Eli rọ dia Orherẹn Rode na vwo emeshare ivẹ re je dia irherẹn vwẹ uwevwin ẹga na. Edẹ rayen yen Hofni kugbe Finihas. Ayen yọnrọn irhi rẹ Jihova-a, ayen ji shenyẹ ihwo. Ihwo rẹ Izrẹl de rhi ze izobo kẹ Jihova, Hofni vẹ Finihas me reyọ ẹbẹre rẹ eranvwe na ro me yovwin. Eli nyo kpahen oborẹ emọ rọyen ruẹ na, ẹkẹvuọvo o ru emu vuọvo kpahọ-ọn. Jihova cha yanjẹ ayen vwo ọtiọyen?

Dede nẹ Samuẹl, omotete vwọ kẹ Hofni vẹ Finihas, jẹ ọ vwẹrokere ayen kakaka-a. Oma da vwerhen Jihova kpahen Samuẹl. Ason ọvo, Samuẹl vwọ vwerhẹn o de nyo upho ọvo ro se odẹ rọyen. O de vrẹn, ọ da djẹ bru Eli ra nẹ, ‘Mẹvwẹ na!’ Eli da ta: ‘Mi se we-e, re sherhẹn.’ Samuẹl de re sherhẹn. Upho na da rhoma se abọ rivẹ. Samuẹl vwọ rhoma nyo upho na abọ rerha, Eli da rhe mrẹvughe nẹ Jihova yen se Samuẹl na. Ọ da vuẹ Samuẹl nẹ ọ da rhoma nyo upho na, ọ me ta: ‘Ta ota kẹ vwẹ, Jihova. Odibo wẹn nyo we.’

Samuẹl da rhoma re sherhẹn. Upho na da rhoma se: ‘Samuẹl! Samuẹl!’ Ọ da kpahen: ‘Ta ota kẹ vwẹ, odibo wẹn nyo  we.’ Jihova da vuẹ: ‘Vuẹ Eli nẹ mi che gboja kẹ vẹ orua rọyen. Ọ riẹnre nẹ emọ rọyen ruẹ umwemwu vwẹ uwevwin ẹga mẹ jẹ o ru emu vuọvo kpahọ-ọn.’ Ọke vwo rhie, Samuẹl de rhie ẹchẹ rẹ uwevwin ẹga na kirobo ro ruẹ jovwo. Oshọ ko muọ rọ vwọ vuẹ orherẹn rode na oborẹ Jihova tare. Ẹkẹvuọvo Eli de se, ọ da nọ: ‘Ọmọ mẹ, die yen Jihova vuẹ wẹ? Vuẹ vwẹ kemu kemu ejobi.’ Ọtiọyena, Samuẹl da vuẹ Eli oborẹ Jihova tare ejobi.

Samuẹl vwọ ghwanra na, jẹ ọ vẹ Jihova kpẹkpẹ phiyọ. Ihwo rẹ Izrẹl na eje rehẹ ẹkuotọ na riẹnre nẹ Jihova jẹ Samuẹl ọ vwọ dia ọmraro vẹ oguẹdjọ.