Mosis da vuẹ Fero nẹ ọyen cha rhoma mrẹ ọfa-a. Ẹkẹvuọvo, bẹsiẹ ọ ke yanran, ọ da vuẹ Fero: ‘Vwẹ uherevie ason, emekpako rẹ ihwo rẹ Ijipt eje che ghwu. Vwo nẹ ọmọkpako rẹ Fero re te emekpako rẹ eviẹn na.’

Jihova da vuẹ ihwo rẹ Izrẹl na nẹ ayen riemu rẹ oghẹresan. Ọ da vuẹ ayen: ‘Ovwan hwe ẹvwẹ yẹrẹ ogegede ro te ẹgbukpe ọvo re, ovwan vwẹ ọbara rọyen vwo ghworo anurhoro rẹ ovwan. Vwẹ eranvwe na vwọ tọn, rere ovwan reyọ vwọ re ikara ro jephuo. Ovwan ku iwun vẹ isabato ovwan phiyọ, muegbe ovwan vwo vrẹn nẹ orere na. Ason nana, mi che si ovwan nẹ orere nana.’ Wọ sa vwẹ ẹro roro oborẹ oma vwerhen ihwo rẹ Izrẹl na te?

Vwẹ uherevie ason, amakashe rẹ Jihova da ro uwevwin rẹ ihwo rẹ Ijipt na ejobi. Iwevwin ra vwẹ ọbara ghworo anurhoro rọye-en, ọmọkpako rẹ orua yena ko ghwẹ. Ẹkẹvuọvo, amakashe na wanvrẹn iwevwin ra vwẹ ọbara ghworo anurhoro rọyen. Emekpako rẹ orua rẹ ihwo rẹ Ijipt na eje de ghwu, te edafe te ivwiogbere. Jẹ ọmọ ọvuọvo rẹ ihwo rẹ Izrẹl na ghwuru-u.

Ọmọshare rẹ Fero dede ji ghwu. Ọnana vrẹ Fero oma. Kpakpata, ọ da vuẹ Mosis vẹ Erọn: ‘Vrẹn. Ovwan vrẹn  nẹ etinẹ. Ovwan yanran ra ga Ọghẹnẹ ovwan. Ovwan vẹ eranvwe rẹ ovwan yanran!’

Vwẹ ason yena rẹ emeranvwe vwo lo, ihwo rẹ Izrẹl ejobi ra nabọ rhuẹrẹphiyọ ẹkuẹko vwo nene orua vẹ uvwiẹ rayen da yan nẹ Ijipt. Ayen te eshare 600,000 kugbe eya vẹ emọ buebun. Ihwo rẹ Ijipt efa buebun ji nene ayen ra ga Jihova. E siobọnu ihwo rẹ Izrẹl re!

Ihwo rẹ Izrẹl cha riemu rẹ oghẹresan nana kukpe kukpe vwọ karophiyọ obo rẹ Jihova sivwin ayen wan. Ọnana yen se orẹ rẹ Ọwanvrẹn.