Ọke evo vwọ wan nu, ihwo rẹ Izrẹl je vwọ hẹ aton na, Korah, Datan, Abiram, kugbe ihwo 250 efa da vwọso Mosis vẹ Erọn. Ayen da ta kẹ ayen: ‘Ovwan yan sheri nọ! Diesorọ wọ vwọ dia osun rẹ avwanre, Erọn ke rha dia orherẹn rode? Jihova vẹ avwanre eje herọ, ọ dia owẹ vẹ Erọn ọvo-o.’ Oma vwerhen Jihova-a. O niro nẹ ọyen komobọ yen ayen vwọso na!

Mosis da vuẹ Korah vẹ otu rọyen: ‘Ovwan yanrhe itabanako na odẹ rọ cha na, wan ghwa omoze ra vwọ torhẹ isẹnsi rhe. Jihova che dje kẹ avwanre ohwo rọ jẹreyọ.’

Odẹ vwo te, Korah kugbe eshare 250 na de bru Mosis rhe itabanako na. Ayen da torhẹ isẹnsi vwẹ etiyin kerẹ irherẹn. Jihova da vuẹ Mosis vẹ Erọn: ‘Ovwan vrẹn nẹ asan rẹ Korah vẹ otu rọyen hepha.’

Dede nẹ Korah bru Mosis rhe itabanako na, Datan, Abiram, kugbe orua rayen rhọnvwe rhe-e. Jihova da vuẹ ihwo rẹ Izrẹl nẹ ayen vrẹn nẹ itughẹ rẹ Korah, Datan, kugbe Abiram. Ugege yena, ihwo rẹ Izrẹl de vrẹn no. Ẹkẹvuọvo Datan, Abiram, kugbe  erua rayen mudia otafe rẹ utughẹ na. Siẹvuọvo na, otọ na da bẹre, o de mu ayen rọ! Erhanre de rhe nẹ odjuvwu rhe, ọ da torhẹ Korah vẹ eshare 250 vwẹ itabanako na.

Ọyena vwọ wan nu, Jihova da vuẹ Mosis: ‘Reyọ ọkpọ mie osun rẹ uvwiẹ ọvuọvo rere wo si odẹ rọyen phiyọ. Ẹkẹvuọvo, si odẹ rẹ Erọn phiyọ ọkpọ rẹ uvwiẹ rẹ Livae. Phi ekpọ na phiyọ itabanako na, ohwo rẹ ọkpọ rọyen djẹ idodo, ọyen me jẹreyọ.’

Ẹdẹ rọ vwọ kpahọn, Mosis da ghwẹ ekpọ na eje phia, o de dje ayen kẹ isun na. Ọkpọ rẹ Erọn yen djẹ idodo, je mọ emamọ. Idjerhe nana yen Jihova vwo djephia nẹ Erọn ọyen o vwo mu orherẹn rode.