Mosis ro suẹn ẹgborho rẹ Izrẹl vwẹ ikpe buebun rhire na, sikẹrẹ ẹdẹ ughwu rọyen re. Jihova da vuẹ nẹ, ‘Ọ dia owẹ yen che sun ihwo rẹ Izrẹl ro Otọ rẹ Ive na-a. Ẹkẹvuọvo wọ cha mrẹ otọ na.’ Mosis da rẹ Jihova nẹ ọ sane ohwo ọfa ro che sun ihwo na. Jihova da ta kẹ: ‘Bru Joshua ra, wọ vuẹ nẹ ọyehẹ ohwo na.’

Mosis da vuẹ ihwo na nẹ o che ghwu kẹrẹkpẹ, ẹkẹvuọvo Jihova sane Joshua nẹ o sun ayen ro Otọ rẹ Ive na. Mosis da ta kẹ Joshua: ‘Wọ djoshọ-ọ. Jihova cha chọn wẹ uko.’ O rhe kri-i, Mosis de yerin kpo enu rẹ Ugbenu rẹ Nebo, Jihova de dje otọ ro ve kẹ Ebraham, Aizik vẹ Jekọp na kẹ. Ẹgbukpe 120 yen Mosis hepha ọke ro vwo ghwu.

Jihova da vuẹ Joshua: ‘Wan Urhie rẹ Jọdan vrẹ, wọ ro otọ rẹ Kenan. Me cha vwẹ ukẹcha kẹ wẹ kirobo mi vwẹ ukẹcha kẹ Mosis. Wo mi se Urhi mẹ kẹdẹ kẹdẹ. Wọ djoshọ-ọ. Fiudugberi. Yanran re ru obo me vuẹ wẹ na.’

 Joshua de ji eshare ivẹ ra bẹbẹ ni orere rẹ Jẹriko. Vwẹ ikuegbe rọ vwọ kpahen ọnana, a cha ta ota kpahen obo re phiare ọke rẹ ayen vwo te oboyin. Ọke rẹ eshare ivẹ na vwo rhivwin rhe, ayen da tanẹ ọnana omamọ ọke ra vwọ ro otọ rẹ Kenan. Vwẹ ẹdẹ rọ vwọ kpahọn, Joshua da vuẹ ihwo na nẹ ayen krun eghwa rayen. O de ji irherẹn ri mu okọ rẹ ophọ na kobaro ra ro Urhie rẹ Jọdan. Jẹ urhie na djẹ ọkẹre. Ọke rẹ awọ rẹ irherẹn na ghwe vwo te ame na, ọkẹre na da daji, kọ rhe kpọ muotọ! Irherẹn na da yan kpo uherevie rẹ urhie na re mudia bẹsiẹ ihwo rẹ Izrẹl ejobi vwọ wan urhie na vrẹ. Wo rorori nẹ igbevwunu nana nẹrhẹ ayen karophiyọ oborẹ Jihova ruru vwẹ Abadi Ọvwavware na?

Ikpe yena eje vwọ wan nu, ihwo rẹ Izrẹl da rhe ro Otọ rẹ Ive na. Enẹna kẹ ayen sa bọn iwevwin vẹ irere buebun. Ayen sa kọn idju, ogba rẹ vaini, kugbe irhe. Erọnvwọn buebun herọ ra sa re je da, kọyensorọ a vwọ tanẹ Otọ rẹ Ive na ọyen otọ rẹ ameivie vẹ ame-ọnyọn.