Irherẹn na de mu Jesu kpo asan rẹ osun na. Pailet da nọ ayen: ‘Die yen ọshare nana ruru?’ Ayen da ta: ‘O se oma rọyen ovie!’ Pailet da nọ Jesu: “Wẹ hẹ ovie ri Ju na?” Jesu da kpahen kẹ: “Uvie mẹ dia ọ rẹ akpọ nana-a.”

Pailet da tanẹ e mu Jesu bru osun rẹ Galili re se Herọd, sẹ ọ cha mrẹ orọnvwọn ọvo vwọ yọnrọn. Herọd mrẹ emu vuọvo rẹ Jesu ru chọ-ọ, ọ da rhoma tanẹ e muo rhe Pailet. Pailet da vuẹ ihwo na: ‘Me vẹ Herọd mrẹ emu vuọvo rẹ ọshare nana ruru-u. Mi che siobọno.’ Ihwo na de kperi: ‘Jo ghwu! Jo ghwu!’ Isodje na da fa, ayen de dje enya kuo, je ghwiẹ. Ayen de phi erhu rẹ idjigbẹ phiyọ uyovwin rọyen, kẹ ayen reyọ vwọ jehwẹ ayen vwọ ta: ‘Do, Ovie rẹ Ju.’ Pailet da rhoma vuẹ ihwo na: ‘Me mrẹ emu vuọvo rẹ ọshare nana ruru-u.’ Ayen de kperi: ‘Kanrọ mu urhe roja!’ Pailet de siobọno kẹ ayen.

Isodje na de muo kpo asan re se Gọlgọta, ayen da kanrọ mu urhe roja, ayen da kpare urhe na mudia. Jesu da nẹrhovwo: ‘Ọsẹ, vwo ghovwo ayen, kidie ayen riẹn oborẹ ayen ruẹ-ẹ.’ Ihwo ke vwẹ Jesu vwọ jehwẹ, ayen vwọ ta: ‘Wọ da dia Ọmọ rẹ Ọghẹnẹ, wontọ nẹ urhe roja na! Sivwin oma wẹn.’

Ọvo usun rẹ iji ra je kanre mu urhe roja da ta: “Karohọ ovwẹ vwẹ ọke wo de te uvie rẹ ogangan wẹn na.” Jesu de ve kẹ: “Me vẹ owẹ dia vwi Paradais.” Oghẹruvo vwo te, ebri de mu vwẹ otọ na inọke erha. Evo usun rẹ idibo na mudia kẹrẹ urhe roja na, ji te Meri, oni rẹ Jesu. Jesu da vuẹ Jọn nẹ ọ vwẹrote Meri kerẹ oni robọ rọyen.

Ukuotọ rọyen, Jesu da ta: “O reri.” O de phi uyovwin phiyotọ, ọ da wẹn ẹwẹn rọ koba rọyen. Siẹvuọvo na, otọ na de kpogho gangan. Vwẹ uwevwin ẹga na, amwa ra vwọ ghare  asan rọ Foro vwo nẹ asan rọ Ma Fon na, da bẹrẹ kpo ẹkẹn ivẹ. Isodje ọvo da ta: ‘Ọnana ghini Ọmọ rẹ Ọghẹnẹ.’