Ihwo rẹ Izrẹl rhoma sen Jihova, ayen ke ga eghẹnẹ rẹ efian. Ihwo rẹ Ammọn vwọ kpare ofovwin bru ihwo rẹ Izrẹl, eghẹnẹ rẹ efian na sa chọn ayen uko-o. Ihwo rẹ Izrẹl na rioja vwẹ ikpe buebun. Ukuotọ rọyen, ayen da vuẹ Jihova: ‘Avwanre ru umwemwu. Biko sivwin avwanre nẹ obọ rẹ ivwighrẹn na.’ Ayen da guọghọ edjọ na ejobi, ayen de rhivwin bru Jihova rhe. Jihova je guọnọ nẹ ayen rioja-a.

Ọgbofovwin re se Jẹfta yen a sanere nẹ o sun ihwo na kpo ofovwin vwọso ihwo rẹ Ammọn. Jẹfta da vuẹ Jihova: ‘Wọ da chọn avwanre uko vwo phikparobọ, mi veri nẹ mi de rhivwin rhe, me cha vwẹ ohwo rẹsosuọ ro nẹ uwevwin mẹ rhe rhi dede  uvwe vwọ kẹ wẹ.’ Jihova kerhọ kẹ ẹrhovwo rẹ Jẹfta na o de ghini phikparobọ.

Jẹfta vwo rhivwin rhe, ohwo rẹsosuọ ro rhi dede yen ọmọtẹ rọyen, rọ je dia ọmọ vuọvo ro vwori. Ọmọtẹ na gbeha cha vẹ ihwehworo. Die yen Jẹfta che ru? Ọ karophiyọ ive rọyen, ọ da ta: ‘E, ọmọtẹ mẹ! Wọ nẹrhẹ ubiudu mẹ kuọrọn. Mi ve ive kẹ Jihova. Mi se vwo ru obo me tare na, ki mi che mu we ra ga vwẹ uwevwin ẹga rọhẹ Shiloh.’ Ọmọ na da ta kẹ: ‘Ọsẹ mẹ, ọ da dianẹ wo ve ive kẹ Jihova, gbe ru obo wo veri. Biko, kẹ vwẹ emeranvwe ivẹ me vẹ igbeyan mẹ ghwọrọ ọke kugbe vwẹ enu igbenu na, me ke yanran.’ Ọmọtẹ rẹ Jẹfta da ga vwẹ uwevwin ẹga na vwẹ akpeyeren rọyen ejobi. Kukpe kukpe, igbeyan rọyen ke kọn brora vwẹ Shiloh.