Jihova da vuẹ Samuẹl: ‘Kpo uwevwin rẹ Jesse. Ọvo usun rẹ emeshare rọyen yen cha dia ovie rivẹ rẹ Izrẹl.’ Samuẹl de kpo uwevwin rẹ Jesse. Ọ vwọ mrẹ ọmọshare ọkpako na o de roro: ‘Ọnana yen ohwo na.’ Ẹkẹvuọvo, Jihova da vuẹ Samuẹl nẹ ọ dia ọye-en. Jihova da ta: ‘Me mrẹ obo rehẹ ubiudu rẹ ohwo, ọ ghwa diẹ ugboma rọye-en.’

Jesse de se emeshare rọyen esan efa rhe. Ẹkẹvuọvo Samuẹl da ta: ‘Jihova jẹ ọvuọvo usun raye-en. Wo vwo emeshare efa?’ Jesse da ta: ‘Ọvo ji chekọ, ubrevwiẹ mẹ, Devid. Ọ vwẹrote igodẹ mẹ vwẹ aghwa.’ Devid vwọ yanrhe, Jihova da vuẹ Samuẹl nẹ, ‘Ọna yen ohwo na!’ Samuẹl de ku evwri ku uyovwin rẹ Devid, ro djerephia nẹ ọ cha dia ovie rẹ Izrẹl vwẹ obaro na.

Ọmọke vwọ wan nu, ihwo rẹ Filistia da kpare ofovwin bru ihwo rẹ Izrẹl rhe, ihwo rẹ Filistia na vwo arhuanran ọvo rọ họnra vwọ kẹ ayen, odẹ rọyen Golayat. Golayat kọ reyọ ihwo rẹ Izrẹl vwọ jehwẹ kẹdẹ kẹdẹ. O mi kperi: ‘Ovwan ji ọshare ọvo rhe rere o rhi nene uvwe họnre. O de phikparobọ, avwanre ke dia eviẹn rẹ ovwan. Jẹ mi de rhe phikparobọ, ovwan ke rha dia eviẹn rẹ avwanre.’

Devid de mu emu rhe iniọvo rọyen re dia isodje, vwẹ asan rẹ isodje rẹ Izrẹl dia. O vwo nyo eta rẹ Golayat, ọ da ta: ‘Mi che nene  họnre!’ Ovie Sọl da ta: ‘Wẹwẹ omotete.’ Devid da kpahen kẹ: ‘Jihova cha chọn vwẹ uko.’

Sọl de ku iwun rẹ ofovwin rọyen phiyọ Devid, ẹkẹvuọvo Devid da ta: ‘Me cha sa vwẹ iwun nana vwọ họnre-e.’ Devid da tọrọ ophiẹn rọyen o de kpo okọkọ rẹ urhie. Ọ da sane ibikuta iyorin re pha rionrionrion ọ de phi ayen phiyọ ekpu rọyen. Devid da djẹ bru Golayat ra. Arhuanran na de kperi: ‘Yanrhe, ọmọ na. Me cha vwẹ uvwo rẹ oma wẹn vwọ ghẹrẹ ephran rẹ enu na kugbe eranvwe rẹ aghwa na.’ Oshọ mu Devidi-i. Ọ da ta kẹ: ‘Wo muẹ ọlọkọ vẹ oshuẹ bru vwe rhe, ẹkẹvuọvo mi bru we cha vẹ odẹ rẹ Jihova. Ọ diẹ avwanre yen wọ họnra na-a, wọ họnra vwọsua Ọghẹnẹ. Ihwo ejobi cha mrẹvughe nẹ Jihova vwo ẹgba nẹ ọlọkọ yẹrẹ oshuẹ. O che phi ovwan phiyọ obọ rẹ avwanre.’

Devid de phi ubiukuta ọvo phiyọ ophiẹn na, o de djuo gangan. Womarẹ ukẹcha rẹ Jihova, ubiukuta na de she arhanre rẹ Golayat. Arhuanran na de she, o de ghwu. Ihwo rẹ Filistia na da djẹ. Wọ vwẹroso Jihova kerẹ Devid?