O dino te ẹgbukpe 40 re, rẹ ihwo rẹ Izrẹl vwọ hẹ aton na. Ayen phi irere buebun kparobọ re. Asaọkiephana ayen won phiyọ otọ rẹ Moab rọhẹ ẹbẹre rẹ ọnre va nẹcha rẹ Urhie rẹ Jọdan, ayen guọnọ ro Otọ rẹ Ive na re. Oshọ ko muẹ Balak, ovie rẹ Moab, kidie o roro nẹ ihwo rẹ Izrẹl cha reyọ otọ rayen. O de se ọshare ọvo re se Balaam rhe Moab rere o duvwu iyorin hwe ihwo rẹ Izrẹl na.

Ẹkẹvuọvo Jihova da vuẹ Balaam: ‘Wo duvwu iyorin hwe ihwo rẹ Izrẹl na-a.’ Ọtiọyena Balaam rha rhọnvwe ra-a. Ovie Balak da rhoma durhie, o de ve kẹ nẹ ọ cha kẹ kemu kemu rọ guọnọre eje. Dedena, Balaam je sen. Ọghẹnẹ da vuẹ: ‘Wọ sa ra, ẹkẹvuọvo obo re me vuẹ wẹ yen wọ ta.’

Balaam da ro ekẹtẹkẹtẹ rọyen ọ da djẹ kpo Moab. O muegbe ro vwo duvwu iyorin hwe ihwo rẹ Izrẹl na, dede nẹ Jihova vuẹrẹ nẹ o ruẹ ọtiọye-en. Amakashe rẹ Jihova da vwomaphia kẹ abọ erha vwẹ idjerhe. Balaam mrẹ amakashe na-a, ẹkẹvuọvo, ekẹtẹkẹtẹ rọyen mrẹrẹ. Ẹsosuọ, ekẹtẹkẹtẹ na da djẹ ro aghwa. Ọrivẹ, ọ da vwẹ oma nyẹ igbẹhẹ, ọ da phra owọ rẹ Balaam. Ukuotọ rọyen, ekẹtẹkẹtẹ na de sherhẹ uherevie rẹ idjerhe na. Abọ erha na yen Balaam vwẹ ọkpọ vwọ fa ekẹtẹkẹtẹ na.

Ọ vwọ fa ọ rẹ abọ rerha nu, Jihova da nẹrhẹ ekẹtẹkẹtẹ na ta ota. Ekẹtẹkẹtẹ na da nọ Balaam: ‘Diesorọ wọ vwọ fa vwẹ?’ Balaam da ta: ‘Wọ nẹrhẹ me họhọ ẹkpa. Manẹ kẹ ọlọkọ rhe vwe ji mi hwe we.’ Ekẹtẹkẹtẹ na da ta: ‘Rhabae mi vwo mu we na, mi ru ọtiọna dẹvure?’

Jihova da nẹrhẹ Balaam mrẹ amakashe na. Amakashe na da ta: ‘Jihova vuẹ wẹ nẹ wo duvwu iyorin hwe ihwo rẹ Izrẹ-ẹl.’ Balaam da ta: ‘Obo mi ruru na chọre. Mi che rhivwin kpo.’  Ẹkẹvuọvo amakashe da vuẹ nẹ, ‘Wo se kpo Moab, jẹ oborẹ Jihova vuẹ wẹ ọvo yen wọ ta.’

Balaam yono vwo nẹ obo re phiare na? Ẹjo. Ọyena vwọ wan nu, ọ je davwẹngba vwo duvwu iyorin hwe ihwo rẹ Izrẹl abọ erha, ẹkẹvuọvo Jihova da nẹrhẹ ọ nẹrhovwo kẹ ayen abọ erha na. Ọke vwọ yanran na, ihwo rẹ Izrẹl da kpare ofovwin kpo Moab, e de hwe Balaam. Manẹ kẹ Balaam nyẹme rẹ Jihova jovwo, o rhe ghwu?