Jihova veri nẹ, ‘Oviẹ, emiavwe, ọga, yẹrẹ ughwu che no. Ki mi ririe ameoviẹ nẹ ẹro rayen. A rha cha karophiyọ erọnvwọn ebrabra eje re phia na-a.’

Jihova phi Adam vẹ Ivi phiyọ ogba rẹ Idẹn rere ayen dia vwọrẹ ufuoma vẹ omavwerhovwẹn. Ofori nẹ ayen ga Jihova ji vwiẹ akpọ na vọn. Ẹkẹvuọvo Adam vẹ Ivi nyupho rẹ Jihova-a, jẹ ọhọre rọyen ji rhi wene-e. Vwẹ ọbe nana, avwanre mrẹre nẹ kemu kemu rẹ Ọghẹnẹ veri eje ruẹgba. Kirobo ro ve kẹ Ebraham, Uvie Rọyen cha hwarhiẹ ebruphiyọ rode rhe akpọ na.

O rhe che kri-i, Eshu vẹ emekashe rọyen kugbe ihwo ebrabra eje che no. Kohwo kohwo cha ga Jihova. Avwanre gbe honvwọn ọga yẹrẹ ghwu-u. Ukperẹ ọtiọyen, kẹdẹ kẹdẹ, avwanre ki che vrẹn sasasa vẹ omavwerhovwẹn. Akpọ na che  hirhiephiyọ iparadaisi. Ihwo eje ke cha re omamọ rẹ emu je dia omamọ rẹ uwevwin. Ihwo ke cha dia dẹndẹn, uruemu ozighi ko che no. Avwanre rha cha djoshọ rẹ eranvwe re djoma nonẹna-a, ayen je cha djoshọ rẹ avwanre-e.

Oma cha vwerhen avwanre mamọ ọke rẹ Jihova cha vwọ rhọvwọn ihwo ri ghwuru nushi. Avwanre ki che dede ihwo kerẹ Ebel, Noa, Ebraham, Sera, Mosis, Rutu, Ẹsta, kugbe Devid. Avwanre vẹ ayen cha ru Akpọ na phiyọ iparadaisi. Ewian buebun re kẹ ohwo omavwerhovwẹn cha dia.

Jihova guọnọre nẹ wọ dia evunrẹ akpọ kpokpọ na. Ku wọ cha riẹn Jihova mamọ vrẹ obo wo rori. Ọtiọyena, e jẹ e sikẹrẹ Jihova kẹdẹ kẹdẹ rhirin bẹdẹ bẹdẹ!