Devid vwo hwe Golayat nu, Ovie Sọl da reyọ vwo mu onotu rẹ isodje rọyen. Devid phikparobọ vwẹ ifovwin buebun ro phiri, ihwo eje de rhi vughe. Kọke kọke Devid de nẹ ofovwin rhe, eya na ki gbeha je suine nẹ, ‘Sọl hwe uriorin, ẹkẹvuọvo Devid hwe uriorin ihwe!’ Sọl da rhe rioma kpahen Devid, kọ guọnọ hwe.

Devid nabọ riẹn obo re hworo isorogun. Ẹdẹ ọvo rẹ Devid vwo hworo isorogun vwọ kẹ Sọl, Ovie na da vwẹ ubiri vwo phio. Devid de siomareyọ, ubiri na de she igbehẹ na. Ọyena vwọ wan nu, Sọl je davwẹngba abọ buebun ro vwo hwe Devid. Ukuotọ rọyen, Devid da dje re siomanu vwevunrẹ aghwa.

Sọl da reyọ isodje ri te 3,000, ayen da ra guọnọ Devid. Sọl da ro evunrẹ unu rẹ Devid vẹ ihwo rọyen de siomanu na.  Eshare ri nene Devid na da bẹbẹ vuẹ Devid: ‘Ọnana yen uphẹn wo vwo hwe Sọl.’ Devid da shọrọ kpo asan rẹ Sọl hepha, o de bru obotọ rẹ ewun rẹ Sọl. Jẹ Sọl riẹnre-e. Ẹkẹvuọvo, ẹwẹn rẹ Devid ko kpokpo nẹ ọyen muọghọ kẹ ovie rẹ Jihova vwo mu-u. Ọ rhọnvwere nẹ eshare rọyen djobọte Sọ-ọl. Ọ tobọ kparunu se Sọl, ọ da vuẹ nẹ o vwo uphẹn ro vwo hwe jovwo. Ọnana nẹrhẹ Sọl wene ẹwẹn rọyen kpahen Devid?

Ẹjo. Sọl je guọnọ hwe Devid. Ason ọvo, Devid vẹ Abishai rọ dia ọmọ-oniọvo rọyen da bẹbẹ ro asan rẹ Sọl hepha vwẹ aghwa na. Jẹ Abner rọ tobọ dia onotu rẹ Sọl, vwerhẹn. Abishai da ta: ‘Ọnana yen uphẹn re vwori! Ji mi ghwe hwe.’ Devid da kpahen kẹ: ‘Jihova yen cha hwosa kẹ Sọl. E jẹ a reyọ ubiri vẹ ọtoto rẹ ame rọyen rere a yanran.’

Devid de yerin kpo enu rẹ ugbenu ọvo ro hirhopharoku asan rẹ Sọl hepha na. O de kperi phia: ‘Abner, diesorọ wọ rha sa sẹro rẹ arhọ rẹ ovie wẹ-ẹn? Ọtoto rẹ ame rẹ Sọl kugbe ubiri rọyen rhọ?’ Sọl da rhe riẹn nẹ ọyena upho rẹ Devid, ọ da ta: ‘Wo se hwe vwe jovwo, ẹkẹvuọvo, wo hwe vwe-e. Me riẹnre nẹ wẹwẹ yen ovie rivẹ rẹ Izrẹl.’ Sọl de rhivwin kpo uwevwin rọyen. Ẹkẹvuọvo, ọ dia ihwo rehẹ orua rẹ Sọl eje yen vwo utuoma kpahen Devidi-i.