Ihwo rẹ Izrẹl vwo vrẹn nẹ Ugbenu rẹ Sinai nu, ayen da wan aton rẹ Paran kpo Kadesh. Jihova da vuẹ Mosis vwẹ etiyin: ‘Ji eshare 12, ọvuọvo vwo nẹ orua 12 rẹ Izrẹl, rere ayen ra bẹbẹ ni otọ rẹ Kenan, otọ me cha vwọ kẹ ihwo rẹ Izrẹl na.’ Mosis da sane eshare 12, ọ da vuẹ ayen: ‘We kpo Kenan, rere ovwan re no sẹ otọ na yovwẹ emu, sẹ ihwo re dia otọ na, egba yẹrẹ evwiẹrẹ, sẹ asan ayen dia itughẹ yẹrẹ irere ride.’ Joshua vẹ Kalẹb jehẹ usun rẹ eshare 12 re ji kpo Kenan.

Ẹdẹ 40 vwọ wan nu, ayen de rhivwin rhe vẹ emamọ kerẹ owe, pomegranate kugbe otiẹ. Eshare na da ta: ‘Otọ na yovwirin, jẹ ihwo re dia otọ na egba, a je gbogba riariẹ irere na.’ Ẹkẹvuọvo Kalẹb da ta: ‘Jẹ avwanre bru ayen ra, kidie avwanre se phi ayen kparobọ!’ Wọ riẹn oboresorọ Kalẹb vwọ ta ọtiọyen? Kidie ọyen vẹ Joshua vwẹroso Jihova. Ẹkẹvuọvo eshare ri chekọ na da ta: ‘Ẹjo! Ihwo na pha kerẹ erhuaran! Avwanre pha kerẹ ebaka vwọ kẹ ayen.’

Oshọ de mu ihwo rẹ Izrẹl. Kẹ ayen brenu nẹ, ‘E jẹ a vwẹ onini ọfa mu, e rhivwin kpo Ijipt. Diesorọ avwanre vwo kpo Kenan rere e hwe avwanre kufia?’ Joshua vẹ Kalẹb da ta: ‘Ovwan  vwọso Jihova-a, we jẹ oshọ mu ovwa-an. Jihova cha chọn avwanre uko.’ Ẹkẹvuọvo ihwo rẹ Izrẹl kerhọ raye-en. Ayen tobọ guọnọ hwe Joshua vẹ Kalẹb!

Kẹ die yen Jihova ruru? Ọ da vuẹ Mosis: ‘Mi ru emu igbunu buebun kẹ ihwo rẹ Izrẹl na, dedena ayen rhọnvwa kerhọ mẹ-ẹ. Ọtiọyena, ayen cha dia evunrẹ aton ẹgbukpe 40, aton na kọyen ayen che ghwuphiyọ. Jokpanẹ emọ rayen, Joshua kugbe Kalẹb ọvo yen cha ro otọ rẹ ive na.’