A vwẹ Josaya vwo mu ovie rẹ Juda ọke rọ vwọ hẹ ẹgbukpe ẹrenren. Vwẹ ọke yena, ihwo na ru imajiki, ayen je ga edjọ. Ọke rẹ Josaya vwo te ẹgbukpe 16, ọ da davwẹngba rọ vwọ ga Jihova vwẹ idjerhe ro fori. O vwo te ẹgbukpe 20, ọ da guọghọ edjọ sansan rehẹ orere na. O rhe vwo te ẹgbukpe 26, o de vwo ọrhuẹrẹphiyotọ ra vwọ rhuẹrẹ uwevwin ẹga rẹ Jihova.

Vwevunrẹ uwevwin ẹga na, Hilkaya rọ dia orherẹn rode na da mrẹ ukpirhin ọbe rẹ Urhi rẹ Jihova; ọ sa dianẹ ọnana ukpirhin ọbe rẹ Mosis siri komobọ rọyen. Osiọbe rẹ ovie na re se Shafan da vwẹ ọbe na rhe Josaya o de se Urhi na vwọ kẹ. Josaya vwọ kerhọ rẹ obo re se na, ọ da mrẹvughe nẹ ihwo na bo ghwru shesheri kẹ Jihova ikpe buebun re. Ovie Josaya da ta kẹ Hilkaya: ‘Ivun rẹ avwanre miovwo Jihova mamọ. Biko ra ta ota kẹ Jihova. Ọ cha vuẹ avwanre obo re ru.’ Jihova da ta ota womarẹ ọmraro rẹ aye re se Hulda, ọ da ta: ‘Ihwo rẹ Juda chukoku uvwe mamọ. Mi che gboja kẹ ayen ẹkẹvuọvo ọ dia ọke rẹ usuon rẹ Josaya-a kidie ọ vwoma rọyen kpotọ kẹ vwẹ.’

Ovie Josaya vwo nyo ota nana, o de kpo uwevwin ẹga na o de se ihwo rẹ Juda koko. O de se Urhi rẹ Jihova phia vwọ kẹ ẹgborho na eje. Josaya vẹ ihwo na de ve nẹ ayen che nyupho rẹ Jihova vẹ ubiudu rayen eje.

 Vwẹ ikpe buebun re, orere rẹ Juda ji ru orẹ rẹ Ọwanvrẹ-ẹn. Ẹkẹvuọvo, Josaya vwọ mrẹvughe vwẹ ọbe Urhi na nẹ ofori ayen vwo ru orẹ rẹ Ọwanvrẹn na kukpe kukpe, ọ da vuẹ ẹgborho na: ‘Avwanre che ru orẹ rẹ Ọwanvrẹn kẹ Jihova.’ Josaya de muegbe rẹ izobo buebun ro che ze, o de ji vwo ọrhuẹrẹphiyotọ rẹ ihwo re cha suine vwẹ uwevwin ẹga na. Ẹkuotọ na de ru orẹ rẹ Ọwanvrẹn na, ọke vwo rhie ayen de ru Orẹ rẹ Ikara ro Jephuo rọ reyọ ẹdẹ ighwrẹn. Vwo nẹ ọke rẹ Samuẹl rhe, a je mrẹ oka rẹ orẹ rẹ Ọwanvrẹn ọtiọyen dẹvo-o. Josaya ghini vwo ẹguọnọ rẹ Urhi rẹ Ọghẹnẹ. Oma vwerhen owẹ siẹrẹ wo de yono kpahen Jihova?