Ikuegbe rẹ Jẹriko da hrabọ ro irere rẹ Kenan ejobi. Ivie rẹ Kenan de muegbe rẹ ayen vwo nene ihwo rẹ Izrẹl họnre. Ẹkẹvuọvo ihwo rẹ Gibeọn da jiroro ọfa. Ayen de bru Joshua ra vẹ iwun re bẹre, ayen da ta: ‘Asan oshesheri yen avwanre nurhe. Avwanre nyo kpahen Jihova vẹ obo ro ruru vwẹ Ijipt kugbe Moab. Biko ve kẹ avwanre nẹ ovwan che djobọte avwanre-e, kẹ avwanre dia eviẹn rẹ ovwan.’

Joshua se ota rayen gbuyota, ọ da rhọnvwe kẹ ayen. Ẹdẹ erha vwọ wan nu, o de rhi nyo nẹ asan rẹ ayen nurhe sheri-i. Otọ rẹ Kenan yen ayen hepha. Joshua da nọ ihwo rẹ Gibeọn na: ‘Diesorọ ovwan vwo gun efian kẹ avwanre?’ Ayen da ta: ‘Oshọ yen sorọ! Avwanre riẹnre nẹ Jihova Ọghẹnẹ họnra kẹ ovwan. Biko, we hwe avwanre-e.’ Joshua ru obo ro veri, o rhe hwe aye-en.

O kriri-i, ivie iyorin rẹ Kenan vẹ isodje rayen da vwọso ihwo  rẹ Gibeọn. Joshua vẹ isodje rọyen da yan kọkirhie re sivwin ayen. Ohọnre na tonphiyọ vwẹ edegburhiọke rọ vwọ kpahọn. Ihwo rẹ Kenan ke rhe djẹ ghwru. Jihova da nẹrhẹ osio rẹ ibieragha rhọ ku ayen vwẹ kasan kasan rẹ ayen djẹ ra. Joshua da rẹ Jihova nẹ o jẹ ọnre na mudia asan ọvo. Die yen nẹrhẹ ọ sa rẹ Jihova nẹ o ru emu ọtiọyen rọ je phia dẹvo-o? Kidie ọ vwẹroso Jihova. Ọnre na rha ruotọ ẹdẹ yena-a bẹsiẹ ihwo rẹ Izrẹl vwo phi ivie rẹ Kenan vẹ isodje rayen kparobọ nu.