A vwọ reyọ Solomọn vwo mu ovie rẹ Izrẹl nu, Jihova da nọ: ‘Die wọ guọnọre nẹ me kẹ wẹ?’ Solomọn da ta: ‘Mẹvwẹ omotete, mi vwo ọhọ-ọ. Biko kẹ vwẹ aghwanre mi se vwo sun ihwo wẹn.’ Jihova da kpahen kẹ: ‘Ọ vwọ dianẹ aghwanre wọ nokpẹn rọyen mie vwe na, me cha nẹrhẹ wọ dia ohwo rọ me vwo aghwanre vwẹ akpọ na. Mi ji che ru we phiyọ ọdafe rode. Wo de nyupho mẹ, wọ cha dia akpọ na grongron.’

Solomọn da ton ebabọn rẹ uwevwin ẹga na phiyọ. Ọ reyọ iro ri me yovwin kparobọ, idọnọ efuanfon, irhe, vẹ ikuta vwo ruiruo. Ewena re eya vẹ eshare yen bọn uwevwin ẹga na. Ẹgbukpe ighwrẹn vwo wan nu, ayen de muegbe ayen vwọ vwẹ uwevwin ẹga na kpahotọ kẹ Jihova. O vwo agbada kugbe izobo vwẹ enu rọyen. Solomọn de shiguẹ vwẹ obaro rẹ agbada na, ọ da nẹrhovwo: ‘E Jihova, uwevwin nana pha tutuno kẹ wẹ o ji vwo erhuvwu te-e, ẹkẹvuọvo biko rhiabọreyọ ẹga avwanre wọ je kerhọ rẹ ẹrhovwo avwanre.’ Ẹro vọ yen Jihova vwo ni uwevwin ẹga na vẹ ẹrhovwo rẹ Solomọn? Solomọn ghwa vwọ nẹrhovwo na nu, erhanre de nẹ obenu rhe ọ da torhẹ izobo rọhẹ agbada na. Ọnana djerephia nẹ Jihova rhiabọreyọ uwevwin ẹga na. ihwo rẹ Izrẹl vwọ mrẹ ọnana, oma da vwerhen ayen.

A da rhe riẹn Ovie Solomọn vwẹ ẹkuotọ Izrẹl ejobi kugbe asan efa shesheri. Ihwo muẹ ebẹnbẹn rayen rhe Solomọn. Ovie aye rẹ Shiba tobọ rhe davwọni vẹ enọ egangan. Aye na vwo nyo ẹkpahọnphiyọ rẹ Solomọn, ọ da ta: ‘Mi vwo imuẹro kpahen oborẹ ihwo vuẹ vwẹ kpahen owẹ-ẹ, ẹkẹvuọvo me rhe mrẹre nẹ wọ tobọ ghwanre vrẹ oborẹ mi nyo kpahen owẹ. Jihova Ọghẹnẹ wẹn, bruba kẹ wẹ nure.’ Akpọ de rhi yovwin ihwo rẹ Izrẹl, oma kọ nabọ vwerhen ayen. Ẹkẹvuọvo ewene ọvo da rhe vwomaphia.