Vwẹ ọke rẹ osio vwo jẹrhọ na, Jihova da vuẹ Ilaija: ‘Yan kpo Zarefat. Ayeuku ọvo cha kẹ vwẹ emu vwẹ oboyin.’ Vwẹ anurhoro rẹ orere na, Ilaija da mrẹ ayeuku ọvo rọ dia ovwiogbere ro koko irhe. Ilaija da vuẹ nẹ ọ jẹ ame kẹ ọyen. Aye na vwọ yanran ra jẹ ame na, Ilaija da ta kẹ: ‘Biko je kẹ vwẹ ikara.’ Ẹkẹvuọvo ayeuku na da ta: ‘Mi vwo ikara vuọvo re me sa kẹ wẹ-ẹ. Imiflawa vẹ evwri tutuno yen chekọ ri mi che vwo ru ememu vwọ kẹ oma mẹ vẹ ọmọ mẹ.’ Ilaija da vuẹ: ‘Jihova veri nẹ wọ da kẹ vwẹ ikara na, iflawa vẹ evwri wẹn na che re-e rhi te ọke rẹ osio cha vwọ rhọ.’

Ọtiọyena, ayeuku na da yanran ra kaka ikara na kẹ ọmraro na. Kirobo rẹ Jihova veri, owẹnvwe hwe ayeuku na vẹ ọmọ rọyen kakaka-a bẹsiẹ osio ke re rhọ. Iflawa vẹ evwri rẹ ayeuku na ko buẹnphiyọ, o rhe re-e.

Orọnvwọn ọbrabra ọvo da rhe phia. Ọmọshare rẹ ayeuku na  da rhe muọga, o de ghwu. Aye na da rẹ Ilaija nẹ ọ chọn ọyen uko. Ilaija de mu ọmọ na kpo obenu rẹ uwevwin na. O de muo phiyọ enu rẹ ehwa, ọ da nẹrhovwo: ‘Jihova, biko jẹ arhọ rẹ ọmọ na rhoma rhivwin bro rhe.’ Wọ riẹn oboresorọ ọnana wọ dia igbunu rode? Kidie vwẹ ọke yena, a je mrẹ ohwo vuọvo ro ghwuru rọ rhoma vrẹ-ẹn. Ayeuku nana vẹ ọmọ rọyen je dia ihwo rẹ Izrẹ-ẹl.

Dedena, ọmọ na rhoma rhe akpọ, ọ da rhoma yerin! Ilaija da ta kẹ oni na, ‘Nighe! Ọmọ wẹn rhoma vrẹn re.’ Oma vwerhen aye na mamọ, ọ da vuẹ Ilaija: ‘Wẹwẹ ghini ohwo rẹ Ọghẹnẹ dẹn. Me riẹn ọnana kidie oborẹ Jihova vuẹ wẹ ọyen wọ ta.’