Vwẹ omarẹ April ukpe rẹ 30 C.E., Jesu de kpo Jerusalẹm. Ihwo buebun rhe orere na vwọ kẹ orẹ rẹ Ọwanvrẹn. E de ruẹ orẹ na, ihwo buebun vwẹ eranvwe vwo ze izobo vwẹ uwevwin ẹga na. Ihwo evo muẹ eranvwe rayen cha, efa dẹ eranvwe vwẹ Jerusalẹm.

Jesu vwọ ro uwevwin ẹga na, ọ da mrẹ ihwo re shẹ eranvwe vwẹ etiyin. Ayen chueki vwẹ uwevwin ẹga rẹ Jihova! Die yen Jesu ruru? Ọ da vwẹ ufi vwo ru uphiaphia, ọ da djẹ igegede vẹ eranvwe na nẹ uwevwin ẹga na. Ọ da gere imẹjẹ rẹ ihwo ri wene igho na she, o de ku igho rayen kuotọ. Jesu da vuẹ ihwo re  shẹ inekuku na: ‘Ovwan mu erọnvwọn nana nẹ etinẹ! Ovwan vwẹ uwevwin rẹ Ọsẹ mẹ vwo ruẹ eki-i!’

Ihwo rehẹ uwevwin ẹga na vwọ mrẹ oborẹ Jesu ruru, o de gbe ayen unu. Idibo rọyen da karophiyọ aroẹmrẹ rọ ta kpahen Mesaya na nẹ, ‘Mi che vwo oruru ọgangan kpahen uwevwin rẹ Jihova.’

Vwẹ ukpe rẹ 33 C.E., Jesu da rhoma ru uwevwin ẹga na fon ọ rẹ abọ rivẹ. Ọ vwẹ uphẹn kẹ ohwo vuọvo nẹ ọ vwẹ ẹro ri saka vwo ni uwevwin rẹ Ọsẹ rọye-en.