin ẹdẹ 40. O vwo rhivwin rhe, ọ da ra mrẹ Jọn. Jesu vwo siẹkẹrẹ Jọn, Jọn da ta: ‘Ọnana yen Omogegede rẹ Ọghẹnẹ rọ ghwa imwemwu rẹ akpọ na no.’ Jọn vwẹ eta nana vwọ vuẹ ihwo nẹ Jesu yen Mesaya na. Wọ riẹn obo re phia kẹ Jesu ọke rọ vwọ hẹ aton na? E jẹ e yono kpahọn.