Joshua sun ihwo rẹ Jihova vwẹ ikpe buebun, o de ghwu ọke rọ vwọ hẹ ẹgbukpe 110. Vwẹ akpeyeren rọyen eje, ihwo rẹ Izrẹl na ga Jihova. Ẹkẹvuọvo Joshua vwo ghwu nu, kẹ ayen ga edjọ kirobo rẹ ihwo rẹ Kenan ruru. Kidie nẹ ayen chukoku Jihova, Jihova da vwẹ uphẹn kẹ ovie rẹ Kenan re se Jabin nẹ o gboja kẹ ayen. Ihwo rẹ Izrẹl na ke yare ukẹcha rẹ Jihova. Jihova da kẹ ayen osun kpokpọ re se Barak. Ọ cha chọn ihwo na uko vwo rhivwin bru Jihova rhe.

Dẹbora, ọyen ọmraro, o de ji ihwo nẹ e re se Barak rhe. O guọnọ vuẹ Barak ovuẹ rẹ Jihova nana: ‘Reyọ eshare 10,000 wo bru isodje rẹ Jabin ra vwẹ urhie rẹ Kishọn. Etiyin wo de che phi Sisira rọ dia onotu rẹ isodje rẹ Jabin na kparobọ.’ Barak da vuẹ Dẹbora: ‘Me cha ra siẹrẹ wo de nene uvwe.’ Dẹbora da kpahen kẹ: ‘Mi che nene uwe. Ẹkẹvuọvo, wọ me riẹn nẹ ọ dia owẹ yen che hwe Sisira-a. Jihova tare nẹ aye yen che hwe.’

Dẹbora de nene Barak vẹ isodje rọyen kpo Ugbenu rẹ Tabọr re muegbe hẹrhẹ ofovwin na. Sisira ghwe vwo nyo kpahọn, o de  koko ekpẹrẹ rẹ ofovwin vẹ isodje rọyen vwẹ iyara rẹ ugbenu na. Dẹbora da vuẹ Barak: ‘Nonẹ yen ẹdẹ rẹ Jihova cha vwọ kẹ wẹ ophikparobọ.’ Barak vẹ eshare 10,000 na de wontọ nẹ ugbenu na, ayen de bru isodje rode rẹ Sisira ra.

Jihova da nẹrhẹ urhie rẹ Kishọn na vọn mwavwe hwẹ. Ekpẹrẹ rẹ ofovwin rẹ Sisira da ro ibehre na. Sisira de wontọ nẹ akpẹrẹ rọyen, ọ da djẹ. Barak vẹ isodje rọyen de phi isodje rẹ Sisira kparobọ, ẹkẹvuọvo Sisira djẹ vabọ! Ọ da djẹ re siomanu vwẹ utughẹ rẹ aye re se Jael. Aye na da vwẹ ameivie vwọ kẹ da, ọ da vwẹ amwa vwo phopho ọshare na. Sisira da vwerhẹn yanran. Jael da shọrọ brora riẹinriẹin, o de hwe ubibẹ phiyọ uyovwin rọyen. O de ghwu.

Barak da guọnọ Sisira tẹ etiyin. Jael de vrẹn nẹ utughẹ rọyen phia, ọ da vuẹ Barak: ‘Yanrhe. Mi che dje ọshare wọ guọnọ na vwọ kẹ wẹ.’ Barak vwọ ro utughẹ na ọ da mrẹ Sisira rọ ghwu phiyotọ. Barak vẹ Dẹbora da so une vwo jiri Jihova fikirẹ ophikparobọ rọ vwọ kẹ ihwo rẹ Izrẹl na. Izrẹl de rhi vwo ufuoma vwẹ ẹgbukpe 40.