Jesu vẹ idibo rọyen yan wan Iyara rẹ Kidrọn kpo Ugbenu rẹ Oliv. Uherevie ason wanre, emeranvwe na je nabọ vọn. Ayen vwo te ogba rẹ Gẹtsimani, Jesu da vuẹ ayen: “Ovwan tidia etinẹ, ovwan rhẹrẹ.” Jesu da yan ro ogba na emerha, o de shiguẹ. Fikirẹ ẹdia ọgangan rọ hepha na, ọ da nẹrhovwo kẹ Jihova: “Ru ẹguọnọ wẹn.” Jihova de ji amakashe nẹ ọ rhe bọn Jesu gan. Jesu vwo rhivwin bru iyinkọn na ra, ọ da mrẹ nẹ ayen vwerhẹn. Ọ da ta: ‘Ovwan vrẹn! Ọnana dia ọke ra vwọ vwerhẹ-ẹn! Ọke rẹ ivwighrẹn mẹ vwo mu vwe tere.’

O rhe kri-i, Judas da yanrhe vẹ ihwo buebun ri mu elọkọ vẹ ibrirhe. Ọ riẹn asan rọ da sa mrẹ kidie Jesu vẹ ayen cha ogba nana ọkieje. Judas vuẹ isodje na nẹ o che dje Jesu kẹ ayen. Ọ da yan bru Jesu ra, ọ da ta: ‘Do, Oyono,’ ọ da fiọnfiọn unu rọyen. Jesu da ta: ‘Judas, unuẹfiọnfiọn yen wọ vwọ shẹ vwẹ?’

Jesu da yan kpo obaro, ọ da nọ ihwo na: “Ono ovwan guọnọ?” Ayen da ta: “Jesu ri Nazarẹt.” Ọ da kpahen kẹ ayen: “Mẹvwẹ hẹ ọye,” eshare na de siomauko ayen de she totọ. Jesu da rhoma nọ ayen: “Ono ovwan guọnọ?” Ayen da rhoma ta: “Jesu ri Nazarẹt.” Jesu da kpahen: ‘Me vuẹ ovwan nẹ mẹvwẹ yen ohwo na. Yanjẹ eshare nana vwo ayen yanran.’

Pita vwọ mrẹ obo re phia, ọ da vwẹ ọlọkọ vwo bru orhọ rẹ Makọs rọ dia ọviẹn rẹ orherẹn rode na. Jesu de djobọte orhọ rẹ ọshare na, o de sivwon. Ọ da vuẹ Pita: ‘Phi ọlọkọ wẹn phiyọ asan wo siro nu. Wọ da vwẹ ọlọkọ vwọ họnre, ọlọkọ yen e ji che  vwo hwe we.’ Ihwo na de mu Jesu ayen da gba abọ rọyen, iyinkọn na da djẹ. Ayen de muo bru Anas ra, rọ dia orherẹn na. Anas da nọ Jesu enọ, ọ da tanẹ e muo bru Orherẹn Rode na ra, re se Kaifas. Ẹkẹvuọvo, die yen phia kẹ iyinkọn na?