Ihwo rẹ Izrẹl buebun rhoma ra ga eghẹnẹ rẹ efian, ọtiọyena Jihova da vwẹ uphẹn kẹ ihwo rẹ Filistia nẹ i sun otọ na. Ẹkẹvuọvo, o ji vwo ihwo rẹ Izrẹl evo ri vwo ẹguọnọ rẹ Jihova, ohwo kerẹ Manoa. Ọ vẹ aye rọyen ji vwiẹ-ẹ. Ẹdẹ ọvo Jihova de ji amakashe bru aye rẹ Manoa ra. Amakashe na da vuẹ aye na: ‘Wo che vwiẹ ọmọshare. O che sivwin ihwo rẹ Izrẹl vwo nẹ abọ rẹ ihwo rẹ Filistia. Ọ cha dia Ojigbo.’ Wọ riẹn ohwo re se Ojigbo? Ọnana odibo rẹ Jihova rẹ oghẹresan. Ihwo re dia Ojigbo brẹto raye-en.

Ọke vwọ yanran na, Manoa de ghini vwiẹ ọmọshare, o de se Samsin. Samsin vwọ ghwanra na, Jihova da vwẹ ẹgba vwọ kẹ mamọ. Ọ sa vwẹ obọ rọyen hwe okpohrokpo. O vwo ọke ọvo rẹ Samsin vwo hwe ihwo rẹ Filistia ri te 30. Ihwo rẹ Filistia na vwo utuoma kpahọn, kẹ ayen guọnọ idjerhe rẹ ayen vwo hwe. Vwẹ ason ọvo, Samsin vwọ vwerhẹn vwẹ Gaza, ihwo rẹ Filistia na de kpo anurhoro rẹ orere na ra hẹrhẹ rere ayen vwọ teyọn hwe vwẹ urhiọke. Ẹkẹvuọvo, vwẹ uherevie rẹ ason, Samsin de vrẹn kpo anurhoro rẹ orere na, o de kporo igeti rẹ anurhoro na no. O de mu igeti na phiyọ igabọ rọyen vwo yerin kpo enu rẹ ugbenu rọ kẹrẹ Hebrọn!

Ọyena vwọ wan nu, ihwo rẹ Filistia na de bru Dẹlila ra, rọ dia ọsen rẹ Samsin, ayen da ta kẹ: ‘Avwanre cha kẹ wẹ igho buebun siẹrẹ wọ da sa riẹn oboresorọ Samsin vwo vwo ẹgba tiọyen. Avwanre guọnọ muo phiyọ uwodi.’ Dẹlila guọnọ igho na, ọtiọyena, ọ da rhọnvwe. Ẹsosuọ, Samsin rhọnvwe vuẹ-ẹ. Ẹkẹvuọvo, aye na kọ viẹ, jọ rẹ, jo kpokpo, ukuotọ rọyen Samsin da vuẹ. Ọ da ta: ‘E ji brẹto mẹ dẹvo-o, kidie mẹvwẹ Ojigbo, e de brẹto mẹ, mi rhe che vwo ẹgba-a.’ Obore Samsin ruru na yovwiri-in, ọ dia ọtiọyen?

 Dẹlila da ghwa ra vuẹ ihwo rẹ Filistia na: ‘Me riẹn esiri rẹ ẹgba rọyen re!’ Ọ da nẹrhẹ Samsin sherhẹn vwẹ awọ rọyen, o de brẹto rọyen. Dẹlila de kperi: ‘Samsin, ihwo rẹ Filistia na hẹ etinẹ!’ Samsin vwọ rhọnvwọn, ẹgba rọyen nuro oma nure. Ihwo rẹ Filistia na da yọnrọn, ayen de rhuẹro rọyen, ayen de muo phiyọ uwodi.

Ẹdẹ ọvo, ihwo rẹ Filistia na de koko vwẹ ọguan rẹ ẹdjọ rayen re se Dagọn, kẹ ayen kperẹ: ‘Ọghẹnẹ rẹ avwanre phi Samsin phiyọ obọ avwanre re! Reyọ Samsin rhe! Jẹ a reyọ vwọ jehwẹ.’ Ayen de mu Samsin phiyọ uherevie rẹ ichivwo ivẹ, kẹ ayen reyọ vwọ jehwẹ. Samsin de kperi phia: ‘E Jihova, biko kẹ vwẹ ẹgba obọ ọvo nana.’ Enẹna, ẹto rẹ Samsin rhoma dinre. Ọ da vwẹ ẹgba rọyen ejobi vwo gere ichivwo rẹ ọguan na. Uwevwin na de she teyen ihwo eje rehẹ evun rọyen, ayen de ghwu, Samsin dede de ji ghwu.