Oyan rẹ aghwoghwo rerha rẹ Pọl kuphiyọ vwẹ Jerusalẹm. E muro phiyọ uwodi vwẹ etiyin. Vwẹ ason ọvo, Jesu da vuẹ vwẹ emramrẹ nẹ, ‘Wo ji che kpo Rom re ghwoghwo.’ E mu Pọl vwo nẹ Jerusalẹm kpo Sizaria, ọ da dia uwodi ẹgbukpe ivẹ vwẹ etiyin. Ọke rẹ Osun Fẹstọs vwo guẹdjọ rọyen, Pọl da ta: ‘Me guọnọre nẹ Siza guẹdjọ mẹ vwẹ Rom.’ Fẹstọs da ta: “Wo mu ẹdjọ wẹn rhe Siza nure; obori Siza kọyen wọ cha ra.” E de mu Pọl phiyọ okọ ro kpo Rom, Inenikristi ivẹ Luk vẹ Aristakọs de nene.

Ayen vwo biẹ yanran, odju ọgangan de dju vwẹ ẹdẹ buebun. Ayen ejobi de roro nẹ ayen che ghwu. Ẹkẹvuọvo Pọl da ta: ‘Wan kerhọ, amakashe ọvo vuẹ vwẹ vwẹ evwerhẹn nẹ, “Wọ djoshọ-ọ, Pọl. Wo che te Rom, emu ọvuọvo che ru ohwo vuọvo vwẹ okọ na-a.” Je fiudugberi! Avwanre che ghwu-u.’

Odju ọgangan na de dju ẹdẹ 14. Ukuotọ rọyen, ayen da kpaẹro mrẹ otọ. Ọyen orere ame riariẹ phiyọ re se Mọlta. Okọ na de djotọ ọ da guọghọ ibribro, ẹkẹvuọvo emu vuọvo ruẹ ihwo ri te 276 rehẹ okọ na-a. Evo rhẹrhẹre, efa da jabọ mu ephapha yẹrẹ ẹbẹre okọ na vwọ rhẹrhẹ te ugbenu. Ihwo rẹ Mọlta na de koko erhanre phiyọ kẹ ayen rere oma rayen vwọ sasa, ayen da je nabọ vwẹrote ayen.

Emeranvwe erha vwọ wan nu, isodje na de phi Pọl phiyọ okọ ọfa ro kpo Rom. Iniọvo na de rhi dede ọke ro vwo te oboyin. Pọl da kpẹvwẹ Jihova rọ vwọ mrẹ iniọvo na, udu rọyen da gan. A vwẹ uphẹn kẹ Pọl nẹ ọ diẹ uwevwin ra rhuẹrẹ phiyọ kẹ, jẹ isodje ọvo rhẹrẹ, dede nẹ uwodi yen ofori nẹ ọ dia. Ọ da dia etiyin ẹgbukpe ivẹ. Ihwo da kọn bro rhe, kọ vwẹ uphẹn yena vwọ vuẹ ayen kpahen Uvie rẹ Ọghẹnẹ, o mi ji yono ayen kpahen Jesu. Pọl ji si ileta vwo rhe ikoko rehẹ ubrakpọ rẹ Esha vẹ Judia. Vwọrẹ uyota, Jihova reyọ Pọl vwo ghwoghwo iyẹnrẹn esiri na vwọ ro ẹgborho buebun.