Ọshare ọvo rọ dia ukpono chidia vwẹ anurhoro rẹ uwevwin ẹga na kẹdẹ kẹdẹ rọ vwọ yare igho. Oghẹruvo ọvo, ọ da mrẹ Pita vẹ Jọn re ro uwevwin ẹga na. Ọ da vuẹ ayen: ‘Biko kẹ vwẹ igho.’ Pita da ta: ‘Mi vwo orọnvwọn ro yovwin nọ igho re me cha kẹ wẹ. Vwẹ odẹ rẹ Jesu, vrẹn wọ yan!’ Pita da yọnrọn ọshare na vrẹn, ọshare na da yan! Oma da vwerhen ihwo eje rehẹ etiyin kpahen igbevwunu nana, ọ da nẹrhẹ ihwo buebun rhe dia idibo.

Ẹkẹvuọvo ivun de miovwo irherẹn vẹ ihwo rẹ Sadiusi na mamọ. Ayen de mu iyinkọn na kpo aguare, ayen da ta: ‘Ono yen kẹ ovwan ẹgba rẹ ovwan se vwo sivwin ọshare nana?’ Pita da ta: ‘Jesu Kristi rẹ ovwan hweri na yen kẹ avwanre ẹgba.’ Ilori ẹga na da van ku ayen: ‘Ovwan rha ta ota kpahen Jesu-u!’ Ẹkẹvuọvo iyinkọn na da ta: ‘Avwanre che se fotovwi-in. Avwanre cha ta ota kpahọn.’

E vwo siobọnu Pita vẹ Jọn nu, ayen de bru idibo ichekọ na ra, ayen da vuẹ ayen obo re phiare. Ayen de kuomakugbe yare Jihova: ‘Biko kẹ avwanre uduefiogbere rere avwanre se vwo ruiruo nana ọkieje.’ Jihova da kẹ ayen ẹwẹn ọfuanfon na, ayen de ruiruo aghwoghwo na, ji sivwin ihwo re muọga. Ihwo buebun da rhe vwomaba ayen. Ihwo rẹ Sadiusi na ke rioma kpahen ayen te ẹdia rẹ ayen de mu iyinkọn na phiyọ uwodi. Ẹkẹvuọvo, vwevunrẹ ason Jihova de ji amakashe ọvo rhi rhie ẹchẹ rẹ uwodi na, ọ da vuẹ iyinkọn na: ‘Ovwan rhivwin kpo uwevwin ẹga na, ovwan re yono ihwo na.’

Ọke vwo rhie, a da vuẹ aguare rẹ ilori rẹ ẹga na re se Sanhedrin nẹ, ‘A kanre uwodi na, ẹkẹvuọvo ihwo re muru na rha herọ-ọ! Ayen yono ihwo vwẹ uwevwin ẹga na!’ A da rhoma mu iyinkọn na rhe Sanhedrin na. Orherẹn rode na da ta: ‘Avwanre vuẹ  ovwan nẹ ovwan rha ta ota kpahen Jesu-u!’ Pita da kpahen: “Avwanre se mu ọghọ kẹ Ọghẹnẹ nọ ihwo rẹ akpọ.”

Ophu de mu ilori rẹ ẹga na mamọ te ẹdia rẹ ayen ke guọnọ hwe iyinkọn na. Ẹkẹvuọvo, ohwo ri Farisi ọvo re se Gameliẹl da ta: ‘Ovwan jomaotọ! Ọ sa dianẹ Ọghẹnẹ vẹ ihwo nana herọ. Ovwan che nene Ọghẹnẹ họnre?’ Ayen da reyọ uchebro na. Ayen vwọ fa iyinkọn na nu, ayen da rhoma vuẹ ayen nẹ ayen rhe ghwoghwo ota na-a, e de siobọnẹ ayen. Ẹkẹvuọvo, iyinkọn na dobọji-i. Ayen ji fiudugberi ghwoghwo iyẹnrẹn esiri na vwẹ uwevwin ẹga na vẹ nẹ uwevwin kpo uwevwin.