Omarẹ emeranvwe ivẹ rẹ ihwo rẹ Izrẹl vwo nẹ Ijipt nu, ayen de rhi te Ugbenu rẹ Sinai, ayen da domaji vwẹ etiyin. Jihova de se Mosis kpo enu rẹ ugbenu na, ọ da ta kẹ: ‘Mẹvwẹ yen sivwin ihwo rẹ Izrẹl. Ayen de nyupho mẹ je yọnrọn irhi mẹ, kẹ ayen cha dia ihwo oghẹresan kẹ vwẹ.’ Mosis vwo wontọ, ọ da vuẹ ihwo rẹ Izrẹl oborẹ Jihova tare. Die yen ẹkpahọnphiyọ rayen? Ayen da ta: ‘Avwanre che ru emu ejobi rẹ Jihova tare.’

Mosis da rhoma kpo enu rẹ ugbenu na. Etiyin Jihova da ta: ‘Ẹdẹ erha da wan nu, me cha ta ota kẹ wẹ. Re si ihwo na orhọ nẹ ayen siẹkẹrẹ Ugbenu na kakaka-a.’ Mosis de wontọ, ọ da vuẹ ihwo rẹ Izrẹl na nẹ ayen muegbe ayen vwo nyo ota rẹ Jihova.

Ẹdẹ erha vwọ wan nu, ihwo na da mrẹ enu na rọ nyavwaro vẹ ebri ro muru vwẹ enu rẹ ugbenu na. Ayen de ji nyo edo rẹ agbraran kugbe edo rẹ owanre. Jihova de wontọ rhe enu rẹ ugbenu na womarẹ erhanre. Oshọ de mu ihwo na mamọ, kẹ ayen kpogho. Ugbenu na ko kpogho gangan, ivwirhin de rhuro. Jẹ edo rẹ owanre na ganphiyọ. Etiyin Ọghẹnẹ da ta: ‘Mẹvwẹ Jihova. Ovwan ga eghẹnẹ efa-a.’

Mosis da rhoma kpo enu rẹ ugbenu na, Jihova da vwẹ irhi kẹ vwo rhe ihwo na kpahen oborẹ ayen ga wan kugbe oborẹ ayen yeren akpọ wan. Mosis de si irhi na phiyotọ, o de se kẹ ihwo rẹ Izrẹl. Ayen de ve nẹ, ‘Avwanre che ru emu ejobi rẹ Jihova tare.’ Ayen ve ive kẹ Jihova. Ẹkẹvuọvo, ayen che ghini ru oborẹ ayen veri na?