Ẹdẹ ihwe vwọ wan rẹ Jesu vwo kpo odjuvwu nu, e de ku ẹwẹn ọfuanfon na ku idibo na. Ọnana phiare vwẹ Pẹntikọst 33 C.E., ihwo nẹ asan sansan rhe Jerusalẹm vwọ kẹ orẹ na. Omarẹ idibo rẹ Jesu 120 yen kokori vwẹ uwevwin ọvo. Siẹvuọvo na, emu rẹ igbevwunu ọvo da phia. Orọnvwọn ọvo kere erhanre de mudia vwẹ enu rẹ uyovwin rẹ idibo na ọvuọvo, kẹ ayen jẹ ephẹrẹ sansan. Edo ọgangan ọvo kerẹ ogiribo da vọn uwevwin na.

Ihwo ri nẹ ẹkuotọ efa rhe na de nyo edo na, ayen da djẹ ro uwevwin na ra mrẹ obo re phia. O gbe ayen unu rẹ ayen vwọ mrẹ idibo na re jẹ ephẹrẹ sansan. Ayen da ta: ‘Enana ihwo rẹ Galili. Kẹ mavọ ayen sa vwọ jẹ ephẹrẹ rẹ avwanre?’

Etiyin Pita vẹ iyinkọn na de mudia vwẹ obaro rẹ ihwo na. Pita da vuẹ ihwo na kpahen obo re hwe Jesu wan kugbe oborẹ Jihova kpaerọ nushi. Pita da ta: ‘Asaọkiephana, Jesu chidia  vwẹ obọrhen rẹ Ọghẹnẹ vwẹ odjuvwu,o de siobọnu ẹwẹn ọfuanfon na rhekirobo ro veri. Kọyensorọ ovwan vwọmrẹ igbevwunu nana.’

Eta rẹ Pita na te ihwo na ubiudu mamọ, ayen da nọ: “Kidie avwanre che ru?” Pita da vuẹ ayen: ‘Ovwan kurhẹriẹ nẹ imwemwu rẹ ovwan rere ovwan bromaphiyame vwẹ odẹ rẹ Jesu. Ovwan je cha mrẹ okẹ rẹ ẹwẹn ọfuanfon na.’ Ẹdẹ yena, ihwo ri te omarẹ 3,000 de bromaphiyame. Nẹ ọke yena yanran, idibo na ki buẹnphiyọ mamọ vwẹ Jerusalẹm. Womarẹ ukẹcha rẹ ẹwẹn ọfuanfon na, iyinkọn na da vwẹ ikoko buebun vwo mu rere ayen se vwo yono idibo na erọnvwọn eje rẹ Jesu tare.