Jesu rhe akpọ na rhi ghwoghwo iyẹnrẹn esiri rẹ Uvie rẹ Ọghẹnẹ. Jihova vwẹ ẹgba kẹ Jesu vwo ru emu igbevwunu rere a riẹn obo ro che ru ọ da rhe dia Ovie. O se sivwin kọga kọga ejobi. Asan eje rọ rare yen ihwo re muọga vwo bro cha, o mi sivwin ayen. Irhuẹro ke mrorẹ, idin ki nyẹme, ikpono ke yan, ihwo rẹ ẹwẹn rẹ Idẹbono kpokpo ke mrẹ usivwin. Ayen da tobọ djobọte ẹroro rẹ ewun rọyen, oma rayen ko kpo. Ihwo nene Jesu kpo kasan kasan rọ rare. Ọ da tobọ guọnọ rovwonma, ọ djẹ ihwo nẹ oma-a.

O vwo ọke ọvo, ihwo vwo mu okpono ọvo rhe uwevwin rẹ Jesu hepha ọke yena. Ẹkẹvuọvo, ihwo vọn uwevwin na, ayen rha sa ruo-o. Ọtiọyena, ayen de rhie asan ọvo vwẹ obenu rẹ uwevwin na, etiyin ayen wan mu ọshare na te asan rẹ Jesu hepha. Jesu da ta kẹ ọshare na: ‘Vrẹn, wọ yan.’ O de ghini vrẹn, o de gbe ihwo na eje unu.

Ọke ọfa Jesu vwọ ro ọko ọvo, eshare ihwe re họvwọn oti de mudia asan oshesheri, jẹ ayen kperẹ: ‘Jesu, sivwin avwanre!’ Vwẹ ọke yena, ihwo re họvwọn oti siẹkẹrẹ ihwo efa-a. Jesu da vuẹ eshare na nẹ ayen kpo uwevwin ẹga na kidie Urhi rẹ Ọghẹnẹ tare nẹ ayen ru ọtiọyen siẹrẹ e de sivwin ayen nu. Ayen vwọ hẹ idjerhe yanran, oma rayen de ghwe kpo.  Ọvo usun rayen vwọ mrẹ nẹ oma rọyen kpore, o derhivwin rhe kpẹvwẹ Jesu ji jiri Ọghẹnẹ. Usun rẹ ihwo ihwena, ọvuọvo nana yen kpẹvwẹ Jesu.

Aye ọvo rọ muọga vwẹ ẹgbukpe 12 re, guọnọ usivwin. Ọ da ro uherevie rẹ ihwo buebun ri nene Jesu na, o de djobọte ẹroro rẹ ewun rẹ Jesu. Siẹvuọvo na, oma rọyen de kpo. Ọtiọyena, Jesu da ta: “Ono vwẹ obọ te vwe?” Oshọ de mu aye na, o de bro rhe, ọ da vuẹ uyota na. Jesu da ta ota kẹ vẹ upho bọrọ bọrọ: ‘Ọmọtẹ, yanran vwọrẹ ufuoma.’

Osun ọvo re se Jairọs je rẹ Jesu: ‘Yanrhe uwevwin mẹ! Oma rẹ ọmọtẹ mẹ ganre kakaka-a.’ Ẹkẹvuọvo, bẹsiẹ Jesu ki te uwevwin rẹ Jairọs, jẹ ọmọtẹ na ghwure. Jesu vwo te uwevwin na, ọ da mrẹ ihwo buebun re viẹ. Jesu da vuẹ ayen: ‘Ovwan viẹ-ẹ, ọmọ na de vwerhẹn.’ Ọ da yọnrọn obọ rẹ ọmọ na, ọ da ta: ‘Ọmọtẹ, vrẹn.’ Ọmọ na de vrẹn chidia, Jesu da vwẹ ọmọ na kẹ ọsẹ vẹ oni rọyen rere ayen vwẹ emu kẹ. Oma nabọ vwerhen ọsẹ vẹ oni na mamọ.