Jesu vwọ sane iyinkọn 12 na nu, o de wontọ nẹ ugbenu na rhe asan rẹ ihwo buebun vọnre. Ihwo na nẹ asan sansan rhe; Galili, Judia, Taya, Saidọn, Siria, vẹ ẹbẹre ochekọ rẹ Jọdan. Ayen mu ihwo re muọga sansan rhe kugbe ihwo rẹ ẹwẹn rẹ Idẹbono kpokpo. Jesu de sivwin ayen eje. O de chidia vwẹ okoko rẹ ugbenu na, o de yono ihwo na. O dje oborẹ avwanre ru a sa vwọ dia ugbeyan rẹ Ọghẹnẹ. Ofori nẹ a mrẹvughe nẹ avwanre guọnọ Jihova vwẹ akpeyeren avwanre, e mi ji vwo ẹguọnọ rọyen. Ẹkẹvuọvo, e che se vwo ẹguọnọ rẹ Ọghẹnẹ siẹrẹ e de vwo utuoma kpahen ihwo efa-a. Ofori nẹ e dje uruemu esiri kẹ ihwo eje tobọ ji te ivwighrẹn avwanre.

Jesu da ta: ‘Ọ dia igbeyan wẹn ọvo yen wo vwo ẹguọnọ kpahe-en. O ji fo nẹ wo vwo ẹguọnọ rẹ ivwighrẹn wẹn, wo mi ji vwo ghovwo ihwo vwo nẹ otọ rẹ ubiudu wẹn rhe. Wo de gbe ohwo ku,  bro ra kpakpata wo yovwunu kẹ. Obo wọ guọnọre nẹ e ru kẹ wẹ ọyen wo ji ru kẹ ihwo.’

Jesu je vwẹ omamọ uchebro kẹ ayen kpahen ekuakua rẹ akpọ na. Ọ da ta: ‘A vwọ dia ugbeyan rẹ Jihova ghanre nọ e vwo vwo igho buebun. Oji se cho igho wẹn, ẹkẹvuọvo, ohwo vuọvo che se cho oyerinkugbe wẹn vẹ Jihova-a. Wọ ro ẹnwan kpahen obo wọ cha re, obo wọ cha da, yẹrẹ iwun wo che kuphiyọ-ọ. Ni ephran na. Ọghẹnẹ yen vwẹ emu kẹ ayen. Ẹnwan che se phiba uche ọke wọ cha dia akpọ na te-e. Karophiyọ nẹ Jihova riẹn obo wọ guọnọre.’

Ihwo na je mrẹ ohwo ọfa rọ ta ota kerẹ Jesu-u. Ilori ẹga rayen se yono ayen erọnvwọn nana-a. Diesorọ Jesu vwọ dia omamọ oyono? Kidie obo rẹ Jihova yen erọnvwọn na eje ro yonori na nurhe.