Jihova ve kẹ Jekọp nẹ ọyen cha sẹro rọyen kirobo rọ sẹro rẹ Ebraham vẹ Aizik. Jekọp kua kpo Haran, oboyin ọ da rọvwọn ji vwo orua rode, ọ da je dia ọdafe.

Jihova da vuẹ Jekọp: ‘Rhivwin kpo orere wẹn.’ Jekọp vẹ orua rọyen de mu oyan ogrongron nana phiyọ. Ayen vwọ hẹ idjerhe, idibo rẹ Jekọp de bro rhe, ayen da vuẹ: ‘Oniọvo wẹn Isọ cha, ọ vẹ eshare 400.’ Oshọ mu Jekọp mamọ kidie o roro nẹ Isọ che gboja kẹ vẹ orua rọyen. Ọ da nẹrhovwo kẹ Jihova: ‘Biko sivwin uwe nẹ abọ rẹ oniọvo mẹ.’ Ọke vwo rhie, Jekọp da vwẹ igegede, ẹvwe, inama, ikamẹl, vẹ ekẹtẹkẹtẹ vwo rhe Isọ.

Ason yena, Jekọp ọvo vwọ herọ, ọ da mrẹ amakashe! Amakashe na de nene muabọ rhi duvwun urhiọke. Dede nẹ ọ wan Jekọp oma, Jekọp je yọnrọn kokoroko. Amakashe na da ta: ‘Ju vwe yanran.’ Ẹkẹvuọvo, Jekọp da ta: ‘Ẹjo, jokpanẹ ku wọ kẹ vwẹ ebruphiyọ.’

Ukuotọ rọyen, amakashe na da vwẹ ebruphiyọ kẹ Jekọp. Jekọp de rhi vwo imuẹro nẹ Jihova cha sa vwẹ uphẹn kẹ Isọ nẹ o ruo emu vuọvo-o.

Ọke vwo rhie muotọ, Jekọp da kpaẹro mrẹ Isọ vẹ eshare 400 na. Jekọp da yanran ra vwẹ uyovwin kpotọ vwọ kẹ abọ  ighwrẹn, jẹ orua rọyen vwọ kpahọn. Isọ da djẹ brora, ọ da gbanọ. Ameoviẹ de nẹ ẹro rayen ivẹ rhe, ayen da rhuẹrẹ kugbe. Mavọ yen wo rorori nẹ oma ru Jihova rọ vwọ mrẹ oborẹ Jekọp ruru vwẹ ẹdia nana?

Isọ de kpo uwevwin rọyen, Jekọp de rhe kpo asan rọ ra. Jekọp vwo emeshare 12. Eyehẹ Rubẹn, Simiọn, Livae, Juda, Dan, Naftali, Gad, Asha, Isaka, Zebulon, Josẹf, vẹ Benjamin. Jihova da reyọ Josẹf vwo sivwin ihwo rọyen. Wọ riẹn obo ro ruro wan? Uyono rọ vwọ kpahen ọnana cha vuẹ avwanre.