Ọmọkpako rẹ Ovie Sọl re se Jonatan, ọyen ọgbofovwin ro fiudugberẹ. Devid tare nẹ Jonatan djẹ vrẹ ugo, ọ je gan vrẹ okpohrokpo. Ẹdẹ ọvo, Jonatan da mrẹ isodje rẹ Filistia evo vwẹ enu rẹ ugbenu. Ọ da vuẹ ohwo ro muẹ ekuakua rẹ ofovwin rọyen nẹ, ‘Jihova cha kẹ ohwo oka tavwen e ki che nene ayen họnre. Ihwo rẹ Filistia na da tanẹ avwanre bru ayen rhe, ke che nene ayen họnre.’ Isodje rẹ Filistia na de ghini kperi phia: ‘Ovwan mọ a họnre!’ Ayen ihwo ivẹ na de yerin kpo enu rẹ ugbenu na, ayen de hwe isodje 20.

Ofori nẹ Jonatan dia ovie jovwo kidie ọyehẹ ọmọkpako rẹ Sọl. Ẹkẹvuọvo, Jonatan riẹnre nẹ Devid yen Jihova jẹre nẹ ọ dia ovie rọ cha vwọ kpahen Sọl, dedena ọ rioma-a. Jonatan vẹ Devid  da rhe dia omamọ igbeyan. Ayen veri nẹ ayen cha vwẹrote ohwohwo je chochọ rẹ ohwohwo. Jonatan da vwẹ ewun, ọlọkọ, kugbe umurhabọ rọyen vwọ kẹ Devid kerẹ oka rẹ ugbeyan rayen.

Ọke rẹ Devid vwọ djẹ fikirẹ Sọl, Jonatan de brora ọ da vuẹ: ‘Wo jẹ oshọ mu we-e, fiudugberi. Jihova jẹ wẹ reyọ kerẹ ovie nure. Ọsẹ mẹ tobọ je riẹn ọnana.’ Wọ guọnọ vwo omamọ ugbeyan kerẹ Jonatan?

Ọ vrẹ obọvo rẹ Jonatan phi arhọ rọyen phiyọ ẹdia rẹ imuoshọ fikirẹ ugbeyan rọyen. Ọ riẹnre nẹ ọsẹ rọyen guọnọ hwe Devid, ọtiọyena ọ da vuẹ ọsẹ rọyen: ‘Ọyena umwemwu siẹrẹ wo de hwe Devid kidie o ru obo re chọre-e.’ Ivun de miovwo Sọl kpahen Jonatan gangan. Ikpe evo vwọ wan nu, Sọl vẹ Jonatan de ghwu vwẹ ofovwin.

Jonatan vwo ghwu nu, Devid da guọnọ ọmọ rẹ Jonatan re se Mefiboshet. Devid vwọ mrẹ ọmọ na ọ da vuẹ: ‘Me cha vwẹrote we kidie ọsẹ wẹn omamọ ugbeyan vwọ kẹ vwẹ. Mọ rhe dia egodo mẹ, wọ je riemu vwẹ imẹjẹ mẹ.’ Jonatan nama chọrọ Devid ẹro-o.