Noa, orua rọyen, vẹ eranvwe na da ro okọ na. Jihova da kanre ẹchẹ rẹ okọ na, osio na da tonphiyọ. Osio na ganre mamọ, okọ na ko phorhẹ. Ukuotọ rọyen, akpọneje da rhe vọn vẹ ame. Irumwemwu na eje de ghwu. Ẹkẹvuọvo, Noa vẹ orua rọyen hẹ evunrẹ okọ na. Oma vwerhen ayen mamọ kidie ayen nyupho rẹ Jihova.

Osio na rhọre vwẹ ẹdẹ 40, ọ ke rhe dobọji. Ememerha na, ame na ko kpotọ. Ukuotọ rọyen, okọ na da domaji vwẹ enu rẹ ugbenu. Ẹkẹvuọvo, ame je vọn asan eje, ọtiọyena, Noa vẹ orua rọyen che se wontọ nẹ okọ na-a.

Ọke vwọ yanran na, ame na da rhe kpọ. Noa vẹ orua rọyen dia evunrẹ okọ na omarẹ ẹgbukpe ọvo. Jihova da vuẹ ayen nẹ ayen wontọ nẹ okọ na. Oma vwerhen ayen nẹ Jihova sivwin ayen, ayen de ze izobo kẹ Jihova.

Jihova rhiabọreyọ izobo rayen. O de ve nẹ ọ rha cha vwẹ ame vwọ ghwọrọ kemu kemu rọhẹ otọrakpọ na ọfa-a. Ọ da vwẹ aphoro phia kerẹ oka rẹ ive rọyen na. Wọ mrẹ aphoro dẹvure?

Jihova da vuẹ Noa vẹ orua rọyen nẹ ayen vwiẹ, ayen vọn otọrakpọ na.